Kukomboka 2
2
Yaka isokopi kulungwenza
1“Ndienu, twang'anambuka kujenda kulungwenza sukupete indela ju unhanga nkolongu wa Shamu, ngati Bambu Sapanga ejambwagila twayonguluta yonguluta pambipi ni kitombi sa Seili kwi kipindi kilasu. 2Ndienu, Bambu Sapanga, jambwagila, 3‘Nnyongaliti kukipindi kilasu mu nndema gongo wi itombi, enu ng'anambuka nzenda upandi uku kasikazini. 4Mbii pambipi kupeta pikilanda ju nndema wi itombi ya Seili, nndema wa alongu binu kibeleku saka Esau. Haba bantenda kunzogopa, lakini mwalihangaliya, 5mwiikomana nabu ndaba ngana mpekee pandu pokapi pu nndema wabu. Nganampekee hata pandu pasokapi pukukanyata. Nndema hogu wa Seili naapekii bandu bi kibeleku saka Esau gubiya gwabu. 6Anampaliki posu au masi kuhuma kwabu ndi kwiipalika mwiilomba kwa madini ga feza.’
7“Ndienu, nkombuka namuna Bambu Sapanga, Sapanga winu ejumpengi mu kila lihengu lenhengiki. Juntunza pamwabia nzenda jenda kulungweza lukolongu londo. Jubii pamu na mwanganya yaka yoti alubaini jenze na ngase junzimiki sindu sokapi.
8“Ndienu twaendalia na sapwali jitu, twakotuka kupeta kwa alongu bitu, kibeleku saka Esau bababia atama ku nndema wa Seili, tujileka munyuma indela jela jukujenda ku ligomba la Yoludani na misi ja Elati na ku Esiongebeli. Ndienu twang'anambuka twapwata indela jejipeta kulukoba lwa Moabu. 9Bambu Sapanga jwambwagila, ‘Waasumbua bandu buku Moabu, wala wiikomana nabu ndaba nganumpeke mwanganya pandu pokapi pu nndema wabu. Nndema uku Ali hogu naapeki bandu bikibeleku saka Loti gubia mali gabu.’ 10Pamwandi nndema hogu uku Ali akubika atama bandu bingi, babi na makili babakemika Aemi, babube babiii alasu ngati bandu babaakema Aanaki. 11Ngati mimundo jejabi mikolongu ni milasu baakemika Anaki, bandu haba amanyikana ngati Alefai, lakini Amoabu baakemika Aemi. 12Pamwandi Aholi atamika ku Seili, lakini bandu bikibeleku saka Esau baabenga nukwakoma tipitipi, ndienu beni batama hoku pandu hapa. Aizalaeli na bombi bahenga helahela mu nndema gola goguwe Bambu Sapanga jaapekia gubiya wabu.
13“Bambu Sapanga jutupwagila, ‘Nzendania henu mukalobuka ka losi ka Zeledi’. Ndienu twalobuka ka losi ka Zeledi. 14Yaka selasini na nani yabia ipetiki tumbuka patwaboka ku musi uku Kadeshi Balinea mbaka kuloboka ka losi ka Zeledi. Kipindi hesi kibeleku soti sa bandu babi na yaka yukuwesa kukomana sabiya kiwii kulengana na Bambu Sapanga ejaalapila. 15Bambu Sapanga mweni jwaalapula nukwaakoma kumakambi, mbaka boti pabajomuka.
16“Ndienu, bandu haba boti baabii na yaka yukuwesa kukomana pababia akuiki, 17Bambu Sapanga jwambwagila, 18‘Lelenu nndombuka mpaka gwa Moabu kupete nndema wa Ali. 19Mwiihikila mu nndema wa Aamoni. Mwaasumbu wala kukomana nabu ndaba nganampekee pandu punndema pokapi pi kibeleku sa Aamoni, pabiya pinu. Naapeki bandu bi kibeleku saka Loti nndema hogu gubia wabu.’”
20Kabee nndema hogu wamanyikana ndi nndema wa mimundu milasu babaakema Alefai. Alefai atamika hoku pa mwandi, Aamoli baakemika haba liina la Aazamuzumi. 21Alefai haba babia bandu bingi, bana makili na alasu ngati aka Anaki. Lakini Bambu Sapanga jatenda kwaakoma pabahika Aamoli babube bagujukua nndema wabu nu kutama homu badala jabu. 22Bambu Sapanga jahenga ahelahela kwa Aedomu bababiya kibeleku saka Esau, babube atamika mu nndema wi itombi yuku Edomu. Jwaakoma Aaholi, ili Aedomu agukamula nndema wabu nukutama hoko, kokuje mbaka lelenu bakona bakatama. 23Aavi babia atama mu ijiji yi ligomba lu nhanga nkolongu wa Meditelaniani mbaka ku musi uku gaza. Ndienu bahika Akafutoli kuhuma ku kilwa suku Kileti baatenda kwaakoma na batama homu badala jabu.
24“Ndienu Bambu Sapanga jutulagalakia, ‘Enu ntumbulia sapwali nndobuka ligomba la Alinoni. Nepani nunzangatiya kunhwesa Sihoni, bambu nkolongu wa bandu buku Aamoli juku musi wa Heshiboni nu nndema waki. Mukugulapula nukutumbuli kutama homu. 25Lelenu ndumbuli kwaahenga bandu boti bupunndema abia nulujogopu kwa ndaba jinu, biijowana majambu ginu na bombi biitenda kubagaja nukuhangajika.’
Aizalaeli bunhwesa bambu nkolongu Sihoni
Esabu 21:21-30
26“Ndienu, naatuma bandu kuhuma kulukoba luku Kedemoti ajenda kuka bambu nkolongu Sihoni juku nndema uku Heshiboni ni lijambu la amboni lelapwaga, 27‘Gutuleka tupeta mu nndema waku. Tugulagi twiipeta mwiindela sanga kung'anambuka upandi wamalele wala upandi wa mangega. 28Posu na masi ga kunywa twiilomba kwaku. Setuloba pe utujetakia tupeta kwa magolu gitu mu nndema waku, 29mbaka tulombuka losi luku Yoludani nu kujingi munndema goguwe Bambu Sapanga, Sapanga witu jutei kutupeke. Ibeleku yaka Esau yeitama ku nndema uku Seili na Amoabu baatama ku nndema uku Ali butuleka tupeta munndema wabu.’
30“Lakini Sihoni, bambu nkolongu ju nndema uku Heshiboni, ngasejutujetaki tupeta mu nndema waki. Bambu Sapanga, Sapanga winu, anhenga jubiya ni kimutu sekinonwipi na mwoju gogubi ni kibuli, ili tuwesa nukugujuku nndema waki goguwe tutama mbaka lelenu.
31“Bambu Sapanga jwambwagila, ‘Linga ndumbuli kumbeka bambu nkolongu Sihoni nu nndema waki gunhwesa, ntumbuliya kugujukuu nndema waki nukutama.’ 32Ndienu Sihoni jwapita na bandu baki boti kukomana na twepani pambipi na musi uku Yahasa. 33Najombi Bambu Sapanga, Sapanga witu, antenda kumpia, tunhwesa jombi na bana baki na bandu baki boti. 34Tugukamula nukuhalabana misi jaki joti, twaakoma akanalomi na akambomba na bana, ngasetundei mundu jokapi mwomi. 35Hindu yetwiikamwi ndi yabia mipugu na hindu yoti yetuiketania mu misi. 36Kutumbuli ku musi uku Aloeli musi gowabi mu nkenga wi ligomba la Alinoni na musi gowabii nkati ji ligomba heli mbaka musi uku Gileadi, nga musi wokapi wogwabii nganganganga gotasindwa kugukamula. Bambu Sapanga, Sapanga witu, jutuhenga tujiwesa misi heji. 37Lakini ngasetwahegali mu nndema wa Aamoni au nkenga wa losi lwa Yaboki wala mu misi ju nndema jiitombi wala pandu pokapi pala papupe Bambu Sapanga, Sapanga witu, jatenda kutukanaki.
Currently Selected:
Kukomboka 2: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
