1 Kọrịntịapụ 9

Nfịrịmaḅọ, Ori Kụ́rọ Na Ori Fịrị

1Irị i ḅara na i sịbị nyáná owitụwọgha? Irị nfịrịmaḅọghaa? Na a Jizọs Krais wámịna Nyánáḅọ arịgha? Ọmịnị Kị́nị́nyánáḅọ ma bie a nwángị fịrị ma bie sághị ḅo sọ́nyegha? 2Ḅọ́rọ́ jẹ́apụ ị́yẹ́ ákịịgha nfịrịmaḅọ ḅara, ọmịnị ị́yẹ́ ákịm! Ọ nyáná duma ma gosi Kị́nị́nyánáḅọ ma bie ọmịnị ma anịị túminị́ pa ḅara ọlọ bẹnyẹ ḅẹẹ irị nfịrịmaḅọ.

3Túminị́ i sịbị ḅẹ́rẹ́kọarị sáá, mịị a ịḅụ pighiarị ḅara. 4Wa kụrọ nyanagha ḅẹẹ n fị́nyẹ na iru pa wa pịrị wámịna fịrị ma ḅụ? 5Wa kụrọ nyanagha sị isi nfịrịmaapụ ma mịẹ ḅara mịẹ, na pịghị Kị́nị́nyánáḅọ mịná owiapụ na Pita mịẹḅara mịẹsị Krais asọ duarị táaḅọ akị wa múuarị nyẹ ma ḅụ? 6Ịrị na Banabas ngéré anịị fịrịnwangị bẹapụ sị pa nna ḅụ siḅe? 7Tọ́rọ fịnị ọ́mụ́gbiḅọ, ọ ḅárákū igbii pa ọ ḅụ siḅe siḅe? Ọ tọrọ́ fịnị dụadipiḅọ ọ dipi sị ma sịmgbọ́lụ fịbịghaa? Tụọ ánáná didighiḅọ ánáná ma ḅụ saghị ḅo indomingi pa nyẹ miẹbịghaḅọ?

8A tuminikiri opu níminyẹ ḅụ ḅọ́rọ́ mịma dughoarị? Ólóghó ma sọ anị gbẹ́rẹ́nyẹ ma dughogha? 9Wa kọkọ goo Mosis ólóghó diri ma bie ḅẹẹ, <<Mbiakpa isimaarị kọ́rọ́náma ma bịpị fịna ma.>> Mịnga, Tamuno ma anịị kọ́rọ́náma gosi anịị o goo dughoarị nyẹ? 10Wamịnị goo anịị ọ goo anị dugho nyẹ́gha? Karakárányẹ n mịnyẹ ma gịẹm wa sịbị goo. Kiri tẹ́lẹ́maarịḅọ gonyẹ́ gonyẹ́ na pịghị duasughuarịḅọ gonyẹ́ gonyẹ́ anị mịẹ tọ́rụ́ dighinyẹ ma nyánam ḅẹ́ n ḅo diekiri nyánábẹm n sughu dua ma ḅụ. 11Wa tẹ́mẹ́ sịmgbọ́lụ dipimaa ḅara ọmịna bie, anịsáa anị nyẹ́ sima, wa ḅọ́rọ́ ọmịna ḅárabie mị tuminikirinyẹ ma nyánáḅo. 12Ḅọ́rọ́ jẹapụ ọmịna ḅárábie mịma biiarị, wamịnị wa kọkọ mịma nẹ́ngịma kụ́rọ nyáná?

Kụ́ma wa mị kụ́rọ ma pa nyẹ́ mịẹgha. Tụ́manyẹ gonyẹ́ gonyẹ́ ḅụ wamịnị ngịrịma nyánam, sị wamịnị asọ mgbẹsẹ nyẹ dighi Krais gboloma ibi oku ma pịrịbịgha ḅara. 13Ọ kọkọ nimi ḅẹẹ Tamunowárịbie fịrịnwangịarịapụ nna fị́nyẹ nyanaḅoarị Tamunowarị ma bie, ẹ́bẹ ọgọnọ agbaa mịẹarịapụ ma sọ diekiri nyánam n mịẹarị agbaa ma bie. 14Anị gbẹ́rẹ́ ḅara ma Kị́nị́nyánáḅọ bịpị pịrịmam ḅẹẹ ibi oku ma dugho wásámáarịapụ ma, sọ nna fị́fị́nyẹ nyánáḅọ ibi oku ma dugho wásáma ḅụ.

15Kụ́ma náa a mị kụ́rọ ma ḅụ, gbẹ́rẹ́nyẹ sọ pa fịrị ḅụ suugha, a pịghị mịma gịẹgha ḅẹẹ a anị ḅárásua nyáná ḅo ịḅụ pịrị. Tegó a biighaa gbẹ́rẹ́ḅọ sọ i mịẹsị a go bịpịkpọ biegha nyẹ ákịị i ḅarabie, anịmanakaragha a fịịfịị anị ibiḅam. 16A a goo bịpịkpọ bẹnyẹ arịgha tegó a ibi oku ma dugho wásámam gosi, mị ibi oku ma n tọ́ọ ị pịrịm ḅẹẹ a anị dugho wásámáa. Dighi anị si i pịrị láa bẹ ḅara a ḅọ́rọ́ ibi oku ma dugho wásámagha! 17A ḅọ́rọ́ i tẹ́mẹ́bie fịrị ma nwángị kị́nị́ i sumagha pa a gbẹ́ẹ̄ nyẹ nyánábẹm; kụ́ma a fịrị ḅara pa anị nwángịm tegó Tamuno mị fịrị ma saghị i pịrịmam ḅẹ́ a anị nwángịị. 18A tọrọ́ fịnị gbẹ́ẹ̄ nyẹ nyáná bẹ anịsáa? A nyáná gbẹ́nyẹ anịị a nyáná asọ sị ibi oku ma dugho págháma igbii tuḅọgha pa anị ḅụ pịghị ị́yẹ́ kụ́rọ fọnyagha pa ị́yẹ́ fịrị ibi oku ma ḅụ.

19Irị ḅara na i sịbị nyánáḅọ; irị gbẹ́rẹ́ḅọ sọ ómóniḅọgha; kụma a ịḅụ pa kị́nị́mamgba ómóniḅọ mịẹm sị a ineapụ akuoo Krais nimii. 20A Juuapụ ma na fịrịnwangịarị sáá, a duma kọọm Juuapụ ḅara sị a ine a ineapụ akuoo Krais pịrịbẹ ḅara; karakárányẹ ḅẹẹ ịrị a Mosis ólóghó ma sughubie ofori a ólóghó ma suughu bie fịnịapụ ḅara pa duma kọọm sị a ine nnị akuoo Krais pịrịị. 21Anị gbẹ́rẹ́ ḅara ma a Juughaapụ ma na fịrịnwangịarị sáá, a Juughaapụ ma ḅara pa duma kọọm sọ́ḅọ́rọ́ Juuapụ ólóghó ma ịḅụ kụrọ nyanagha nyẹ, sị a ine Juughaapụ ma akuoo Krais pịrịbẹ ḅara. Mịma anị dieghaa ḅẹẹ a Tamuno ólóghó ma kokogha; a karakáráma Krais ólóghó ma sughubie imi. 22Minini ḅụ kụrọghaapụ ma ogbo, a ḅo minini ḅụ kụrọghaḅọ dighim sị a ine pa nna akuoo Krais pịrịị. Anịgosi a ḅo nyẹ gonyẹ́ gonyẹ́ sọ kị́nị́mamgba pịrịm sị a ine jẹapụ dụaḅọ́rọ́ma ḅo bẹ ḅara a árị asọ gonyẹ́ gonyẹ́ ḅụ.

23A mịná nyẹ mamgba mịẹm ibi oku ma gosi, sị a diekiri nyána bẹ ḅara anị ḅụ fịnị karịibima ḅụ. 24Ọ kọkọ nimi ḅẹẹ mangị ti ma ḅụ, tọghaapụ mangịm kụ́ma gbẹ́rẹ́ḅọ anịị dienyẹ ma nyánákịarịḅọ. Anịgosi mangịị sị i dienyẹ ma nyánáakị ḅo bẹ ḅara. 25Ọ ḅụ tẹ́lẹ́ma mangị ti ma pịrịarịḅọ gonyẹ́ gonyẹ́ ọ ḅụ pa opu ḅụọ dáwọ ḅụ suabẹm, ọ mịma mịẹm dii láabịgha ogunu gosi; kụ́ma wamịnị wa mịẹarị si wa ine fịnị gbámásó ogunu nyáná ḅo. 26Anị a go mangịarị nyẹ ḅẹẹ a mangị mú sịbị láama, a pịghị oḅoli pa fọ́rụ ḅaghuḅọ ḅara pa ḅaghugha. 27A oḅoli pa ị́yẹ́ oju ma ḅaghu kụ́rọ́mam sị a ibima anị ḅụ ḅẹrẹtọ bẹ ḅara, sị a ibi oku ma dugho wásáma jẹapụ pịrị faá ma sa nnị i suma sibịgha ḅẹẹ a gbụnụ́nụ́ ḅara pa ị́yẹ́ mangị ma kọọgha.

Currently Selected:

1 Kọrịntịapụ 9: IBY

Highlight

Copy

Compare