1Samweli 11
11
Sauli jaawesa bandu buku Amoni
1Ndipala, bambu nkolongu Naashi jwa Aamoni, jajenda nu kuuyongolota musi uku Yabeshi Gileadi. Bandu ba musi uku Gileadi bumpwagila Naashi, “Jongana na twepani, natwatu tugutumakiyaje.”
2Lakini ampwaagila, “Niijongana na mwanganya kwi lilaganu limu ana nuntupula lihu luku malele kila jumu winu, ndi niibiya naapoiki lihamu Aizilaeli boti.”
3Aseja buku Yabeshi bumpwagila, “Utupekiya masoba saba ili twaatuma atenga mu nndema uku Izilaeli. Ana nga mundu jokapi jukutuokoa, twalilamisa twabeti kwaku.” 4Atenga bala pabahika ku musi uku Gibea, kojutamika Sauli, balandila majambu gehaga na bandu boti batumbuliya kulela kwa sauti ngolongu.
5Henu Sauli jabiya juhuma ku litui jubii na makambaku gaki, jalalukiya, “Bandu haba abii na kyane? Ndaba jakii atenda kulela?” Bumpwagila majambu gabaleta atenga kuhuma ku Yabeshi. 6Apalapa, Sauli pajajoa majambu haga, Loho jaka Sapanga junhikila kwa makili, najombi jayomiki ngamaa. 7Jajukua makambaku mabeli ga ng'ombi jagasekulana ipandi ipandi, jaatuma atenga apetisa kila pandu pa Izilaeli kupwaaga, “Mundu jokapi jojwisidwa kumpwata Sauli na Samweli ku ngondu, makambaku gaki ga ng'ombi bagasekulana ana.”
Bambu Sapanga jaahenga bandu buku Izilaeli ajogupa ndaba juwesa kuhenga, ndienu boti bapita pamu. 8Sauli jaakusanya Aizilaeli ku Bezeki jabiya na bandu elupu itatu kuhuma ku Izilaeli na bandu elupu selasini kuhuma ku Yuda. 9Sauli jaapwagila atenga bababia atenda kubuja kuhuma ku Yabeshi. “Mwaapwagila ana bandu buku Yabeshi Gileadi. Twaanhokua kilabu muhi lyoba palikuba libala ngani, mwiibiya nkombuliwi.” Bandu buku Yabeshi pabapata majambu haga batoguli ngamaa. 10Bandu ba musi uku Yabeshi bumpwagila Naashi, “Kilabu twalilamisa kwaku na wehapa watuhengila lokapi leulibona laamboni.”
11Lisoba heli ikilu jela Sauli jaabagula bandu mu ikosi itatu. Ekwahika pulukela pajingala mu likambi la Aamoni nukutumbuli kukomana naku. Babanusulika batawanyika liya, wala ngasesabii kikundi sesabii na bandu hata abeli pamu.
12Ndipala, Aizilaeli bumpwagila Samweli, “Abii kwaa bandu babapwaaga Sauli jiikuba bambu nkolongu kwitu twenga? Utuletila bandu haba, natwepani ngiti tutenda kwaakoma.”
13Lakini Sauli jaapwagila, “Nga mundu hata jumu jojakakomika lelenu, ndaba mu lisoba lende, Bambu Sapanga jugukombwi nndema Izilaeli.” 14Samweli jaapwagila, “Tujenda twaboa ku Giligali na kwa mala jengi tukuntangasa Sauli kuba bambu nkolongu.” 15Bandu boti bajenda ku Giligali, na pabahika hoku, bunhimika Sauli kuba bambu nkolongu pandu pukunndumbali Bambu Sapanga. Bumpikia Bambu Sapanga litambiku lu lukwali. Na Sauli pamu na bandu boti buku Izilaeli batogulii ngamaa.
Currently Selected:
1Samweli 11: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
