1 Kọrịntịapụ 3

Puama Gboloma Againma Sọsị Ma Bie

1Karakárányẹ ḅụ, ịyẹa nángwọ́apụ a ine ẹ́gẹ́rẹ́kọọ ọ pịrịbịgha a ẹ́gẹ́rẹ́kọọ tẹ́mẹ́ ma nyánáapụ pịrịbẹ ḅara; a ẹ́gẹ́rẹ́kọọ ọ pịrịbẹm sọ́ḅọ́rọ́ ọmịnị mị tuminikiriapụ na pịghị káláawọ ọmịna minini Krais ḅụ. 2A ndomingi pa ọ siḅebẹm, tụ́ma fị́nyẹghaa tegó na ọ tẹ́lẹ́ma anị pịrịgha, mị́sa sọ na ọ tẹ́lẹ́ma anị pịrịgha, 3Tegó, ọ pa duma kọọarị mị tuminikiriapụ duma kọọarị ḅara. Nyẹ́mọ́ni ọmịna ogboku bie fịnị sáá, ọ pịghị jụghọ jụghọ na kamkoro sáá, anị diegha ḅẹẹ ọmịnị mị tuminikiri bẹapụ, duma kọọarị n duma kọọarị ḅara? 4Ọmịna ḅụ gbẹ́rẹ́ḅọ dughoarị sáá ḅẹẹ, <<A Pọl duaarị,>> jụghọ dughoarị <<A Apọlọs duaarị,>> ọ tuminikiriapụ nyẹ mịẹḅara pa nyẹ mịẹghaa?

5Anịsáa tụọ ḅọ́rọ́ Apọlọs, Pọl ori tụọ? Wamịnị papa Tamun fịrịnwangịapụ Tamuno pa ọ daa tụụma sị o goo minini nyẹ. Wamịnị papa Tamuno fịrịnwangịapụ, pịghị mị fịrị ma ḅụ ḅọ́rọ́ ọmịnị ḅo Krais ḅụ minimam. 6Ịrị mgbọ́lụ ma dipim, Apọlọs mingi pa anị saram, kụ́ma Tamuno anị mịẹḅọ sị anị senị́ị́. 7Dipiḅọ na mingi saraḅọ na nyẹ́ḅụ ofori Tamuno ori anị nyẹ́ḅụ fịnịḅọ, tegó ori anị mịẹsị dipinyẹ ma sẹ́nịarịḅọ. 8Dipiḅọ na mingi saraḅọ ma ogboku kịrịnyẹ ofori; Tamuno ọ́rụ́ḅọ ọ́rụ́ḅọ fịrị ḅụ ḅọ́rọ́ gbẹ́ẹ̄ nyẹ pa n ḅọ gbẹ́bẹm. 9Wamịnị kị́nị́mamgba wamịnị gbẹ́rẹ́ fịrịnaapụ fịrịnwangị Tamuno pịrịarị, ọmịnị ma anịị Tamuno duakiri.

Ọmịnị anị pịghị Tamuno wárị ma. 10Tamuno pa i pịrị dienyẹ ma ḅụ ḅọ́rọ́ a opuma nyẹ́nimi wárịnámáḅọ fịrị nwángịm. A kiri sughum sị sughu isé sị jụghọ anị ọgọnọ námáarị. Kụ́ma ọ́rụ́ḅọ ọ́rụ́ḅọ amịna ḅụ ẹbị n ḅọ námáarị ḅara. 11Tegó gbẹ́rẹ́ḅọ sọ ine jẹ́ súghúisebịgha Tamuno isemaa anganyẹ ma sima. Anị súghúise ma anịị Jizọs Krais. 12Jẹ́apụ odoḅala anịgha pị́naḅala anịgha nyẹ́la onwo pa kiri sughu sị ine súghúise dapịrị ma ọ́gọ́nọ namabẹm, isiapụ sịị anịgha osuka anịgha ányị́nyá pa anị ọgọnọ námabẹm. 13Tumḅọ nwángị fịrị fịnị ḅara, kị́nị́ anị árịbẹm Krais ḅo ḅẹ́rẹ́kọ bẹ éné. Anị éné ma ḅụ fịnị ọ́rụ́ḅọ ọ́rụ́ḅọ fịrị ḅara diepághámabẹm; fịnị ma anị daádighibẹm sị tụ́ma sị anị fịnị ḅara die. 14Ḅọ́rọ́ súghúise nyẹ ma ọ́gọ́nọ n nama nyẹ ma fịnị ma daatulutulu, nyẹ ma namaḅọ ma gbẹ́ẹ̄ nyẹ nyánáḅobẹm. 15Kụ́ma ḅọ́rọ́ nama ḅọ ma fịrị dọ́ghụdọ́ghụ, anịsáa n ḅọ faá kọọbẹm; kụ́ma ori ma wárịnámáḅọ ma ḅọ́rọ́ma nyánábẹm, soḅọ́rọ́ ọ fịnị ḅarabie sághị págháḅom.

16Tụ́mányẹẹ ọ nimim ḅẹẹ ọmịnị Tamunowarị Tamuno Tẹ́mẹ́ pịghị ọmịna ḅụbie ngam. 17Tamunowarị gulugulumaḅọ gonyẹ́ gonyẹ́ Tamuno n ḅọ gulugulumabẹm Tamunowarị ma tọ́ntọ́m; ọmịnị anịị Tamunowarị ma.

18Ọmịnị oḅori pa ọmịna ḅụ sị ma. Ḅọ́rọ́ o kórómam mḅẹ́ḅẹ́ ḅẹẹ tuminikiri asọ ḅụ ọ nyẹ́nimim ọ tụ́ma oḅori sọọ sị ọmịnị ibima nyẹ́nimi bẹ ḅara. 19Tegó mị tuminikiriapụ pa nyẹ́nimi nyẹ sị nyẹ anịị papanyẹ Tamuno tórúku tegó, Tọ́ndiri ma dugho ḅara, <<Nyẹ́nimiapụ ma Tamuno dia pa n kuuarị nna nyẹ́nimi ḅụ.>> 20Jẹ́ tọ́ndiri pịghị dughom ḅẹẹ, <<Kị́nị́nyánáḅọ ma nimim ḅẹẹ nyẹ́nimiapụ ma kóróma nyẹ ḅụ ofori.>> 21Anịgosi gbẹ́rẹ́ḅọ sọ bịpịkpọ ma tumḅọ ine mịẹbẹnyẹ ḅụ. Karakárányẹ ḅụ nyẹ gonyẹ́ gonyẹ́ ọ́ ọmịna nyẹ. 22Ḅọ́rọ́ Pọl, Apọlọs, Pita, mị tuminikiri, duma na fịị na, mị́sa biri nyẹ na pịghị tórúku ju nyẹ mịnanyẹ mamgba ọmịna nyẹẹ. 23Ọmịnị Krais túminị́, Krais sọ pịghị Tamuno nyẹẹ.

Currently Selected:

1 Kọrịntịapụ 3: IBY

Highlight

Copy

Compare