Ẹ́fịsọsapụ 6

Awọamaapụ Nyingiapụ Na Daapụ Na Ngaa Bẹ Ḅára

1Awọamaapụ anị ọmịna kiri, mininiapụ ḅara ḅẹ́ ọmịnị ọmịna nyingiapụ na daapụ bịpị pughu, tegó mịma anịị karakárá sị ọ miẹnaibi nyẹ. 2<<Kuu pa ọmịna daa na ọmịna nyingi pịrị,>> anịị parị ologho ma pịghị gbẹ́nyẹ nyánányẹ: 3<<Nyẹ gonyẹ́ gonyẹ́ ibi ọ pịrịbẹ ḅara ọ pịghị nangwọ duma nyáná bẹ ḅara tuminikiri.>> 4Daapụ na nyingiapụ na, o si ḅara pa ọmịna awọ na ngaáma nnị mịẹbẹnyẹ sị n bie ákụ nyáná ọ pịrị. Anịmanakaragha, kóróma bịpị ḅụ na Kị́nị́nyánáḅọ ma dienyẹ ḅụ n siḅe pághámaḅo.

Ómóniapụ Nna Nyánáapụ Na Ngaa Bẹ Ḅara

5Ómóniapụ ọ ḅáláfa na osigha pa tuminikiri ọmịna nyánáapụ dughonyẹ mịẹ, pịghị fíafía tẹ́mẹ́ pa anị mịẹ, sọ́ḅọ́rọ́ ọ fịrịnwangị Krais pịrịarị. 6Ọ mịma mịẹma nnị tọ́rụ́ pa o dighiarị sa ngéré, tegó ọ dọ́ghụm ḅẹ́ nnị ibi ẹrẹ pa ọ sị, kụ́ma ọ mịnị ọ tẹ́mẹ́ gbọrụ pa Tamuno dọghụnyẹ mịẹ, Krais ómóniapụ ḅara. 7Ómóniapụ ḅara, ọ bieḅẹlẹ pa ọmịna fịrị nwángịị, so ḅọ́rọ́ ọ fịrịnwangị Kị́nị́nyánáḅọ pịrịarị, túminị́ ngéréghaa, 8tegó o nimim ḅẹ́ Kị́nị́nyánáḅọ gbẹ́nyẹ pa ọ́rụ́ḅọ ọ́rụ́ḅọ gbẹ́bẹm, ómóniḅọ anịgha furotụ́wọ, n ḅọ nwángị ibifịrị ḅụ.

9Omoni nyánáapụ anị gbẹ́rẹ́ ḅara ma pa ọmịna ómóniapụ na ngaa, mịnị nna ẹ́rẹ́ma ma. Biekóróma ḅẹ́ ịrị na ị́yẹ́ ómóniapụ ọ gbẹ́rẹ́ Nyánáḅọ nyanam sobie ḅẹ́rẹ́kọ kị́nị́mamgba sịbị ḅẹ́rẹ́kọ bẹḅọ tọ́rụ́kụ́ghaa pa.

Tamuno Ọ́mụ́gbinyẹ Mamgba

10Kunema ḅụ, ọ kụrọ sẹ Kị́nị́nyánáḅọ ḅụ, na pịghị ọ ḅụ fịnị opu ịnyọ ḅụ. 11Tamuno pa ọ pịrị ọ́mụ́gbinyẹ mamgba sua kárámá ọmịnị ine sẹ kụ́rọ bẹ ḅara ẹ́kpẹ́dua ori epele ma ti bẹ sáá. 12Tegó wámịna ọ́mụ́gbi ma, wa tuminikiriapụ na anị gbighaa, kụ́ma, sobie ju fịnịị sitẹ́mẹ́, táarịapụ, kụrọnyanáapụ na pịghị kánákáná tuminikiri ma bie fịnị opu kụrọ nyáná sitẹ́mẹ́. 13Anịgosi Tamuno ọ́mụ́gbinyẹ mamgba sua mị́sa! Anịsáa, sii éné ma ḅo sáá ọmịnị ine iruonaḅọ ma ọ́mụ́ dasemabẹm ọ pịghị ọ́mụ́ ma gbifama sáá ọmịnị ine kụrọsẹbẹm.

14Anịgosi ọ tẹ́lẹ́ma fịnịị, karakárá ẹ́gẹ́rẹ́ pa ọmịna kundu kpọọ dii mịẹ, karakárá ibiamịẹnyẹ pa ọmịna kúkúbie gbẹ́ẹ̄ ẹ́fẹ́rẹ́ mịẹ, 15ọmịna sua agbaa ḅara ọ tẹ́lẹ́ma sị diin akuoarị ibi oku ma dugho wásáma bẹ ḅara. 16Sámámgba minini pa ágbọ mịẹ, anị ḅara ma ọmịnị ine ẹ́kpẹ́dua ma tẹ́ ẹbẹlẹ kọrịfịnị ma bimabẹm. 17Dụaḅọ́rọ́ma daakị sịbị ḅụ sua ọ́mụ́gbi suu ḅara. Pịghịị Tamuno ẹ́gẹ́rẹ́ ma akị ḅẹ́ mịị Tẹ́mẹ́ ma pa i pịrị áláápụ́-ágidi. 18Tẹ́mẹ́ ḅụ tẹ́ghẹ̄ kọọ sámámgba tọ́rụ́kịrịkị́rị́ tẹ́ghẹ̄ na nyẹ́bi tẹ́ghẹ̄ kọọ. Mịma dighi tẹ́mẹ́bie, sámámgba tẹ́lẹ́ma fịnị tẹ́ghẹ̄ tọ́ntọ́apụ mamgba pịrị.

19Pịghị tẹ́ghẹ̄ i pịrị ḅẹ́ a bịpị findi sa gonyẹ́ gonyẹ́ ori oku pa i pịrịbẹm sị a ḅáláfaghaa ḅara ḅụ, a ine ibi oku ma ḅụ ḅọghunyẹ dugho wásáma bẹ ḅara. 20Mịị ibi oku ma gosi, ịrị sẹ oku muḅọ kụ́ma mị́sa ikóliwarịbie a imim. Ọ tẹ́ghẹ̄ i pịrị ḅẹ́ a ine ḅáláfagha ḅara pa ibi oku ma dugho wásámabẹm anị ḅụ́gbẹ́ ḅara.

Kunema Sịbịpị

21Tisikọs, wámịna ibi numboru pịghị sẹ́kụrọ Kị́nị́nyánáḅọ fịrịnwangịḅọ nyẹ gonyẹ́ gonyẹ́ dugho ọ pịrịbẹm o nimi bẹ ḅara a fịnị ḅará na a nwángị kọọarị ḅara. 22Mịma goo anịị a go ọ fịrịma ḅo ọ pịrịarịnyẹ, o dugho ọ pịrịbẹ ḅara wamịnị kị́nị́mamgba nwángị kọọarị ḅara sị ọ pịghị ọ tẹ́mẹ́bie mịẹ kụ́rọ́ma bẹ ḅara.

23Diin na ḅẹlẹma na minini Tamuno Daḅọ na Wányánáḅọ Jizọs Krais ḅara ḅo nyẹ fịnị wa jẹa mininiapụ ma pịrị. 24Tamuno tọ́rụ́kụrụkụ́rụ́ fịnị kunema nyanagha ḅẹlẹma pa wámịna Nyáná ḅo Jizọs Krais ḅẹlẹmaapụ pịrị.

Currently Selected:

Ẹ́fịsọsapụ 6: IBY

Highlight

Copy

Compare