2 Kọrịntịapụ 13
13
Kunema Birinụ́nụ́
1Mịị ị́yẹ́ tẹ́rẹ́ kárámá sa, a ḅo o dighinyẹ. Tọ́ndiri ma bie n gịẹ kórómam ḅẹẹ, <<Ḅẹ́rẹ́ pa jụghọ sịbị sẹarịḅọ gonyẹ́ gonyẹ́ mmẹẹ́ anịgha tẹ́rẹ́ onyésẹ̄ḅọ nyánábẹm, anịsa, anịị anị kundu nyáná bẹnyẹ.>> 2A ọ birinụ́nụ́ dọ́ghụm ọmịnị ḅọ́rọ́maa sa siinyẹ mịẹapụ, na pịghị jẹ́apụ jẹ́apụ, a parị ḅo sáá a anị gbolomanyẹ dughom, ị́yẹ́ mmẹẹ́ kárámá ḅo, a pịghị sima anị dughobẹm mị́sa a mịnga ofori sáá: ḅẹ́ a jẹ́ pa ḅo bẹ sáá fomḅara ọ gbarịbịgha. 3Ọ dọghụ ilíghíma gonyẹ́ gonyẹ́ ọmịnị árịbẹm ḅẹ́ Krais i bịpị pa ẹ́gẹ́rẹ́kọarị, ori ọ nana mịẹarị sáá, ori kụ́rọ nyanagha ḅọ kịkagha, anịmanakaragha ori ọrẹ kụ́rọ diearị ọmịnị ogboku bie. 4Karakárányẹ ḅẹ́ Krais kụ́rọ ḅụ faá ḅụ nnị ọ ḅaupálịm, kụ́ma mị́sa Tamuno kụ́rọ ḅụ ḅọ́rọ́ Krais dumafịnịm. Wamịnị sọ ọ nana gbẹ́rẹ́nyẹ mịẹ ḅụ, wa ḅo kụ́rọ nyánágháapụ dighim. Kụ́ma wamịnị na ọ nana mịẹgbólóma ḅụ wa Tamuno kụ́rọ ma nyánábẹm ori duma bie.
5Ọmịnị ọmịna ḅụ pa daádighi ma ḅụ sua ọ ḅẹ́rẹ́kọ ọmịna ḅụ pịrị, sị o nimi bẹ ḅara ọ ḅọ́rọ́ pa minini ma ḅụ duma kọọarị. Ọmịnị árịbẹm ḅẹ́ Jizọs Krais ọmịna bie ḅụ imii, ḅọ́rọ́ ọmịnị epeletigha tigha ḅẹ́ ọmịnị ọ ḅụ mininim. 6A tẹ́mẹ́kụ́rọ nyánam ḅẹẹ ọ dọghụ pághámaḅobẹm ḅẹẹ wa bịghịgha: 7Wa Tamuno tẹ́ghẹ́arị ḅẹ́ ọ gbẹ́rẹ́ irima nyẹ sọ mịẹma. Wa mịma mịẹghaa pa die ḅẹ́ wamịnị sáḅá ḅọ́rọ́mam, kụ́ma ọ karakárányẹ ma mịẹbẹ ḅara, tụ́manyẹ ḅẹẹ túminị́ tórúku, wa bịghịmaapụ dighi sọọ. 8Tegó wamịnị ine gbẹ́rẹ́nyẹ sọ mịẹ karakárányẹ ma pụ́nụ́mabịgha, kụ́ma wa nyẹ mịẹ karakárányẹ ma pịrịbẹm. 9Wa bieḅẹlẹm ḅẹẹ wámịna tẹ́mẹ́ oḅuu sáá gonyẹ́ gonyẹ́, ọmịnị kụrọm. Anịgo wa pịghị tẹ́ghẹm ḅẹẹ, nyẹ gonyẹ́ gonyẹ́ ḅụ ọ kpain. 10Anịị a go mị diri ma gịẹnyẹ a ọmịna ḅụ ḅọlọanga fịnị sáá; sị a ḅo láabẹ sáá, a mịnị kụ́rọ na ọmịnị na mịẹbịgha ḅara. Kị́nị́nyánáḅọ mịị kụ́rọ ma pa i pịrị pa ọ mịẹ sẹnịmaa, pa ọnụ́nụ́ka bẹ nyẹ́gha.
Kunema Sịbịpị
11Kunemaá, i Daa awọ, ọmịnị ibima fịnịị, asọ nwángịị kpain ḅụ, ị́yẹ́ tẹ́ghẹ̄ẹ̄ bịpị ma pughuu, ọ gbẹ́rẹ́ tẹ́mẹ́ nyáná, o diin ḅụ ngaa, diin na ḅẹlẹma nyáná Tamuno ma ọmịnị na fịnịị.
12Tọ́ntọ́ ḅụ ọ jụghọ jụghọ ḅoloo. 13Tamuno túminị́ mamgba fịrịmam ḅẹ́ wamịnị o bii.
14Wámịna Nyánáḅọ Jizọs Krais tọ́rụ́kụrụkụ́rụ́, Tamuno ḅẹlẹma, na Tọ́ntọ́ Tẹ́mẹ́ ma mịẹgbólóma, ọmịnị kị́nị́mamgba na fịnịị.
Currently Selected:
2 Kọrịntịapụ 13: IBY
Highlight
Copy
Compare
Share
Want to have your highlights saved across all your devices? Sign up or sign in
©2024 Luke Initiative for Scripture Translation
