Fịrị Ḅara 27

Pọl, Rom Muum

1Nnị ḅo minini sáá ḅẹ́ wa sua pághá Ịtalị muu, n jẹ́ ikólinaapụ na Pọl na sághị Juliọsi ḅarabie suam, ori anịị, <<Sịbịdá sẹ táarịḅọ ọ́mụ́gbiapụ pa sịapụ ma pịrịm.>> 2Wa muu árụ́ ḅụ́lọm Adramitiyum ḅụ lụḅa sii sị Esiya ḅẹrẹtọ ngása fịnị ámá tọ́rụ́aka ḅụ fịnị ámá agbáá, wa wárii suasi. Aristakọs Masidoniya bie fịnị Tẹ́salonaika ḅụ saghị ḅoḅọ wamịnị ná imii.

3Anị ḅụ éné ḅáā wa Sidọn ḅụ dọghụ sọmam, Juliọsi Pọl ḅẹ́lẹ́mam, ọ warị o wáriso sị ọ muu ọrẹ nángwọ́apụ dighii, sị nnị o binyẹ dọghụ ọ pịrịị. 4Wa warị anị ngaa árụ́ si, kụ́ma fọ́rụ ma wamịnị na kuragha gosi, wa warị Saiprọs ogbosúányẹ ámá ma, isi párángáa ḅụ ḅọ́rọ́ fọ́rụ ma kụrọgha ngaa. 5Wa warị Silisiya na Pamfiliya tọ́rụ́ saḅa sị ḅo Mira láa, Lisiya ama bie. 6Anị ngaa anịị ọ́mụ́gbi sịbịdaaḅọ ma warị Alegizandiriya saghị ḅo árụ́ árịnyẹ Ịtalị múuarị nyẹ, ọ wárị wa pa árụ́ ma bie sẹ.

7Kẹ́lẹ́kẹlẹ anịị árụ́ ma nwángị nyẹ tọgha dii ḅụ, wamịnị opuma tụ́ḅụrụ dam gosi kunema wa ḅo Knidọs tọ́rụ́aka lam, fọ́rụ ma mịnị minigha wa tórúku muu, wa warị Krete ogbosúányẹ ama ma ọḅụju ḅọ́rọ́ fọ́rụ ma opuma kụrọgha angaá, warị anị ngá ḅọ́rọ́ mú Salmọnị pa sị ogbosúányẹ ámá ngása ḅọ́rọ́. 8Wa kiri na kikia fịnịm, ḅụ́da ḅara ḅụ anị wa ine ḅo Árụ́ fafagha árụ́ sọma ngaa pa sị ngaa láa, anị ḅọlọgha Lasiya ama ḅụ.

9Wamịnị anị ngaa opuma sáá ngúmá wárii sị anị ḅo gbẹ́rẹ́sa lam sị mú nyẹ ma mịnị tẹ́mẹ́ kụ́rọ́maágha, ḅurukụ́ma tẹ́ghẹ̄ kọọ sị Igwagwaá Sii Pịrị Éné ma sọọ ḅọ́rọ́mam. Pọl warị mị againma ma pa nnị againma. 10<<Owiapụ a arịḅom ḅẹ́ wámịna muunyẹ mịnga saghị, anị opuma tẹ́mẹ́ nainaimabẹm, árụ́ bie wa dighi tọgha nyẹ sibẹm, árụ́ ma sọọ, túminị́ duma sọ fabẹm.>> 11Kụ́ma ọ́mụ́gbi sịbịdaaḅọ ma, ọ Pọl dughonyẹ ma pughu bẹ nakaragha, árụ́ nyánáḅọ ma na árụ́ ma sịbịdáaḅọ pịrị againma duam. 12Árụ́sọ́ma angaá ma ibi ngaghaa tumḅọ fịnị o ḅuu sáá, anịgo kị́nị́mamgba dughoarị ḅẹ́ wamịnị árụ́ ma dọghụ tórúku muu sị wa pịghị ine ine mú Fonisi láa, sị wa ḅọ́rọ́ ine ine oḅuu bie ma ḅụ anị ngaa fịnịị. Fonisi anị Krete ḅụ fịnị árụsọma ngaa na dama dama nyẹ, sughu bie ẹ́rẹ́ḅáranga daá pịghị ọ́gọ́nọ ẹ́rẹ́ḅáranga.

Irisé Tọ́rụ́bie

13Diin fọ́rụ warị saghị ofuro sughu ju, túminị́ ma pịghị siim ḅẹ́ nnị ine n tọ́nyẹ mịẹbẹm, n warị lụḅa ma nụ́nụ́ sẹ warị kẹ́lẹ́kẹlẹ Krete posie aka angaá ḅọ́rọ́. 14Kuma anị gbẹ́rẹ́kiri gbẹ́rẹ́ kụrọ́ fọ́rụ ofurom amaḅara sịbịju pa sị ngaa nyẹ, kiri ḅụ anị saghị ofurom. 15Anị ḅo árụ́ ma ḅaghu, árụ́ ma ine fọ́rụ ma dagha ḅara ma, anịị wamịnị árụ́ ma wáriso nyẹ sị mingi anị dighi. 16Wa kẹ́lẹ́ sịbị ḅọghu angaá arịm, wa Kauda pa sị ogbosúányẹ ámá ọḅụdụ ḅọ́rọ́ sáá. Anị ngaa, anị wa n pa sịbị keke kálá árụ́, n pa opu árụ́ ma ọḅụju kpọ nyẹ saghị árụ́ bie sẹ nyẹ. 17Nnị kálá árụ́ ma saghị opu árụ́ ma bie sẹ sị anị kpọ fama sáá, ḅáláfa pa nna bie imi ḅẹẹ nnị ine mú Libiya mụ́mọ ọ́gọ́nọ ḅụ gbánabẹm, n warị vála ma kọ́rọ́ma sị fọ́rụ ma árụ́ ma dighi. 18Kụrọ fọ́rụ ma pa fiearị, anịgo éné ḅa sáá, nnị warị saghị árụ́ ma dighi ngọ nyẹ ma dighi ḅuu ma. 19Jẹ́ éné ḅáá sáá, n pịghị árụ́ dighi jẹa ngwongwo dighi ḅuu ma. 20Tọgha éné ḅụ, wamịnị ine ịrụa anịgha sobie fịnị ḅálōló arịgha fọ́rụ ma pa kụrọ ḅara pa ofuroarị. Kunema, wa tẹ́mẹ́ sim ḅẹ́ wa dumabẹm.

21Kị́nị́mamgba tọgha dii ḅụ nyẹ́fịgha pa fịnị fama sáá Pọl nna tórúku sẹm warị ḅẹẹ, <<Ọ ḅọ́rọ́ i bịpị pughu sị árụ́ ma wáriso Krete ḅụ, wa mị faá mamgba fabịgha. 22Anịgo mị́sa a ọ tẹ́ghẹ̄m ọ tẹ́mẹ́kụ́rọ nyáná, gbẹ́rẹ́ḅọ so amịna duma famabịgha, árụ́ ma ngéré anịị faá bẹnyẹ. 23Bia dii, i Nyáná Tamuno ma pịghị a tẹ́ghẹ̄arị Tamuno ma sookumuḅọ, fịrịma a fịnị ngása ḅom. 24Warị ḅẹẹ, <Pọl ḅáláfama, ḅẹ́ i sẹbẹm Sẹ Táaḅọ ma tórúku, Tamuno pịghị ọ nyáná ị pịrị ḅẹlẹma ḅụ ḅọ́rọ́, i nana nyẹ ma muarịapụ mamgba duaḅọ́rọ́mabẹm.> 25Anịgo ọ tẹ́mẹ́kụ́rọ nyáná, owiapụ awọ! A Tamuno ḅụ mininim ḅẹ́ n dugho i pịrị ḅara ma anịị anị pághá bẹ ḅara. 26Kụ́ma nnị wa suma mú gbẹ́rẹ́kiri ọgọnọ ḅụ kọ́rọ́mabẹm.>>

27Dii dii, mị oyi ínia dii findi irisé wa pa ikelekelearị nyẹ Meditaraniya tọ́rụ́ ma ḅụ. Anị dii ogbo lámam, árụ́ ma bie fịrịnwangịapụ ma saghị ọwụ ma sáá ḅẹẹ wa kiri na kikiamam. 28Nnị warị ikúnyẹ pa árị́dírí sịbị kpọ sị anị kóróma, nnị anị nụ́nụ́ sághị sáá n ḅo arịḅom ḅẹẹ anị angaá ma póghóló rula suéné a sị lam, kẹ́lẹ́ sáá ḅọ́rọ́ n pịghị anị gbẹ́rẹ́ ḅara ma mịẹm, mị́sa anị ḅo ínia si oyi findi lam anị póghóló. 29Nnị ḅáláfam ḅẹ́ árụ́ ma mú okpo dapịrị ḅụ kóróbẹm, n warị nune ju ínia lụḅa kóróma, warị tẹ́ghẹ̄ ḅẹ́ éné álála ḅáá. 30Árụ́fịrịnwangịapụ ma warị asọ dọghụ nnị árụ́ ma bie mangị sọ bẹ ḅara, n warị kálá árụ́ ma terema mingi daá, warị mbasị ḅẹ́ n muu lụḅa kórómadoghum árụ́ kụ́lọ́ angaá ma ḅụ. 31Pọl warị ọmụsịbịdaḅọ ma na ọ́mụ́gbiapụ ma ḅẹẹ, <<Ḅọ́rọ́ árụ́fịrịnwangịapụ ma árụ́ ma bie fịnịgha fịnịgha, anị ḅụdaabẹm ọmịna duma dụaḅọ́rọ́ma.>> 32Ọ́mụ́gbiapụ ma warị nnị pa árụ́ ma kpọ árị́dírí ma pẹ́lẹ́ sị árụ́ ma wáriso.

33Ḅáásó ḅụ, Pọl warị n tẹ́ghẹ̄ ḅẹẹ, <<Ọ ḅụ́kọ́rọ́ma fị́nyẹ fịị, ḅẹẹ mị oyi ínia dii ọ ḅụrụ pa ọḅụ ḅáma sị mini nyẹ fịgha. 34Anịgo a ọ tẹ́ghẹ̄m, ọ kẹ́lẹ́ nyẹ́fịị, sị anị ịnyọ pa ọ pịrịbẹ ḅara. Sịbịnumo gbẹ́rẹ́ḅọ sịbị sọ sóghóro fabịgha.>> 35Ọ mịma dugho fama sáá, Pọl fịtúrú akịm warị ịmịẹḅam pa Tamuno ḅẹ́ nnị kị́nị́mamgba tórúku, ori anị puum warị saghị fịị. 36Nnị warị tẹ́mẹ́kụ́rọ nyáná, nnị kị́nị́mamgba warị fị́nyẹ kálányẹ fịị. 37Wamịnị árụ́ ma bie fịnịiapụ túminị́ oyia si tẹ́si oyi findi na suene. 38Kị́nị́mamgba nyẹ́fị n furo bi fama sáá, n warị árụ́ ma mịẹ sara sara ma, nnị fịtúrú mịẹ sịmgbọlụ ma sara ḅuuma fama ḅara tọ́rụ́bie.

Árụ́ Bile

39Énéḅa sáá, mingi árụ́fịrịnwangịarịapụ ma mịnị kiri bịpị lighlighiḅogha, kụ́ma tọ́rụ́ arịm ogbosúányẹ nyánányẹ, n warị ḅẹ́ nnị árụ́ dọghụ anị angaá kiri sọmabẹm. 40Nnị warị lụḅa ma pẹ́lẹ́ si anị warị tọ́rụ ma ḅụ bile, nnị warị pịghị n pa vála ma kpọ árị́dírí ma fiima, warị vála ma saghị árụ́kụ́lọ ma ḅụ sẹ ma, fọ́rụ vála ma ofuro sị nnị dighi nwángị kiri muu. 41Kụ́ma árụ́ mú mụ́mọ ọgọnọ gbánam kụlọ angaá ma muu piem sị mịnị ine nwángịgha, nune ju ma warị pughu kọsi anị ḅụ fomuarị kụ́rọ dinọ́ngụ gosi.

42Ọ́mụ́gbiapụ tọọm ḅẹẹ nnị ikólinaapụ mamgba ḅá famabẹm, nnị oki kiri ọ́gọ́nọ muu si mangị sọbịgha ḅara. 43Kụ́ma ọmụgbisịbịdaḅo ma Pọl dụaḅọ́rọ́ma dọ́ghụm, ọmịnị ḅo mini n pịrịgha, tụ́ma ori n ḅẹ́m ḅẹ́ ineḅọ ineḅọ tarị fighi kóró si oki mú kiri láa. 44Kọapụ n duabẹm, dụpọ ọlọ anịgha kaamaa árụ́ mpárá ọlọọ. Mị ḅara ma anịị wa ḅọ́rọ́ mú kiri ọgọnọ láa ḅara.

Currently Selected:

Fịrị Ḅara 27: IBY

Highlight

Compare

Copy