Kukomboka 1
1
1Kitabu senze kibi na malobi gaguge Musa jwaapwagila bandu boti buku Izilaeli pababi kulungweza upandi golipita lyoba wa losi lwa Yoludani. Babia kuligomba la Yoludani pambipi na pandu pabapakema sufu mu musi uku Palani upandi gumu wa musi uku Tofeli na wa musi uku Labani na musi uku Hazeloti na musi uku Dizahabu nu upandi gongi. 2Kuhika hoku guujenda masoba komi na moja kuhumi ku musi uku Holebu mbaka musi uku Kadeshi Balinea sukupete indela ji kitombi sa Seili. 3Lisoba lu kutumbuli la mwei wa kumi na moja, saka sa alubaini baada jukuboka ku Misili, Musa jaapwagila bandu, kila sindu sesuse Bambu Sapanga jabia anndagalaki jaapwagila. 4Jahenga hela pajabia anhwesiki bambu Sihoni jwa Aamoli jojutamika ku nndema uku Heshiboni na bambu Ogu juku Bashani jojutamika ku nndema uku Ashitaloti mu musi uku Edelei. 5Musa jahenga lihengu la kwaalandi bandu mihilu jaka Sapanga pababia kwii ja losi lwa Yoludani upandi golipiti lyoba.
Jaapwagila ana, 6“Patwabii kukitombi sa Sinai, Bambu Sapanga, Sapanga witu jutupwagila ana, ‘Ntemi masoba gingi mu kitombi senze, 7enu mmbombulana mahema ginu nu unhendalia na sapwali. Nnzendania mu milema ji itombi ja Aamoli na pandu pu nndema ja pambipi ku Alaba, mu itombi na magomba upandi ukusini na pandu ja pambwani, enaa, nzenania mbaka ku nndema uku Kanani nu nndema uku Lebanoni, mbaka ku losi lukolongu lola lobulukema Efulati. 8Nepani Bambu Sapanga napwaaga, nndema gongo woti naapekiya akahoku binu Ibulaimu ni Isaka na Yakobu ni ibeleku yabu yoti. Nnzendania mkugujukua gubiya jinu.’”
Musa jaahagu bandu bukutemu
Kuboka 18:13-27
9Musa jaapwagila bandu, “Patwabii twakona kukitombi sa Sinai, nepani numpwagila ana, ‘Nepani kajika jangu kunndongosa mwanganya mwaboti ndi lihengu lukolongu ngamaa. 10Bambu Sapanga, Sapanga winu, junhengiti mmbiya mwabingi, lelenu mmbii mwabingi ngati ndondu yukunani. 11Bambu Sapanga, Sapanga waka hoku binu, junhenga nhendalia kujonzukeka ngani kupeta embii sajenu nukumpenge ngati ejalagila! 12Lakini nepani kajika jangu niiwesa bole kulihenga lihengu likolongu lukutemu magambu na matatisu gino? 13Nhagula kuhuma mu kila likabila bandu baabi ni malangu na baamanyiki majambu na baajetakewa ili naahagula abiya akikilongosi binu.’ 14Mwanganya mwajetaki mwanyibua ana, ‘Lilobi legulongi laamboni’. 15Ndienu naajukua akikilongosi babi ni isima na baawesa kulonge saamboni na baajetakewa babube babia baasagwi kuhuma mu makabila ginu, nukwaahenga kuba akikilongosi binu. Bangi naahenga akuba akakilongosi ba makundi ga bandu elupu jimu na bangi abiya akikilongosi ba makundi ga bandu miamia na bangi abia akikilongosi bamakundi ga bandu amusiniamusini na bangi akikilongosi ba makundi ga bandu komikomi. Kabee naahagula akikilongosi bangi bakwaalongosa bandu ba kila likabila.
16“Kipindi hesi naalagalakia baatemu bii bala malagalaki ganga, ‘Nzowania magambu ga bandu binu. Mwaatemula sanga kupendalela magambu ga bandu binu Aizilaeli na magambu ga ageni baatama pamu na mwanganya. 17Mwampendalee mundu jokapi pamwiibia ntenda kutemu, mwaajoania sanga kupendalela, akolongu kwa asoku. Mwanzogopa mundu jokapi ndaba kutemu komwiitemula kwiihuma kwaka Sapanga. Ligambu lokapi lelisindikana kwinu, mwalileta kwangu nepani, nanepani nalijowania.’ 18Kipindi sehesi nundagalakia majambu goti gagapalika kuhenga.
Aizalaeli akana lilagalaki lukujingi mu nndema
Esabu 13:1-33
19“Ndienu twahenga ngati, Bambu Sapanga, Sapanga witu, ejutulagalakia, twatumbulia sapwali jitu kukitombi sa Holebu, twapeta kulukoba lukolongu lukutisa lomulumanyi, sukupwata indela jejilongo ku nndema gwi itombi ya Aamoli. Patwahika ku musi wa Kadeshi Balinea, 20Nepani nu mpwagila, ‘Sajenu nhikiki mu nndema gwiitombi wa Aamoli jejuje Bambu Sapanga, Sapanga witu jutenda kutupekea. 21Ndingalia, Bambu Sapanga, Sapanga winu, nndema gojapwaaga jutenda kutupekea ndi golagola. Enu! Nzingala mukatama ngati Bambu Sapanga, Sapanga wa akahoku binu ejupwagila. Mwiijogopa wala kuhola!’
22“Lakini mwanganya mwaboa mwahikania pambipi na nepani numpwagila, tutuma bandu alongulia kugulaluki nndema, halapu akelabuka kutupwagi indela ja sapi jukupeta na misi jabu jibii boo.
23“Lijambu heli labonikana la mboni kwangu nepani, naahagula bandu komi na ibeli, mundu jumu kuhuma kila likabila. 24Bandu haba bajenda ku nndema wiitombi gola, bahika kuligomba la Eshikoli na kugulalukila. 25Pababuja, butuletila matunda kidogu gu nndema hogu na butupwagila kubanga nndema hogu gojutupekee Bambu Sapanga, Sapanga witu ndi jaamboni ngani.
26“Lakini mwanganya ngasemwajetaki lilagalaki laka Bambu Sapanga, Sapanga winu sukukana kwinu kujenda ku nndema hogu. 27Mwang'ong'otikia nepani mu mahema ginu mwapwaga, ‘Bambu Sapanga jutei kutusuki ndaba jutupiiki ku nndema ja Misili. Japala jutukolukiya kwa Aamoli, ili butukoma. 28Ndaba jaki tujenda hoko koni tusokiki makili na tubii nu lujogopo? Butupwagi kubanga bandu ba hoku ndi alasu kupeta twepani, na misi jabu ndi mikolongu najejibi ni imatu lulasu loluhika kunani kumahundi. Kabee bapwaga kubanga baabona bandu akolongu bi kibeleku saka Anaki!’
29“Lakini nepani numpwagila ana, ‘Mwaajogopa bandu haba.’ 30Bambu Sapanga, Sapanga winu, jojuwe jutenda kundongulela, jombi mweni jwiikomana kwa ndaba jinu ngati ejahengila ku nndema wa Misili, 31nukulukoba ndi pandu pakolongu panga kuba na sindu sokapi ila pee nsangi kajika jaki kola kokukwe mwabona namuna ejuntotula nsapwali heji joti ngati atati ejuntoto mwanamundu mbaka mwahika pamba. 32Lakini pamu nukupwagi majambu haga goti, mwanganya ngasemuhobali Bambu Sapanga, Sapanga winu, 33jojuwe jundonguli mwiindela nukuntaputi pandu pukusenga mahema ginu. Ikilu jundongulia kwa mwotu na muwi jundongulia ku lihundi, ili kundangi indela.
Bambu Sapanga jaalapu Aizilaeli
Esabu 14:20-45
34“Bambu Sapanga junzowania kung'ong'oteka kwinu, jabia ni inyela, jalapa sukupwaga, 35‘Kyee nga mundu hata jumu mu kibeleku senze sekibi nu ubaja, jojijingala mu nndema wa sapi gola gonundagila kwaapeke akahoku binu. 36Kalebu mwana waka Yefuni, ndi kanzika jaki jojijingala, nanepani nampekia nndema hogu pajijenda kugulaluki gubia waki jombi ni ibeleku yaki ndaba jubii jukuhobaleka ngani kwangu nepani.’ 37Kwa ndaba jinu mwanganya Bambu Sapanga jandendila inyela nepani kabee, japwaaga, ‘Hata wa Musa ngawijingi mu nndema homu. 38Lakini Joshua mwana waka Nuni, jojugujangati mbaka jujingi homu. Enu gungangamisa mwoju ndaba jombi ndi jaalongusa bandu Aizalaeli kugukamu nndema gubiya gwabu’. 39Ndienu Bambu Sapanga jutupwagila twepani twaboa, ‘Bana bihaba banzogopa kubanga abaja binu baatenda kwaakamu, enaa babii asoku haba banga kukimanya sindu saamboni au kibaja, haba ndi babijingala mu nndema homu, nanepani naapekia bombi nndema hogu ubiya wabu. 40Lakini mwanganya nng'anambuka nkelubuka kulukoba kulongo ku nhanga wa Shamu.’
41“Ndienu mwanyibua, ‘Twepani tunhengi mahakau Bambu Sapanga, lakini enu twiijenda kukomana ngati Bambu Sapanga, Sapanga witu ejutulagalakia’. Hela, ndi kila jumu wii jukujiandia kukomana ngondu, ndaba mwaholalia kubanga libia lihengu lelinonwipi lu kutukali nu kugukamu nndema hogu wi itombi. 42Najombi Bambu Sapanga jwambwagila, ‘Waakalia bandu haba biijenda kukomana ndaba nepani ngase mi pamu na bombi, lakini ana apiti abaja babu biitenda kwaawesa’. 43Ndienu, nepani napwagila hela, lakini mwanganya ngasemwanyoanile. Mwakana kupwata lilagalaki laka Bambu Sapanga, ndaba ji ing'omu inu, mwajingala mu nndema ji itombi heji. 44Hapa Aamoli bababiya atama pandu pala piitombi bahelala kukomana ngati inzusi na kwaalapu ku Seili mbaka ku Holima. 45Ndienu pamwakelabuka nu kunndele Bambu Sapanga, Lakini Bambu Sapanga ngase junzowanile wala kulingali.
Yaka yebabia ku lukoba
46“Henu, mwahigalia ku musi uku Kadeshi kwi kipindi kilasu, mwatama hoku.
Currently Selected:
Kukomboka 1: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
