1Samweli 10
10
1Ndipala, Samweli jajukua lisupa lisoku la mahuta anzakania Sauli pamutu, anzobatiya nu kumpwagi, “Bambu Sapanga jugujakani mahuta gubia wa bambu nkolongu jukwaalongosa bandu baki. 2Lelenu patwitabukana, wiiketangana na bandu abeli pambipi ni litenge laka Laheli ku Selusa mundema wa Benjamini. Haba bagupwagila kubanga maponda gawabiya gutaputa gapatakini. Atati baku akotwiki kuholale majambu giliponda, ila abii ni kiholu kupete wehapa, bililaluki kila lisoba, ‘Nhenga kii kwa ndaba ja bana bangu?’ 3Kuhuma hapa wiijenda ku nkongu nkolongu uku Taboli, pandu jehapa wiketangana na akanalomi atatu abii mwiindela kujenda kumpiki Sapanga matambiku ku Beteli. Jumu wabu jibiya julongulaki tumbui tutatu, jwa pili jibiya jutotwi mabumunda matatu na jwa tatu jibiya jutotwi kiliba sa divai. 4Bagulamukiya nu kugupeke mabumunda mabeli, nanagu wagajopa kuhuma kwabu. 5Ndienu, pawiihika ku Gibea Eloimu, pandu palibii likambi la alonda buku Filisti, pawibiya uguhegale musi, wiketangana ni likundi la alota. Alota haba bibiya ahuluka kuhuma pandu pukunndumbali Bambu Sapanga koni ahona ihemba ni ilimba na pyelembi ni ing'oma babiya atenda kulondola. 6Loho jaka Bambu Sapanga jaguhikila kwa makili, nanamu wiitumbuliya kulondoo pamu nabombi nukung'anambuka kuba mundu jongi. 7Kipindi majambu haga pagagupitila, sokapi sewiwesa kuhenga wiihenga, ndaba Sapanga jubii pamu na wehapa. 8Winonguliya kujenda ku musi uku Giligali, pandu paniketangana nu kupia matambiku gukutini na matambiku gu lukwali. Winendaliya hapa kwa masoba saba mbaka enihika nukugulangi sukuhenga.”
9Sauli pajang'anambuka ili kunndeka Samweli, Sapanga jang'anambua mwoju waka Sauli. Goti Samweli gaampwagila gapitila lisoba lelele. 10Sauli nu ntumisi waki ebahika ku Gibea, jaketangana ni likundi la alota. Loho jaka Sapanga junhikila kwa makili, na Sauli jatumbuliya kulota pamu na alota haba. 11Bandu babummanyiki Sauli pu utumbuli, pabummbona jutenda kulota, balaluana, “Sindu bo sesumpatiki mwana waka Kishe? Boo Sauli lee najombi ndi jumu jwa alota?” 12Mundu jumu jojabia jutama hoku jalalukia, “Boo atati babu ndi nyane?” Ndienu, gapitila malobi gagapwaaga, “Boo, Sauli lee najombi ndi jumu jwa alota?” 13Sauli pajajomula kulota, jajenda kukitombi pandu pukundumbali Sapanga.
14Atati asoku baka Sauli ejaabona Sauli nu ntumisi jaalalukiya, “Mwakabii kwako?”
Sauli jajibua, “Twapiti kugataputa maponda, na hetwabona ngasegapatikana, twapiti kummbona Samweli.”
15Atati baki asoku baka Sauli bala ampwagila, “Mpepa koku mbwagila sejugupwagi Samweli.”
16Sauli jajibua, “Jutupwagila hotuhotu kubanga maponda gapatakini.” Lakini Sauli ngaseampwagi kubanga Samweli ampwagi jiibiya bambu nkolongu.
Sauli antangasa kuba bambu nkolongu
17Samweli jaakema bandu boti akusanyika palongi jaka Bambu Sapanga ku Mizipa. 18Pabahika jaapwagila, “Bambu Sapanga, Sapanga wa Aizilaeli, jupwaaga ana. Naaboa Aizilaeli kuhuma ku nndema uku Misili, nukuhokua mwanganya kuhuma kwa Amisili na ulongosi gongi gogunkamulaki. 19Lakini lelenu nnganiki nepani Sapanga winu jojunhokua kuhuma mu mang'aliku nu ubini winu, nanamu mpwaagiki, ‘Ngaela, utuhaguliya bambu nkolongu jutulongusa,’ ndienu nkusanyika mwaboti palongi jangu koni mmbiya mu makabila ginu nu lukolu lwinu.”
20Ndienu, Samweli jagapanga makabila goti guku Izilaeli, likabila la Benjamini bilisagula sukulipege gudugudu. 21Jilileta palongi likabila la Benjamini, kulengana nu lukolu yaki, nu lukolu lwa Matili banhagula kwa gudugudu. Mwisu jululeta lukolu lwaka matili na Sauli mwana waka Kishi ndi joanhagula sukupega gudugudu. Lakini pabumtaputa ngasebummbona. 22Bunndalukiya kabee Sapanga, “Boo jubii mundu jongi kabee jojuhika?”
Bambu Sapanga jaajibua, “Hena, jujobiki pikilanda ji misigu.”
23Ndienu, bajenda imbelu, buntaputa Sauli nukunndeta. Sauli pajabiya jujemiki kati ja bandu jabiya nndasu kupeta bandu boti bunhikila mu mabega. 24Samweli jaapwagila bandu boti, “Hajo ndi mundu Sapanga joanhagwi mu bandu boti, ngakuba jokapi jojubii ngati jombi.”
Bandu boti bajamaliya kupwaaga, “Bambu nkolongu jutama yaka yoti.”
25Ndienu, Samweli jaalandila bandu kupete lihengu nu kulongosa kwaka bambu nkolongu, jaandika mu kitabu sesuse jikibeka palongi jaka Bambu Sapanga. Ndienu Samweli jaatabuka bandu boti, kila mundu jujenda kunyumba jaki. 26Ndipala, Sauli pamu na akomana ngondu bababii pu utumbuli Sapanga jagusa mioju jabu, jajenda ku nyumba jaki ku musi uku Gibea. 27Lakini bandu bangi babi ni milomu, bapwaaga, “Boo, mundu hajo juwesa kutuokoa?” Bunndongama Sauli na ngasebumpekia nhupi jokapi. Lakini jombi Sauli ngasejayomike.
Currently Selected:
1Samweli 10: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
