Hiburuapụ 10
10
Krais Igwagwaá Gbẹ́rẹ́sa Ákị Mú Kunema Láa
1Mosis ólóghó ma anị ḅoarị nyẹ ma tẹ́mẹ́ kịkam mị nyẹ ma ibinyẹ ma anịgha, tegó anị ine túminị́ duaḅọ́rọ́magha nna sii ḅụ. Kụ́rá gonyẹ́ gonyẹ́ ḅụ n gwarị igwaa ma anị pịghị ine Tamuno damaḅoapụ ma mịẹ fịafịamagha. 2Ḅọ́rọ́ Tamuno tẹ́ghẹ̄arịapụ ma nnị n sịrị simam nna sii ḅụ sii mịnị ḅẹ́rẹ́si pa n pịrịbịgha, igwagwaá ma so kunemabẹm. 3Anị fịnị ḅara, kụ́rá kụ́rá igwaa ma mịẹsị túminị́ nna sii pa biekórómáarị. 4Nambulo na oḅori ọmbịnyẹ́ jẹ́ éné jẹ́ éné ine sii sịrị sibịgha. 5Mịma go Krais tuminikiri ḅo dọghụ sáá, o dugho Tamuno pịrịm ḅẹẹ,
<<Ịrị igwagwaá na agbā mịẹbịgha
tụ́ma ịrị ojumẹnị tẹ́lẹ́ma i pịrịmam.
6Nnị dọ́ghụ́ma igwaa ịḅụ ḅẹlẹgha
anịgha sii sịrị si bẹ igwaa.
7Anịsáa, a warị ḅẹẹ, <Mịị irị,
a ḅo ị tọ́nyẹ miẹbim ị Tamuno,
n pịghị anị gịẹ kóróma i pịrị ḅara ologho ábálálá ma bie.> >>
8Parị o dughom ḅẹẹ, <<Ịḅụ ḅẹlẹgha, I pighi igwaa na agbā mịẹ anịgha n dọ́ghụ́ma igwaa na pịghị sii sịrị si bẹ igwaa ḅẹlẹmagha. Ọ mịma dughom nimitẹ́lẹ́ma bẹ́ mị igwaa ma nnị anị gwam ólóghó ma bie anị fịnị ḅara.>> 9Anịsa ọ warị ḅẹ, <<Mịị ịrị, ị Tamuno, a ḅo ị tọ́nyẹ miẹbim.>> Tamuno warị olom igwaa ma kaasi, sị Krais gwaa igwaa ma pa nna kiriakị. 10Jizọs Krais Tamuno o ḅara binyẹ mịẹm gosi wámịna sii ḅụ, n wa sịrị simam, ori ọḅụ pa gwaa igwaa gbẹ́rẹ́sa, sámámgba pịrị.
11Juuapụ igwagwaḅọ gonyẹ́ gonyẹ́ ọrẹ fịrịnwangị nwángịm éné mamgba sị pịghị gbẹ́rẹ́ igwa ma gwaa tọgha tọgha sáá ḅụ kụ́ma mịná igwaa ma sii sịrị siigha. 12Krais gbẹ́rẹ́ igwagwaá sii gonyẹ́ gonyẹ́ pịrịm, kụrọ sẹ mú ḅẹ sa ḅẹ sa la, anịsa ọ warị kpọrọfịnị Tamuno ma ámáḅara angaá. 13Anị angaá ọ warị saghị kúru sị Tamuno ọrẹ a iruonaapụ pa ọri ḅụọ gbananyẹ mịẹ. 14Gbẹ́rẹ́ igwa ma anịị o pa nnị mịẹ fiafiama mú gbámásó la nyẹ n sii sịrịsiapụ nna ḅụ.
15Tọ́ntọ́ Tẹ́mẹ́ ma pịghị ọri onyẹ́sẹ wa pịrịarị parị ọ ḅẹ́m ḅẹẹ,
16<<Mịị anịị a nnị na fị bẹ ọḅọọ ḅoarị sa ḅụ
anịị Kị́nị́nyánáḅọ dugho ḅara.
A ị́yẹ́ ólóghó pa n tẹ́mẹ́bie suabẹm
pịghị anị gịẹ nna kúkúbie.>>
17Ọ warị pịghị ḅẹ́,
<<A mịnị nna sii na nna siiamịẹnyẹ
pa biekórómabịgha>>.
18Nnị siiḅụḅárási mịnaapụ ma pịrịmaá sáá tumḅọ mịnị siiḅụḅarasipịrị igwaa bibieghaa.
Wa Sọma Tamuno Damaḅoo
19Anịgo, ịyẹa mịnaapụ wamịnị mị́sa ine Opu Tọ́ntọ́ḅa Yọ ma sọmubẹm Jizọs fịị ma gosi, bẹnyẹ bẹnyẹ wamịnị ọ́lọ́gha pa. 20Ori ịwọ asọ findi wa pịrịm, dumafịnị asọ, ḅụpọgbe bịtẹ ma ḅụ ḅọ́rọ́, anịị ori ojumẹnị. 21Wamịnị opu igwagwaḅọ nyánam Tamuno wárị ma bie sịbịdaḅọ. 22Anịgo wa ibi kúkúbie na karakárá minini pa sọma Tamuno fịnị angaá ḅo, pịghị nnị ibima sịrị maá ḅẹ́rẹ́ḅarasi kúkúbie na pịghị n fíafía mingi pa sịrịmaa oju. 23Wa ibiḅara pa wa dugho págháma tọ́rụ́ dighinyẹ ma ọlọ, wa nimi sa ḅẹẹ Tamuno ọ minini nyẹ ọ mịẹbẹm. 24Wa jụghọ jụghọ bala pịghị ḅárásua jụghọ jụghọ pịrị, ḅẹlẹma diepágháma pịghị ibinyẹ mịẹ. 25Wamịnị wámịna kobiri ma pa ọḅụ gbima, jẹ́apụ mị́sa mịẹarị ḅara, kụ́ma anị ibim ḅẹ́ wa jụghọ jụghọ mịẹ kụrọma tẹ́lẹ́ma, wa nimi sa ḅẹẹ Kị́nị́nyánáḅọ ma éné kịkịaarị.
26Sii siri si bẹ́ igwaa mịnị oforibịgha, wa karakárá ma nimifama sa, wa warị pa biri inighima sị siinyẹ mịẹarị. 27Tụ́ma kọnyẹ́, mamgba wa ḅáláfa ḅụ ḅoarị ḅẹ́rẹ́kọ siri ma pịghị Tamuno osighaapụ dọ́ghụ́ma bẹ gbagba kọrịfịnị ma kúru. 28Mosis ólóghó ma kóró ḅo gonyẹ́ gonyẹ́ nnị mmẹapụ na tẹ́rẹ́ onyésẹapụ nyáná nyáná n ḅẹ́rẹ́pẹlẹm n sịbị sị n timiḅá tọ́rụ́kụrụkụ́rụ́ nyanagha ḅara. 29Anị tọ́rọ fịnị n pịrịbẹ, Tamuno Tụ́wọ ma dighisima ḅọ? Si ori ọmbịnyẹ́ ọḅọọ ma pa papanyẹ mịẹ, sii ḅụ n siri pághámaḅo nyẹ, tọ́rụ́kụrụkụ́rụ́ Tẹ́mẹ́ ma wiri ḅọ. Sịbịbie kịẹ anị pịrị n ḅo árị bẹ tọ́rụ́siarị la bẹ ḅara. 30Wa kọkọ nimi dugho ḅo, <<Sughubi inyee, a sima gbẹ́bẹm,>> pighi ḅẹẹ ḅo ḅẹẹ, <<Kị́nị́nyánáḅọ ọrẹ a túminị́ sịbị ḅẹ́rẹ́kọbẹm.>> 31Mịị opu ḅáláfama nyẹ ḅẹ́ tumḅọ bịghị dumafịnị Tamuno ma ḅarabie sọ.
32Biekóróma, parị anị ọ́ nana fịnị ḅara, anịsáa ma ḅụ Tamuno baá bia ḅo o láa sáá, o tọgha tọ́rụ́siarị arịm, kụ́ma mịnanyẹ mamgba o fughugbigha. 33Jẹ́ sáá imi, ámáogbo anịị nnị o wiri sị pịghị ọmịnị mbasị, jẹ́ sáá ọ pịghị ọ ḅụ pa nwọfịnị sii árịarịapụ ma na gbolomam. 34Ọ pịghị ikólinaapụ dua tọ́rụ́siarịm nnị pịghị ọmịna ngọ kaakị sa, ọ pịghị bieḅẹlẹ ḅara pa ọmịna faá ma akịm, tegó o nimim ḅẹ́, ọmịna nyẹ ma nẹ́ngị nyẹ nyánam, pịghị fịnị mú gbámásó láa ḅẹnyẹ.
35Ọ mịnị ọmịna biekpọma pa ngúmá ma tegó anị opu gbẹ́nyẹ pa ḅo ḅom. 36Í ingịrịma nyáná na ibim, si ị ine Tamuno tọ́nyẹ mịẹbẹ ḅara, si o minini nyẹ mamgba nyánáḅoo. 37Tọ́ndiri ma dugho ḅara ḅụ ḅẹẹ,
<<Kálá sáátụọ kọọm,
si ḅoarị ḅo ma ḅobẹm,
ọ sa ngumabịgha.
38Ị́yẹ́ karakárá ibiamịẹnyẹ túminị́ minini pa dumabẹm,
kụ́ma ḅọ́rọ́ ọḅụda ḅọ fịnịfịnị
i tẹ́mẹ́ n ḅo dighi ḅẹlẹbịgha.>>
39Wamịnị pịghị ọḅụdada sị mú faá bẹ apụgha, tụ́ma wa minini nyánam si dụaḅọ́rọ́ma nyánáḅoo.
Currently Selected:
Hiburuapụ 10: IBY
Highlight
Copy
Compare
Share
Want to have your highlights saved across all your devices? Sign up or sign in
©2024 Luke Initiative for Scripture Translation
