Fịrị Ḅara 28

Pọl Malita Ama Bie

1Nyẹ́ wa laagha pa wa kiri ọgọnọ tándị sáá, wa ḅo nimiḅom ḅẹ́ Malita anịị ogbosúányẹ ámá ma ẹ́rẹ́. 2Ánị ngá fịnị túminị́ ma opu ḅẹlẹma pa wa diem. Iti saghị kórómam, éné ma sọ́ pịghị oḅuum, nnị warị fịnị tọnọ wa pịrị sị wa timi. 3Pọl sanga kobirịarị ọ pa fịnị ma bie sua, anịị gbẹ́rẹ́ sii ododó fịnị ọwụ ma go págháḅo sị ọ gbọ ḅólo ọ ḅara. 4Anị ngá ngaapụ ma ododó ma arịm ọ ḅara ọgọ́nọ́ sololo fịnịarị, n warị jụghọ jụghọ ḅẹẹ, <<Mị owitụ́wọ ma ori kị́nị́ ḅá ḅáḅọ́ gbarịbịgha, karakárányẹ ḅẹ́ ọ tọ́rụ́ ḅarabie págháḅomam, kụ́ma ọ mịẹ siiamịẹnyẹ minibịgha sị o duma arị so ma pa oduaarị.>> 5Kụ́ma Pọl ododó ma gugu fịnị ma bie suam gbẹ́rẹ́nyẹ sọ ọ laagha ḅara ḅụ. 6Nnị warị saghị kúru ọ sughu bẹ ḅara, anịgha sóghóro kóró fịị, kụ́ma nnị opuma kúru fama sáá, nnị arịm ḅẹ́ ḅẹnyẹ ḅẹnyẹ ọ laagha, anịị n tẹ́mẹ́ dima nyẹ, n warị saghị dugho ḅẹ́ mị ḅọ ma, <<Ori ọ́ oru.>>

7Anị ngaa ma ḅọlọgha Pubiliyọs ámá ma Amadaḅọ ma nyáná jẹ́ kiri ḅụ. Ọ warị ibiḅara pa wa dakóróma, tẹ́rẹ́ a dii gbọrụ wamịnị ori igoniapụ. 8Pubiliyọs daá múnonyẹ ọ́gọ́nọ imii, obikiri, ọfịrị na fúro sara na. Pọl warị ọ fịnịbie ma somuu, warị tẹ́ghẹ̄ sị ḅara pa ọ ḅụ gbánā sị ọ gwọọ. 9Nwọfịnị nyẹ pághá sáá, obiapụ mamgba ogbosúányẹ ama ma bie ọ damaḅom sị pịghị oju gwọọ nyáná ḅo. 10Nnị tọgha tọgha nyẹ die wa pịrịm, wa ḅo pịghị árụ́ si sáá, wa binyẹ gonyẹ́ gonyẹ́ wámịna muunyẹ ma ḅụ nnị pá árụ́ ma bie suam.

Malita Ákị Muu Rom Láa

11Tẹ́rẹ́ akalụ́ ḅo ḅọ́rọ́ sáá, wa sua sim Alegizandara bie, <<Nnị kịka mmẹẹ́ a tamuno,>> pa si árụ́ bie, sọma sị oḅuu sáá ma fama. 12Wa Sirakuse opu ama lam, warị anị ngaa tẹ́rẹ́ a dii fịnị. 13Anị ngaa wa sua pághá muu Regiyum opu ama lam. Éné ḅáanyẹ ma anịị fọ́rụ saghị fie nyẹ ọḅụdụ, mmẹẹ́ a dii ḅụ wa ḅo Putioli ama lam. 14Wa ḅo anịị ngaa jẹ́ mininiapụ na dona, ḅẹapụ ḅẹẹ, wamịnị nnị ná sọ́nọ́ma dii la nyẹ fịnịị. Anịị wa warị ḅọ́rọ́ Rom láa ḅara. 15Rom ḅụ fịnị mininiapụ ma, wa gbolomanyẹ naam, warị anị ḅọlọ angaá ma ḅoo Apiyọs Fẹ ama ma, na pịghị Tẹ́rẹ́ Ịnyọ́sárá Wárị saghị ḅo wamịnị na dona. Pọl nna árị sáá, ori ịmịẹḅam pa Tamuno ḅẹm, anị warị opuma ịnyọ pa ọ ḅụ sua.

Pọl Ibi Oku Ma Dugho Wásámam Rom Ḅụ

16Wa Rom láa sáá, n Pọl warisom sị ori ngéré ọ ḅara na ngaa, gbẹ́rẹ́ ọ́mụ́gbi ḅo ngéré okuru.

17Tẹ́rẹ́ a dii ḅo ḅọ́rọ́ sáá, Pọl ámá má bie Juu sịbịdaapụ ma sii kobirim, nnị kobiri fama sáá, ọ warị n ḅẹẹ, <<I jẹa Izirẹlịapụ, tụ́manyẹ ḅẹẹ, a ḅẹnyẹ ḅẹnyẹ pa wámịna túminị́ mịẹgha, anịgha wámịna mịẹ mịẹnyẹ, wa daḅonyẹ wámịna tádọ́apụ ḅara, nnị i pa ikólinaḅọ mịẹm Jerusalem ḅụ nnị warị i saghị Romapụ ma ḅárábie sua. 18Nnị ḅẹ́rẹ́ pa ị gbíla fama sáá, Romapụ ma i wárịso dọ́ghụm, tegó nnị arịḅom ḅẹ́ a mịẹnyẹ ofori fịị na gbẹ́ẹ̄ nyẹ. 19Kụ́ma Juuapụ ma minigha gosi, anị a ị́yẹ́ ḅẹ́rẹ́ ma pa Sẹ Táaḅọ Siza tórúku ḅo nyẹ, tụ́manyẹ ḅẹ́ a gbẹ́rẹ́nyẹ so nyánágha a dugho pa ịyẹa túminị́ bịpị pụ́nụ́ma bẹnyẹ. 20Anị a go bii nyẹ ḅẹ́ a ọmịnị arịị sị ọ nana ẹ́gẹ́rẹ́kọọ. Karakárányẹ nwọpa anịị nnị ịkóli pa i ḅárásua nyẹ, ori ma gosi, wámịna túminị́ Izirẹlịapụ ọ ḅụ tọ́rụ́ dighinyẹ nyánáḅọ.>>

21Nnị warị ọ ḅẹẹ, <<Na wa ị gboloma ábálálá nyánaḅogha Judiya ḅụ, anịgha wámịna túminị́ gbẹ́rẹ́ḅọ sọ anị ngaa saghị ḅo sị ị gboloma sii ẹ́gẹ́rẹ́kọọ ḅo sọ ofori. 22Kụ́ma wamịnị ị bịpị náa dọ́ghụm, ị tọ́rọ́ pa anị arịị, ḅẹ mị ogboapụ ma gbólómanyẹ, wa nimim ḅẹ́ ngaamamgba anị dughosima anịị nnị anị dughosimaarị nyẹ.>>

23Nnị warị pịghị éné pẹ́lẹ́ ọ pịrị, nnị pẹ́lẹ́ éné ma ḅụ n pịghị ibiḅara pa ḅom ọ fịnịngaa ma ḅụ sị dedebie akị mú ḅupiri láa, ọ sanguma so amadakiri ẹ́gẹ́rẹ́ ma dughofindi n pịrịm, ọ pịghị asọ dọ́ghụm nnị Jizọs gbolomanyẹ akanyaḅo o Mosis ólóghó diri ma na ikiakoroapụ ma gịẹnyẹ goo n pịrị ḅara. 24Jẹapụ tẹ́mẹ́ dimam ọ kọọ ẹ́gẹ́rẹ́ ma gosi, kụ́ma jẹapụ mịnị anị mininigha. 25Nnị warị sọọ, nụná nna bie ḅu, Pọl mị gbẹ́rẹ́nyẹ ma dugho fama sáá ḅẹẹ, <<Dighi Tọ́ntọ́ Tẹ́mẹ́ ikiakoro Aizaya ḅụ ḅọ́rọ́ ẹ́gẹ́rẹ́kọọ ọmịna tádọ́apụ pịrịm, ọ ḅẹ́ sáá ḅẹẹ,

26<< <Mú dugho mịnaapụ ma pịrị:

O pughubẹm kụ́ma ọmịnị akanyaḅobịgha;

ọ tọ́rụ́ pa dighibẹm, kụ́ma ine arịbịgha.

27Tegó, mịnaapụ ma tẹ́mẹ́

mịnị nyẹ akanyaḅogha.

Nnị pịghị nyẹ pa nna biri timi pụ́mámam,

pịghị n tọ́rụ́ gbẹ́ẹ̄.

Nnị ọkọ fịnịgha, nna tọ́rụ́ nyẹ árịbẹm,

nna biri nyẹ naábẹm

nna tẹ́mẹ́bie akanyaḅo nyánábẹm,

nnị pịghị i dámáḅobẹm. Mị Tamuno dughonyẹ, ḅẹ́ a pịghị nnị gwọọbẹm.> >>

28Pọl dughofamam warị ḅẹẹ, <<O nimim ḅẹẹ, Tamuno dụaḅọ́rọ́ma oku ma, nnị pa Juughaapụ ma fịrịmam. Nnị pịghị anị pughubẹm!>> [29Ọ mịná ẹ́gẹ́rẹ́ ma kọọ faá ma sa, Juuapụ ọ wáriso sọm sị opuma nụná nyána nna ogboku bie.]

30Mmẹẹ́ a kụ́rá ḅụ Pọl ori ḅara na ọkọọ wárị ḅụ ngaam, anị ngaa anị ọ fịnị sị ọ damaḅoapụ mamgba dakórómáarị ngaa. 31Ọ Tamuno so amadakiri gbolomanyẹ dugho pághámam, pịghị Jizọs Krais gbolomanyẹ pa túminị́ die, pịghị ḅáláfaghaa ḅara na kikigha ḅara pa ẹ́gẹ́rẹ́kọọm.

Currently Selected:

Fịrị Ḅara 28: IBY

Highlight

Compare

Copy