1 Kọrịntịapụ 8

Nnị Pa Igwagwaá Pa Nnị Kárá Tamuno Pịrị Fị́nyẹ

1Mị́sa ọ gịẹnyẹ ma gbolomanyẹ anịị nnị pa igwagwaá n kárá tamuno pịrị fị́nyẹ.

Karakárányẹ ḅẹẹ, wamịnị kị́nị́mamgba nyẹ́nimim, n dugho ḅara, anị fịnị ḅara ọkọ fịnị níminyẹ mịẹ mịẹm jẹ́apụ sághị opuamịẹnyẹ mịẹ; kụ́ma ḅẹlẹma tumḅọ mịẹm n ḅọ sẹnị. 2Sịḅọ ḅẹẹ ọ nyẹ nimim, karakárá ma nimigha ọ nimi na ibiḅara. 3Kụ́ma Tamuno ḅẹlẹma ḅọ Tamuno sọ pịghị n ḅo nimim.

4Anịsáa, n pa igwagwaá n kara tamuno ma pịrị fị́nyẹ ma fịị gbolomanyẹ, wa nimim ḅẹ́ n kárá tamuno sẹ tuminikiri ófórigha nyẹ pịrịm; wa nimim ḅẹ́ gbẹ́rẹ́ Tamuno ngéré anịị iminyẹ. 5Tọgha nyẹ n pa <<tamuno>> pa sị nyẹ ine imibẹm sobie na kiribie tọgha tọgha <<tamuno>> na tọgha tọgha <<kị́nị́nyánáapụ>> bii ḅara ma, 6kụ́ma wamịnị gbẹ́rẹ́ Tamuno ngéré anịị wa nyánányẹ, Daḅọ ma, ori nyẹ gonyẹ́ gonyẹ́ tẹ́mẹ́ḅọ, wa pịghị duma ọ pịrịm, wa pịghị gbẹ́rẹ́ Kị́nị́nyánáḅọ nyanam Jizọs Krais, ọ ḅụ ḅọ́rọ́ anịị nnị nyẹ gonyẹ́ gonyẹ́ tẹ́mẹ́nyẹ, ọ ḅụ ḅọ́rọ́ anịị wa pịghị dumanyẹ.

7Kụ́ma kị́nị́mamgba mị karakárányẹ ma nimigha jẹapụ n kárá tamuno ma opuma nkeḅemam gosi, nnị ọkọfịnị fị́nyẹ ma fịarị sáá, n siim ḅẹẹ nnị n pa igwagwaá fị́nyẹ fịarị, nna tẹ́mẹ́bie kụrọgha gosi, nnị siim ḅẹẹ nnị pilemam. 8Fị́nyẹ, anị fịnị ḅara ine wa kikiama Tamuno fịnị angaá ḅobịgha, wa ḅuuma nyẹ ofori wa ḅọ́rọ́ fịghafịgha, anịgha wa ḅọ́rọ́ fịfị wa anị bie sọnyẹ́ nyanagha.

9Ọ ḅụ ẹbị minima sị ọ nyáná ḅara na sịbị nyána ma mịẹsị minini ma ḅụ kụrọghaapụ bịghịkoro. 10Didigha ḅọ́rọ́ tẹ́mẹ́ kụrọghaḅọ mịnyẹ ma ḅụ ị́yẹ́ arịị, ịrị mịnanyẹ ma <<nimiḅo,>> nyẹ́fịarị oru warị bie; mịma anị mịẹbịgha sị n ḅo sághị n pa igwagwaá fị́nyẹ fịị? 11Anịsáa mịị tẹ́mẹ́kụ́rọgha mịná owitụ́wọ ma Krais ọ sịbị goo fịịḅọ ma, warị fịị faabẹm ịrị ma níminyẹ gosi! 12I mịị ḅara ma pa siinyẹ pa ị jẹa mininiḅọ miẹsima sáá sị mịẹsị nna tẹ́mẹ́ oḅuú, Krais anịị ị mịị sii ma pa mịẹarịḅọ. 13Mịma goo, ḅọ́rọ́ a fịarịnyẹ mịẹbẹm sị i jẹa mininiḅọ siinyẹ bie sọọ a mịnị jẹ́ pa nama pẹẹ́bịgha, sị a mịnị jẹ́ pa mịẹbịgha sị i jẹa mininiḅọ ma bịghị.

Currently Selected:

1 Kọrịntịapụ 8: IBY

Highlight

Copy

Compare