Kukomboka 9
9
Bandu akana kunzetake Sapanga
Kuboka 32:1-35
1“Nzowania mwaka Aizilaeli! Lisoba la lelenu nhegali pambipi kuloboka losi luku Yoludani, kujenda kugujuku nndema nkolongu wa bandu banga Ayaudi na baabi na makili kuliku mwanganya. Misi jabu ndi mikolongu na jejibii nu mimatu jejihika mbaka kunani ngani. 2Bandu be ndi alasu na babi na makili, ndi baakema Aanaki babube mmanyiki majambu gabu na nzowini bandu heapwaga, ‘Nya jojuwesa kukomana na Aanake?’ 3Mmanya lelenu kubanga jojundongule kulongi ngati mwotu gogutinii ndi Bambu Sapanga, Sapanga winu. Jombi jaakoma haba nakwaawesa palongi jinu, ndienu mwaabenga nakwaakoma mala jimu, ngati Bambu Sapanga ejundagila.”
4“Baada jaka Bambu Sapanga, Sapanga winu, kwaabenga bandu habu palongi jinu, mwakipuna mu mioji jinu kubanga, ‘Ndaba ja waamboni witu ndi Bambu Sapanga jutuletiki tutama mu nndema gongo,’ na kumbi Bambu Sapanga jwaabengiki bandu haba palongi jinu kwa ndaba ju ubaja wabu. 5Nhwesa kutama mu nndema wabu si ndaba mwanganya mbii mwamboni au mwe mbii na mioju ja sapi, ila pe Bambu Sapanga, Sapanga winu, jwaabenga bandu haba polongi jinu kwa ndaba juubaja wabu na ili kutimisa lilobi lejaalapila akahoku binu Abulahamu na Isaka na Yakobu. 6Ndienu, mmanya kubanga Bambu Sapanga, Sapanga winu, jumpekee nndema gongo gubiya winu nga kwa waamboni winu ndi mpalika kugutama nndema, ila ndaba mwanganya ndi mwa bandu mwembii ni ing'omu.
7“Nkombuka wala mwiijewa emunhenga Bambu Sapanga, Sapanga winu jubia niinyela, kulukoba kola. Kutumbuli lisoba lela lemwaboka ku nndema uku Misili mbaka lisoba lemwahika pamba, mwanganya nkuba mung'anambuka Bambu Sapanga. 8Hata ku kitombi sa Holebu kola munhenga jubia ni inyela Bambu Sapanga, najombi jwabia ni inyela ngani, mbaka japala kunkoma. 9Enakwela kukitombi kujopa ibau ya malibu yeyuye yaandikwi lilaganu lelule Bambu Sapanga jahenga na mwanganya, natemi hoku masoba alubaini, ikilu na muhi, ngasenakuliki wala kunywa sindu sokapi. 10Ndienu Bambu Sapanga jambekia ibau ibeli ya malibu yeyaandikwi kulukonzi lwaki, yabiya iandikwi malobi goti gaguge Bambu Sapanga jumpwagila kukitombi kuhuma mu mwotu lisoba le twaketangana pamu. 11Enaa, baada ja masoba alubaini ikilu na muhi, Bambu Sapanga jambekia ibau ibeli ya malibu yeyuye yaandikwi lilaganu.
12“Ndienu Bambu Sapanga jambwagila, ‘Guboka, guhuluka pai jikitombi kanyata, ndaba bandu baku bawaaboiki ku nndema uku Misili atei kulihalabana. Bijilei kanyata indela jela jenaalagalakia bijipwata na bililenganaki kimong'umong'u.’
13“Kabee Bambu Sapanga jambwagila, ‘Naabweni bandu aba ndi babi ni ing'omu ngamaa, 14gunekaje naakoma nukuliputi kutali lihina labu puundema, na nepani naguhenga wehapa kuba atati bu nndema nkolongu na gogubii na makili makolongu kupeta bombi.’
15“Ndienu, nang'anambuka nu kuhuluka kuhuma kukitombi, koni ndotwi ibau ibeli ya malibu, na mwotu wabiya gutenda kunyaka kukitombi. 16Enalinga, nabona munhengi mahakau Bambu Sapanga, Sapanga winu, mwililenganaki kimong'umong'u, sanga kuselewa mwabia mujilei indela jaka Bambu Sapanga jejundangalakia. 17Ndipala, natondubia ibau ibeli yela nukuileke pai, niikajulana palongi jinu. 18Ndienu, nagonila pai nulutumbu palongi jaka Bambu Sapanga, ngati enahenga pa kwatumbulia, kwa masoba alubaini ikilu na muhi, ngase nakuliki posu wala kunywa masi, kwa ndaba jamahakau gagabia mugahengiki mwanganya, suku henga ubaja palongi jaka Bambu Sapanga sukunhenga jubia ni inyela. 19Najogupa inyela na azabu jaka Bambu Sapanga kwa ndaba jinu mwanganya, ndaba jukunkoma mwanganya, lakini Bambu Sapanga jatenda kunyowane kipindi sela. 20Kabee Bambu Sapanga jabia ahengi ngani inyela Aloni kulagi junkomi, ndipala, nundobila Aloni kipindi sese. 21Sindu kibaja sela, sesuse ndi litoli la ng'ombi semwabia mulilenganakili, nikijukua nukukijosa pa mwotu, nikitipatipa nuku kiyagayaga, na kuba ngati luhombi lolulembuliki ndi nulujitala luhombi holu mu kalosi kakanyika pai gikitombi hesi.
22“Kabee muhenga jubia ni inyela Bambu Sapanga, Sapanga winu, pamwabia ku Tabela na Masa na ku Kibuloti hataava. 23Na Bambu Sapanga pajuntuma kuhuma ku Kadeshi balinea japwaga, ‘Nzendania mukugujukua nndema gonumpeki.’ Mwanganya mwatenda kukana ngasemunhobali wala kugapwata gajumpwagila gala. 24Mwanganya mu munntendi ing'omu Bambu Sapanga tumbuka lisoba lenumanya.
25“Ndienu, nagonila lutumbu pai palongi jaka Bambu Sapanga masoba alubaini ikilu na muhi kwa ndaba Bambu Sapanga japwaga jutenda kunkoma. 26Nundoba Bambu Sapanga koni nakapwaga, ‘Mwaa Bambu Sapanga, waakoma bandu baku, bandu baku wamwete, bandu bawaakombula nakwapia mu nndema uku Misili kuuwesu na makili gaku makolongu. 27Waakombuka atumisi baku Abulahamu ni Isaka na Yakobu, wala wilingali kugukana kwabu, ubaja na mahakau ga bandu ababa. 28Bandu kohutupiiki kola biipwaga, wa Bambu Sapanga utupiiki ili kutukoma kulukoba kwa ndaba ngasejawesiki kwaajingisa mu nndema gojaalagilaje ndaba jaatei kwa suki. 29Ndaba bamba ndi bandu baku wamweti, bandu bawaapiiki ku nndema uku Misili kwa makili nu uwesu waku nkolongu.’
Currently Selected:
Kukomboka 9: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
