Hiburuapụ 11

Minini Pa Fịrị Ḅụ Suu

1Minini anịị tẹ́mẹ́kụ́rọ nyána wa ḅụ tọ́rụ́ dighinyẹ ḅụ, wa tẹ́mẹ́ jighe jighegha wamịnị arịgha nyẹ ma ḅụ.

2Minini ḅụ ḅọ́rọ́ olom sáapụ ma Tamuno boma nyánaḅom.

3Minini ḅụ ḅọ́rọ́ anị wa akanyaḅo nyẹ ḅẹ́ tuminikiri gbọrụ ma Tamuno ọrẹ ẹ́gẹ́rẹ́ pa anị tẹmẹm, si mị́sa tuminị árịarị nyẹ ma, nnị tọ́rụ́ pa árịgha nyẹ ma pa anị tẹmẹm.

4Minini ḅụ anịị Ebẹl ḅọ́rọ́ ibiḅaa agbaa mịẹ Tamuno pịrị o numboru owitụ́wọ Keni nẹ́ngị nyẹ. Minini ḅụ ḅọ́rọ́ Tamuno ori ákịm karakárá ibiamịẹnyẹḅọ ḅara. Tamuno o dugho ibimam ori agbaa gosi. Minini ḅụ ḅọ́rọ́ Ebẹl pa ẹ́gẹ́rẹ́arị, ọ fịịmam mḅẹ́sọ.

5Minini anị mịẹsị Enọkụ fịị arịgha nyẹ. Tụ́ma Tamuno o saghị akịm, ori árị ḅo ofori Tamuno osiakịmam gosi. Tọ́ndiri ma dughom ḅẹ, tẹrẹmẹ nnị ori akị, o Tamuno tẹ́mẹ́ miẹḅẹ́lẹ́mam. 6Minini ofori gbẹ́rẹ́ḅọ sọ ine Tamuno tẹ́mẹ́ mịẹḅẹ́lẹ́mabịgha, Tamuno damaḅoarị ḅo gonyẹ́ gonyẹ́ mininibẹm ḅẹ́ Tamuno imi, ori o pịghị ịnyọsua ọ tẹ́ghẹ̄arịapụ gbẹgbẹm.

7Minini anị Nuwa mịẹsị ọ Tamuno birinụ́nụ́ náanyẹ, tórúku ju fịnịnyẹ gbolomanyẹ, ori arịgha nyẹ ọ Tamuno bịpị pughum si mú árụ́ nama, ori na ọ wárị gbọrụ ḅọ́rọ́ ḅọ́rọ́ma nyána ḅara. Anị ḅụ ḅọ́rọ́ tuminikiri gbọrụ gulugulumam, minini ḅụ ḅọ́rọ́ Nuwa karakárá ibiamịẹnyẹ nyánaḅom Tamuno ḅara.

8Minini anị Ebraham mịẹnyẹ sị ọbịpị pughu nyẹ, Tamuno osii sa ḅẹ́ ori ọrẹ sẹ wáriso sị o minini ọ pịrị ama ma mú. Ori ọrẹ ámá warịsom nimigha o muarị anga. 9Minini ḅụ ọ Tamuno minini ọ pịrị ámá ma ḅụ ngam igoniḅọ ḅara. O dii laagha warị ḅụ ngáarị, Aizik na Jekọpụ ngá ḅara, mị gbẹ́rẹ́ mini nyẹ ma nyánáḅoapụ Tamuno ḅara. 10Ebraham anị ama ma kúruarị anị fịnị ḅara, Tamuno anịị anị fịnị ḅara mịẹḅọ pịghị anị nama ḅo, si gbámásó dapịrị pa anị sughu i sẹm.

11Minini anị Ebraham mịẹsị o ḅo daḅọ sọ nyẹ ori opuma olomfáma sa, Sira sọ mịnị ine awọ yiigha. O mininim ḅẹẹ Tamuno ọ mini nyẹ mịẹbẹm. 12Karakárányẹ ḅẹ́ Ebraham fịịmaaḅọ kịkam, mị gbẹ́rẹ́ owitụ́wọ ma ḅụ ḅọ́rọ́ anịị tọghaapụ saghị págháḅo nyẹ ḅálōló sobie bii ḅara, sọ ḅọ́rọ́ posie aka fịnị onwo túminị́ ine kịẹbịgha nyẹ.

13Mịnaapụ mamgba fịịm pa mininiarị Tamuno mini n pịrịnyẹ ma nyánaḅogha sọ, kụ́ma ḅọlọanga nnị anị arịm sị anị datéréma warị dughopágháma kị́nị́mamgba tórúku bẹ nnị ọ́ igoniapụ na asọnwángiapụ tuminikiri. 14Ọkọfịnị nyẹ dughoarịapụ diearị ḅẹ́ nnị nna ḅárákū ama dọghụarị. 15Nnị sịbịbiekiẹ n wáriso sẹ ma pịrịgha n ḅọ́rọ́ sịbịbiekiẹ anị pịrị ọkụ́ma nwọfịnị nnị asọ dọghụ pịghịma sọmam. 16Tụ́ma ibiḅaa ama anị n tọ́rụ́ pa dighiarị nyẹ sobie ama ma. Anịma go Tamuno ḅụgịrịrịgha ḅẹ́ nnị nna Tamuno pa osim, tegó ori ama tẹ́lẹ́ma n pịrịmam.

17Minini anị Ebraham mịẹsị ori o tụ́wọ Aizik pa agbā mịẹ Tamuno pịrị, Tamuno ọrẹ daádighi pa o daa sáá. Ebraham anị Tamuno nyẹ mini pịrị ḅo anị so ọ pa ọrẹ Kpọ́kpọ́ gbẹ́rẹ́ tụ́wọ pa agbā mịẹ dọ́ghụm. 18Tamuno dugho ọ pịrịmam, ḅẹẹ, <<Aizik ḅụ ḅọ́rọ́ anị a dugho ị pịrị awọ ma ḅọ́rọ́ págháḅo ḅẹnyẹ.>> 19Ebraham mininim bẹ Tamuno ine fịị ḅụ Aizik saghịmabẹm. Ẹ́gẹ́rẹ́kọọ ḅara ḅụ Ebraham fịị ḅụ pịghị Aizik nyánaḅom.

20Minini ḅụ Aizik Jekọpụ na Esọ karịibimam tórúku ḅoarị nyẹ gbólómanyẹ gosi.

21Minini anị Jekọpụ mịẹsị o Josẹf awọ mamgba karịibimanyẹ, nimi sa ḅẹ́ ọrẹ fịị sa kikiamam, ori ọrẹ mgbara ḅụ sẹghẹrẹrẹm sị Tamuno tẹ́ghẹ̄m.

22Minini anị Josẹf mịẹnyẹ ori fịị kikia sa, ọ warị Izirẹlịawọ nna soo Ijipiti ḅụ gbolomanyẹ dugho, ọ pịghị bịpị pịrịm nnị ori mgbe mịẹbẹ ḅara.

23Minini anị Mosis nyingiḅọ na daḅọ mịẹnyẹ, nnị o yii fama sa tẹ́rẹ́ akalụ́ nnị ọ pa ḅọghum nnị arịm ḅẹ́, ori ọ́ ibi tụ́wọ, anịma go n balagha sị ámányánáḅọ ma ólóghó ma kaa.

24Minini anị Mosis mịẹ nyẹ́, o ḅo sẹnị sa, o minigha sị n Fero ndụ́ḅa tụ́wọ pa ọ sịị. 25Ọ balagha Tamuno túminị́ na tọ́rụ́siarị, tụ́ma ọ kẹ́lẹ́ sii ḅẹ́lẹ fịị bẹ na karagha. 26O mininim ḅẹ́ wirinumo daa Mesaya ma ẹ́rẹ́, sọ́nyẹ so Ijipiti ḅụ fịnị ngọ mamgba nẹngịm. O tọ́rụ́ pa tórúku ḅoarị sọ́nyẹ ma dighiarị.

27Minini anịị Mosis mịẹsị ori Ijipiti wáriso nyẹ ámányánáḅọ ma bieoḅu dighi ḅáláfagha pa. Ọ mini ọḅụdagha sọ ḅọ́rọ́ ọ tọ́rụ́ pa n tọ́rụ́ pa árịrịgha Tamuno ma arịm. 28Minini anị ọ mịẹsị Sáḅáḅọ́rọ́ Álálị ma kórómanyẹ, sị bịpị pịrị ḅẹ́ nnị ọmbịnyẹ́ ma pa ḅụ́pọ́ ma ḅụ sánị sị fịị sookumuḅọ ma Izirẹlị parị owiapụ awọ ḅábịgha ḅara.

29Minini anị Izirẹlịawọ ma mịẹsị nnị Ányị́nyá tọ́rụ́ ma saḅa nyẹ, sámụ́nọ́ kiri ọgọnọ ḅara. Ijipitiapụ ma ḅụọ sua dọ́ghụm kụ́ma mingi ma nnị mẹnị akịm.

30Minini anị mịẹsị Jeriko gbiri ikelekelé onu ma soghoro kórónyẹ Izirẹlịawọ anị nwángị ikelekele sáá sọ́nọ́ma dii.

31Minini anịị Rahab sẹfị́ ọ́rụ́ḅọ warị sị nnị a ḅagha nyẹ, Tamuno bịpị pughughaapụ ma ogbobie tegó árị ámá ma furuapụ ma datérémam.

32A pa dugho ma dugho ma muu, sáá ofori sị a ḅo Gidiyọn, na Barak, na Samsin na Jefta, na Deviti, na Samuwẹlị na pịghị ikiakoroapụ ma. 33Minini ḅụ ḅọ́rọ́ nnị ọ́mụ́ pa sẹ́ sẹ́ sẹ́ gbim sị pịghị n sọọḅa, n karakárá nyẹ́ ma mịẹm si Tamuno minini nyẹ ma nyánaḅom, n ḅara pa ọkụ nama bịpị gbẹm. 34Nnị gbagba kọrịfịnị biimam, ḅara pẹ́lẹ́ma mangị so sị áláápụ́-ágidi fịị gosi n ḅo ịnyọfaapụ dighim, kụ́ma ḅo kụ́rọsẹm, n kụrọm ọ́mụ́gbi ḅụ, n pịghị jẹ́ ámá ọ́mụ́gbiapụ Sọ́ḅa. 35Minini ḅụ ḅọ́rọ́ ẹ́rẹ́ámáapụ nna awọ fịịapụ nyánaḅom fịị ḅarabie, isiapụ mịnị ḅụ́nyana daákịgha gosi tọ́rụ́siarị ḅụ fịịm, sị nnị saghị tụ́ma duma sọ bẹ ḅara. 36Nnị n ḅụ jẹ́apụ kombom, jẹ́apụ fom, jẹ́apụ nnị nna ḅụọ na n ḅara fịnam sị jẹ́apụ pa ịkóli bie sua. 37Nnị mgbọ́lụ pa n gbim, nnị akanị kọapụ agidi pa n pa mmẹẹ́ diem, nnị áláápụ́-ágidi pa n gbogboḅam, n nwángị ikelekelearị ánáná anịgha oḅori apara sua oju ḅụ, simini, nnị n pa tọ́rụ́siarịmam pịghị nna mbásịm. 38Tuminikiri ma nnị na ibighaa, nnị ikélekélem biaapụ ḅara, elesiri ḅụ, na pịghị tụ́ndụ́ ọgọnọ, olulu tụ́ndụ́ bie na olulu kiribie.

39Mịnaapụ ma n túminí nyánaḅom nna minini ḅụ ḅọ́rọ́, kụ́ma Tamuno minini n pịrịnyẹ ma n nyánaḅogha. 40Tegó Tamuno ibi mịma nẹ́ngịma nyẹ warị wa pịrịmam, ḅẹ́ wamịnị na nnị ná anị nnị nna ḅụ mịẹ kpainmabẹnyẹ.

Currently Selected:

Hiburuapụ 11: IBY

Highlight

Copy

Compare