2Samweli 14
14
Yoabu jupanga kunkelabu abusalumu
1Yoabu mwana waka Seluya jwamanyiki kubanga mwoju waka Daudi gubii kwaka Abusalomu pee. 2Ndi jwaatuma bandu ku Tekoa ili buntaputa mmbomba jojubii na malangu. Pabunndeta ampwagila, “Likopakia gubii ni kilelu. Guwata ingobu yukulobalake kilelu, wiipaka mauta ila gulihenga ngati mmbomba jojubii kukilelu sa masoba gingi. 3Ndi gujenda kwaka bambu nkolongu ukumpwagila ganugupwagi.” Ndi Yoabu ampwagila malobi gukumpwagi bambu nkolongu. 4Mmbomba jola juku Tekoa jwajenda kwaka bambu nkolongu japega magoti nukujinama mbaka pai palongi jaka bambu nkolongu nukumpwagi, “Mwa bambu nkolongu pepakoku na nnyangatile.”
5Bambu nkolongu ampwagila, “Gubii na shida boo?” Mmbomba jola jwajibua, “Nandi alomi bangu atei kuwa. 6Nabi na bana akanalomi abeli. Lisoba limu pababia kulungwenza batumbulia kukomana. Na ngasejwabii mundu jokapi jwakwakengale jumu andapula nzaki nu kunkoma. 7Henu alongu bangu boti atei kung'anambuka nepani ntumisi waku, apala naapekia bombi mwana joankomiki nzaki ili bunkoma ndaba junkomiki nndongu waki. Henu bankoma hoju jojuwe ndi nndisi. Ana ahengiki hela biibia ahoiki mwana jonunhobale jojuigali nu nndomi wangu nga bunndeke mwana punndema.”
8Bambu nkolongu ampwagila mmbomba jola, “Gukelabuka kunyumba jaku lijambu laku nilagalakia agujangatia.”
9Mmbomba jojuhuma ku tekoa jola jwapwaga, “Bambu nkolongu wangu ana liipitila likosa lokapi liibia panani jangu nepani na panani ja alongu bangu baatati bangu. Ndienu wehapa nu ubambu ukolongu waku ngamwiikubi nilikosa.”
10Bambu nkolongu ampwagila, “Mundu jokapi ana jugujogwi wanndeta kwangu nepani na ngajwiiki kugusumbu kabete.” 11Mmbomba jola ampwagila, “Pepakoku bambu nkolongu, nandi gunobila kwaka Bambu Sapanga, Sapanga waku, ili nndongu wangu jola jojupala kulepa kisasi sukunkoma mwana wangu jwiihenga likosa lengi likolongu lukunkoma mwana wangu jonge.” Bambu nkolongu Daudi ampwagila, “Nugulapi palongi jaka Bambu Sapanga nga likubi hata lijunzu laka mwana waku limu leliabuka pai.”
12Mbomba jola ampwagila, “Nuguloba nepani ntumisi waku gunyetakalia mbwaga lilobi limu kwaku bambu nkolongu.” Bambu nkolongu ampwagila, “Pwagaje.” 13Mbomba jola ampwagila, “Ndaba jaki henu gupangiki ubaja gongo kwa bandu baka Sapanga?” Kulengana nu kuamu kwaku lijambu heli wamweti, gutei kulitemu kubanga gubii ni likosa, ndaba ngase gunndekake mwana waku jubuja kunyumba kuhuma kojutili. 14Twepani twaboha lasima twiitenda kuwa. Twepani tubii ngati masi gagajitiki pai gaguge ngasegajoleka. Hata Sapanga ngase ngaseampendale mundu jonzo na mundu jongi, ila jwombi julenganake indela ili jwobummbengiki jwiigali kuba mundu jojutilatila.
15“Nepani nhikiki kulonge nawehapa wa bambu nkolongu wangu ndaba atei kunyogo. Ndienu nepani ntumisi waku nawasali, ‘Nambanga nakalongila na bambu nkolongu kwajwiindimisia ganagapala nepani ntumisi waki. 16Pengi bambu nkolongu jwiitenda kunyowane nu kunhoko mu maboku gaka mundu jojupala kungoma nepani pamu na mwana wangu kuhuma mu ulisi waka Sapanga.’ 17Nanepani ntumisi waku nawasalia kubanga, ‘Lilobi laka bambu wangu liimbekia lukwali mu mwojuwango, ndaba wa bambu nkolongu wangu gubii ngati atumi baka Sapanga bukunani guwesa kumanya majambu gaamboni na gilia. Bambu Sapanga, Sapanga waku jubia pamu nawehapa.’”
18Ndi Bambu nkolongu anzibua mmbomba jola, “Winhia lijambu lokapi lenagulalukia.” Mbomba jola jwapwaga, “Pwaga bambu nkolongu wangu.”
19Bambu nkolongu anndalukia, “Boo, Yoabu juhusika mu lijambu hele?” Mbomba jola jwapwaga, “Napa palongi jaku wabambu nkolongu mundu ngakuwesa kujepe upande wa kwamalele au upandi wa kwamangega kupete lijambu legupwagiki wabambu nkolongu wangu. Yoabu ntumisi waku ndi jojundumiki. Jwombi ndi jojumbwagi malobi goti haga ganugupwagi nepani ntumisi waku. 20Yoabu jwahengiki hela ili kubadilisa majambu. Lakini wehapa wabambu wangu gubi na malangu ngati ga atumi bukunani kwaka Sapanga hata guwesa kumanya majambu goha gagabii punndema.”
21Ndi bambu nkolongu ampwagila Yoabu, “Henu gujowana mbia luusa ili gunkelabua kunyumba nkombu Abusalomu jola.”
22Yoabu jwapega magoti nukujinamana mbaka pai nukundobe bambu nkolongu mbenge koni jupwaga, “Lelenu nepani ntumisi waku bambu nkolongu wangu mbatiki uwaamboni palongi jaku ndaba gujetaki kuloba kwangu.” 23Ndi Yoabu, jwaboka nukujenda ku Geshuli kunkelabu Abusalomu ku musi uku Yelusalemu. 24Lakini bambu nkolongu jwapwaga, “Abusalomu jutamaa kutali nanepani, jutama kunyumba jaki. Jwiika nu kumona.” Ndi Abusalomu jwakuba jutama kutali nu kunyumba jaki na ngaseambona bambu nkolongu Daudi.
Abusalomu na bambu nkolongu Daudi atenda kujongana
25Mu Izilaeli joka nga mundu jojwabia junyambiki ngati Abusalomu. Toka mu lwaji yaki mbaka kukimutu saki, Abusalomu ngasejwabia na kasolu jokapi. 26Majunzu gaki gabia gakendiki na jukubika juseku kila saka mala jimu pagakuba malasu na gagatopiki pajugapemika kutopakwaki kwabia kilu ibeli kulengana niipemu ikibambu. 27Abusalomu jabelaka bana atatu akanalomi pamu nu mbomba jumwa lihina laki Tamali. Tamali jwabii kamwali jojunyambiki ngani.
28Ndienu, Abusalomu jwatama mu musi uku Yelusalemu kwa yaka ibeli sanga kubonana na bambu nkolongu Daudi. 29Ndienu, Abusalomu jwaatuma bandu kwaka Yoabu, ili ajenda kwaka bambu nkolongu badala jaki, lakini Yoabu jwatenda kukana. Abusalomu jwaatuma bandu bangi kabee, lakini Yoabu jwatenda kukana. 30Ndienu, Abusalomu jwaapwagila atumisi baki, “Ndinga Yoabu jubii ni lituhi li inganu pa mbipi ni lituhi langu. Nzendania mkalijosa mwotu.” Ndienu atumisi baka Yoabu bajenda kulijosa mwotu lituhi laka Yoabu. 31Yoabu jwajenda kunyumba jaka Abusalomu nukundaluki, “Ndaba jaki atumisi baku ajosiki mwotu lituhi lango?” 32Abusalomu anzibua, “Linga naatuma bandu kwaku ili guhika kongo ili nugutuma kwaka bambu nkolongu ukundalukia, ‘Ndaba jaki mokiki ku Geshule? Kukabiya sapi kwangu kuhigali hoku’. Henu gunyangatia ili nhwesa kumbona bambu nkolongu. Ana mii ni likosa, henu jwakangomaje!” 33Ndienu Yoabu jwajenda kumpwagi bambu nkolongu malobi haga goti, na jwombi ankema Abusalomu, najwombi jwajenda kwaka bambu nkolongu, jwagonila nulutumbu palongi jaka bambu nkolongu. Na bambu nkolongu jwatenda kumbusu Abusalomu.
Currently Selected:
2Samweli 14: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
