1 Kọrịntịapụ 4

Krais Fịrịmaapụ

1Túminị́ Krais fịrịnwangịapụ ḅara pa wamịnị akị na ibim, n Tamuno ori ḅọghu karakáráma pa pịrịapụ ḅẹ́ nnị anị pa túminị́ die. 2Fịrịnwangịapụ nyánáḅọ gonyẹ́ gonyẹ́ amịna nyánáḅọ ori nyánányẹ saghị ḅárasúamáa ḅọ, anịị ori ine ḅụ tẹ́mẹ́ gbánā bẹ fịrịnwangịḅọ. 3Kụ́ma ịrị ọkụma, a balagha ḅọ́rọ́ ọmịnị i sịbị ḅẹ́rẹ́kọarị anịgha jẹapụ i sịbị ḅẹ́rẹ́kọarị tuminikiriapụ ḅẹ́rẹ́kọ́wárị; irịsọ a pịghị ḅẹ́rẹ́kọ ịḅụ pịrịgha. 4I tẹ́mẹ́bie fiafiam, kụ́ma anị dughoghaa ḅẹẹ na a jẹ́ éné siinyẹ mịẹghaa. Kị́nị́nyánáḅọ ma ori anịị i sịbị ḅẹ́rẹ́kọḅọ 5Anịgosi gbẹ́rẹ́ḅọ sịbị sọ ḅẹ́rẹ́kọ ma sáá ma na laagha sáá. Kúruu, ákị múu Kị́nị́nyánáḅọ ma ḅoo sáá láa, ọ kánákánábie ḅọghunyẹ ma pa baá bie pághámaḅobẹm, túminị́ kúkúbie fịnị ḅọghunyẹ ma. Anịsáa anị túminị́ nna ḅụ gbẹ́ẹ̄ túminí nyánáḅọ bẹnyẹ Tamuno ḅara.

6Anịgo, i jẹa miniapụ, ọmịna sịbị goo, a mịị nyẹ ma pa ịḅụ na Apọlọs mịẹm, wamịnị mmẹapụ pa anị kịkamanyẹ pa ọ dáwọ́ ma sị ọmịnị ine mị ẹ́gẹ́rẹ́ ma dughonyẹ nimi bẹ ḅara, <<Tọ́ndiri ma bie n gịẹ kóróma ólóghó ma ọmịnị anị saḅama.>> Ọmịna ḅụ gbẹ́rẹ́ḅọ sọ isiḅọ pa bịpịkpọ ma sị isi ngaḅọ dighisimaa. 7Tụọ imie sị ị ibiḅaa jụgho nẹ́ngị? Ị nyánányẹ gonyẹ́ gonyẹ́ Tamuno pa i pịrịghaa? Nnị ḅọ́rọ́ pa ị pịrị pịrịị, ị tegósi bịpịkpọ bẹ, ḅọ́rọ́ i nyánányẹ ma n die i pịrịnyẹ́gha?

8Mị́sa ọ binyẹ gonyẹ́ gonyẹ́ ọ nyáná? Mị́sa ọmịnị ámányánáapụ sọmam? Wamịnị ámányánáapụghaa n ḅẹ́sọ. Dighi anị ịḅụ ḅẹ́lẹ bẹ ḅara ḅọ́rọ́ mị́sa ọmịnị ámányánáapụ, sị wamịnị sọ ọ́ nana ámányánáapụ sọ bẹ ḅara. 9Ḅẹẹ mị́sa anị ịḅụ fịnị ḅara sọ́ḅọ́rọ́ Tamuno wamịnị nfịrịmaapụ ma pa kunema angaá ma ḅụ wárim, n sịbị ḅẹ́rẹ́pẹ́lẹ́máapụ ḅara ḅẹẹ nnị n kpọ ḅáabẹm kị́nị́mamgba tórúku, sị tuminikiri gbọrụ sookumuapụ na tuminikiriapụ árị bẹ ḅara. 10Krais goo, wamịnị oḅoriapụ sọọm; kụ́ma ọmịnị nyẹ́nimiapụ sọọm Krais ḅụ! Wamịnị ịnyọ wa ḅụ ofori, kụ́ma ọmịnị ọ kụrọm! Nnị wa dighisimam kụ́ma nnị o dighi sóghólomam! 11Ḅo mị gbẹ́rẹ́ sáá ma láa, ḅuru wa tarịarị, wámịna pụghọ pịghị sámụ́nọm; káákáá bịtẹ anị wa suarị nyẹ; n wa fomum; wa ngá angaá nyánágha; 12Wa wámịna ḅara pa ịnyọsua fịrị nwángịm. Nnị nyẹ karị wa pịrị sáá, wamịnị n karịibimam; nnị wa pa tọ́rụ́siarị ma sáá, wa ngịrịma nyánam; 13Nnị wa wiri sáá, wamịnị ibi ẹ́gẹ́rẹ́ pa n pagharam. Wa tuminikiriapụ ịlọ́lị kpo nẹngịgha; ḅoo mị́sa ma láa, wamịnị anị tuminikiri nyẹ́ḅụ ófórigha nyẹ!

14A mịma gịẹ ọ pịrịarị ḅẹẹgha ḅẹ́ a ọ ḅụ́gịrịrịma dọ́ghụm kụ́ma a againma pa ọ pịrịbẹ ḅara a ḅẹlẹma awọ ḅara. 15Ḅọ́rọ́ Krais bie, ọ túminị́ gbẹ́rẹ́ pughu na sọ́nọ́a ndẹ́ẹ nyanam dighidighiapụ ḅara, ọ tọgha daapụ nyanagha Krais Jizọs ḅụ, a dugho wásáma ọ pịrị ibi oku ma ḅụ ḅọ́rọ́ a daá sọ ọ pịrịmam. 16Anịgosi a ọ tẹ́ghẹ̄m ḅẹẹ ọmịnị i daa a nyẹ mịẹ ḅara mịẹ. 17Anịma gosi a Timoti pa ọ fịrịmaarị a ibima ḅẹlẹma tụwọ, ibima kụrọ sẹ ḅo Krais asọ ma ḅụ, ọ pa o biekórómabẹm ị́yẹ́ dumafịnị ḅara Krais Jizọs ḅụ mịma anịị a pịghị diearịnyẹ sọsị gbọrụ pịghị ngámámgba ḅụ.

18Ọmịna ḅụ jẹapụ sághị opuamịẹnyẹ mịẹarị tegó ọ siim ḅẹẹ a mịnị ọ fịnị angaá ḅobịgha. 19Ḅọ́rọ́ Kị́nị́nyánáḅọ mini mini, a ọ fịnị angaá ḅoobẹm ḅọlọghaa sáá ḅụ, anịsáa a i ḅara pa dọghụ pághámaḅobẹm, mịná opuamịẹnyẹapụ ma nyáná kụrọ, mịnị n dughonyẹ ngéréghaa. 20Ḅẹẹ Tamuno amadakiri ma, ẹ́gẹ́rẹ́ bịpị ngéré ḅụ ofori, kụ́ma kụrọ ḅụ. 21I tẹ́ angaá nyẹ ḅẹlẹma? Ị́yẹ́ ḅoo ma a fom nyẹ́ akuoo anịgha ḅẹlẹma na diin tẹ́mẹ́?

Currently Selected:

1 Kọrịntịapụ 4: IBY

Highlight

Copy

Compare