2 Kọrịntịapụ 12

Pọl Ori Tọ́rụ́siarị Na Kị́nị́nyánáḅọ Jizọs Pa Ọ Dienyẹ

1Anị pa i mịẹibi ofori, kụ́ma a pa bịpịkpọbẹm, mị́sa a múnogha ḅụ kọ dáwọ Kị́nị́nyánáḅọ ọ ḅụ gboloma sị ọ pa i dienyẹ. 2A gbẹ́rẹ́ Krais asọ duarị owitụ́wọ nimim, ḅọ́rọ́maa oyi ínia kụ́rá findi ḅụ, nnị dighi akị sóghóloḅa so ma múm, mịma duma ḅụ anị kiriakị-o, múnogha dáwọ ḅụ kiriakị-o, a nimigha, Tamuno ngéré anịị nimiḅọ. 3Kúru a sima dugho, a nimim ḅẹ́ mị owitụ́wọ ma nnị ọ dighi akị paradaisị múm, anịị Tamunofịnịkiri ma, mịma duma ḅụ kiriakị-o múnogha dáwọ ḅụ kiriakị-o a nimigha Tamuno ngéré anị nimiḅọ, 4anị ngá a nyẹ́ naam tumḅọ dughobịgha nyẹ n mịnị túminị́ pịrịgha sị nnị anị dugho. 5A ọkọfịnị tumḅọ pa bịpịkpọbẹm, kụ́ma a ịḅụ pa bịpịkpọbịgha, tụ́ma diearịnyẹ ma sima ḅẹ́ i tẹ́mẹ́ oḅuum. 6A ḅọ́rọ́ bịpịkpọ dọghụ, a oḅoriḅọ sọbịgha tegó a karakárányẹ ma dughobẹm. Kụ́ma a bịpịkpọbịgha tegó a bigha túminị́ jẹ́ tụ́ma ḅara pa i dighi, nnị árịnyẹ na pịghị i bịpị nnị náanyẹ ḅụ ḅọ́rọ́.

7I mịẹsị a opuma opuamịẹnyẹ mịẹbịgha ḅara, a árị tọgha ḅụ́gbérépuma nyẹ ma ḅụ. Nnị gbẹ́rẹ́ nangi pa i pịrịm ị́yẹ́ oju bie, Satanị oku muu ḅọ, ori i fom sị a mịnị opuamịẹnyẹ mịẹbịgha ḅara. 8A tẹ́rẹ́ a sa pa Kị́nị́nyánáḅọ tẹ́ghẹ̄m ḅẹẹ, ori anị si ị́yẹ́ oju bie. 9Kụ́ma ori i pagharam ḅẹẹ; <<Ị́yẹ́ tọ́rụ́kụrụkụ́rụ́ anịị ị bii nyẹ, ḅẹ́ iyẹ kụrọ anị ḅụ die kụrọma kụ́rọ́mam, ị́yẹ́ kụ́rọ ịrụ sáá.>> Anịgo i bieḅẹlẹm ḅẹ́ a bịpịkpọ ị́yẹ́ ịnyọ ịrụ la ḅara pịrị sị Krais kụ́rọ i gbẹ́ẹ̄ bẹ ḅara. 10Anịgo, Krais sịbị go i bieḅẹlẹm ị́yẹ́ tẹ́mẹ́ oḅuu ḅụ, wirinumo daa, ḅụ́kụro árị, tọ́rụ́siarị arịị, ḅụḅáláḅálá arịị, Krais gosi. Ḅẹẹ i tẹ́mẹ́ oḅuu sáá, anịsáa anịị a kụrọnyẹ.

Pọl Tẹ́mẹ́ Ḅụḅáláḅálá Pa Ọ Pịrịm Kọrịntị Ḅụ Fịnị Sọsị Ma Go

11A oḅori ḅara pa nyẹ mịẹarị, kụ́ma ọmịnị anịị ị mịẹnyẹ, ọmịnị anịị i túminí na ibinyẹ, a ḅọ́rọ́ ḅẹnyẹ ḅẹnyẹ ḅụ ofori sọ, ọmịnị pa opuma <<Sẹ́nịḅa nfịrịmaapụ,>> sịapụ ma, nnị gbẹ́rẹ́ asọ ḅụ sọ ibi inẹ́ngịgha. 12A ọmịnị na fịnị sa a tọgha pághányẹ mịẹm, ḅụ́gbérépuma nyẹ na ḅụ́gbérépuma fịrịnwangị, inema ḅara ḅụ. Mịma diem ḅẹẹ, ịrị nfịrịmaḅọ. 13A ị́yẹ́ ḅụḅáláḅálá pa ọmịna ḅụ gbánāgha sima, a tẹ́ sii ḅara pa ọ́ nana ngaa kịrịnyẹ, a pa isi sọsị sọsị ma na ngagha nyẹ?

14A tẹ́lẹ́mamam ḅẹẹ a ḅo ọ nana dona, mị tẹ́rẹ́ kárámá sáá, a ọ ḅarabie ḅẹnyẹ ḅẹnyẹ bibịẹgha, kụ́ma ọmịnị anịị a binyẹ, ọ nyáná nyẹ́ghaa, ọ́ kọ́kọ́ nimi ḅẹẹ awọamaapụ nna nyingiapụ siḅe na ibighaa, kụ́ma nyingiapụ anịị nna awọ siḅe ḅẹnyẹ. 15I bieḅẹlẹbẹm a nyánányẹ gonyẹ́ gonyẹ́ fama pighi ị ḅụgbọrụ, sị a pa ine ḅárásua ọ pịrịbẹ ḅara. Mịma anị mịẹbẹ sị ọ kálá ḅara pa i ḅẹlẹma a opuma ọ ḅẹ́lẹ́mam gosi?

16Ọ́ kọ́kọ́ i nana minini ḅẹ́ a ḅụḅáláḅálá pa ọ pịrịgha, kụ́ma jẹ́apụ ḅẹbẹm ḅẹẹ a aka ḅara pa oḅori pa ọ́ sịm. 17A mịnaapụ ma fịrịma ọ damaḅo sa, o sii ḅẹẹ a n fịrịmaḅom a ọ ḅarabie mịẹ dọghụ sọnyẹ go? 18A Taitọs tẹ́ghẹ̄m ḅẹẹ ori ọ damaḅo, a pịghị isi mị́naḅọ owitụ́wọ fịrịma ọ ḅụ suam. Anịsáa, o ḅẹ́ bẹ ḅẹẹ Taitọs ọ ḅarabie sọ́nyẹ mịẹm? Ịrị na ọ nana wa gbẹ́rẹ́ tẹ́mẹ́ pa nyẹ́ mịẹgha? Pịghị gbẹ́rẹ́ ḅara pa asọ nwángị.

19O sị ḅẹẹ mị́sa mamgba wa wámịna ḅụ pighiarị ọmịna toruku. Anị ọkọ fịnịgha Tamuno ị́yẹ́ onyésẹ̄ḅọ ḅara, a karakáráma dugho ọ pịrịm Krais ómóniḅọ ḅara. Wa pịghị mịẹarịnyẹ gonyẹ́ gonyẹ́ mịnaapụ, anịị pa ḅárásua ọ pịrị! 20Ḅáláfa ịḅụ imi ḅẹẹ a aningáa láa bẹ sa a bi ḅara ọmịnị ọkọfịnịbịgha, ọmịnị sọ pịghị dọghụ ḅara a ọkọfịnịbịgha. Ḅáláfa ịḅụ imi, bẹ kam sọ, na jụghọ nyẹ mọnị, na ọfịrị kúkúbie, na ngéré fịị, jẹ́apụ dughosima, na opu ibiamịẹnyẹḅọ na nyẹ mịẹ gálágálá ma, anịị a árị bẹnyẹ. 21Ḅáláfa ịḅụ imii ḅẹẹ, a aningáa la bẹ sa parị sáá mịẹnyẹ, pịghị sima mịẹbẹm Tamuno i siminimabẹm ọmịna toruku. Ḅáláfa ịḅụ imi ḅẹ́ a owubẹm parị sa pa ịlọ́lị duma kọ́arịapụ gosi, na pịghị ḅụ́gịrịrịma duma kọ́arịapụ gosi.

Currently Selected:

2 Kọrịntịapụ 12: IBY

Highlight

Copy

Compare