1 Kọrịntịapụ 11
11
1Ọmịnị i ḅụọ dua, irịsọ Krais ḅụọ duaarị ḅara.
Sịbịgbẹ Tẹ́ghẹ́arị Sáá
2A o túminim tegó sáá mamgba ọmịnị i pa biekórómáarị, ọ pịghị a sághị ọ pịrị dienyẹ ma duaarị.
3Kụ́ma a biim ḅẹẹ sị ọmịnị akanyaḅo ḅẹẹ Krais ma, ori ma sịbịdá owitụ́wọ gonyẹ́ gonyẹ́ pịrịm, deeḅọ ma sịbịdá ọ taá pịrịm, Tamun ma ori ma pịghị sịbịdá Krais pịrịm. 4Anịgo tẹ́ghẹ̄arị owitụ́wọ anịgha ikiakoroarịḅọ susi Tamuno pịrịarịḅọ sị ọ sịbị gbẹ́ẹ̄ Krais ḅụgịrịrịmaarị. 5Susi Tamuno kubiri ogbo ḅụ amịna sịbị findi sị tẹ́ghẹ́arị ọ́rụ́ḅọ gonyẹ́ gonyẹ́ anịgha ikiakoroarị, ọkọfịnị ḅo a dee pa ḅụ́gịrịrị ḅụ suuarị, kịrịnyẹ ofori árị na n sịbị koro ọ́rụ́ḅọ. 6Ḅọ́rọ́ ọ́rụ́ḅọ a sịbị gbẹẹgha, anị ibiḅam ḅẹẹ a gbẹ́rẹ́ sáá sịbị ma kịrịm. Anị kọkọ ḅụ́gịrịrịma nyẹ ḅẹẹ ọ́rụ́ḅọ a sịbị kọọrọm anịgha a sịbị kịrịị, anịgosi árị a sịbị gbẹ́ẹ̄. 7Owitụ́wọ ọ sịbị gbẹ́ẹ̄ na ibighaa tegó, ọ Tamuno fíafía náa ori fịnị ḅara diearị. Kụ́ma ọ́rụ́ḅọ owitụ́wọ fiafiama diearị. 8Nnị ọ́rụ́ḅọ ḅụ owitụ́wọ tẹ́mẹ́gha kụ́ma owitụ́wọ ḅụ anịị nnị ọ́rụ́ḅọ tẹ́mẹ́ nyẹẹ. 9Anịgha nnị owitụ́wọ tẹ́mẹ́ ọ́rụ́ḅọ goo kụ́ma nnị ọ́rụ́ḅọ tẹmẹm owitụ́wọ gosi. 10Sookumuapụ ma gosi anị ibim ḅẹẹ ọ́rụ́ḅọ a sịbị gbẹ́ẹ̄ nyẹ nyána, sị pa die ḅẹẹ árị a dee sughubie imii.
11Ḅọ́rọ́ owitụ́wọ ófórigha ọ́rụ́ḅọ ófórigha, ọ́rụ́ḅọ pịghị ofori ofori, owitụ́wọ ofori. 12Ḅẹẹ owitụ́wọ ḅụ anịị nnị ọ́rụ́ḅọ tẹ́mẹ́ pághámaḅo nyẹ anị gbẹ́rẹ́ ḅara ma ọ́rụ́ḅọ anị pịghị owitụ́wọ yii nyẹ; Tamuno anị pịghị nyẹ gonyẹ́ gonyẹ́ ḅara saghị ḅoarịḅọ.
13Ọmịnị ọ ḅára na kọọ anị karakárá ḅẹẹ ọ́rụ́ḅọ Tamuno tẹ́ghẹ̄arị warị a sịbị findi warị anị gbẹ́gha pa. 14Tegó, tuminikiri nyẹ fịnị ḅara kọkọ pa o die ḅẹẹ nángwọ sịbị núme owitụ́wọ sịbị ó ḅụ́gịrịrịma nyẹ. 15Kụ́ma ọ́rụ́ḅọ ḅụ, anịị a mịẹ fiafiama árịnyẹ, Árị nángwọ sịbị núme ma n pa a pịrịm ḅẹẹ a pa a ḅụ gbẹ́ẹ̄. 16Kụ́ma mịma na nụná bẹḅọ, a dugho ọ pịrị sị ọ mịẹbẹnyẹ anị ḅẹẹ, wamịnị anịgha Tamuno sọsị mamgba jẹ́ Tamuno tẹ́ghẹ̄ ḅara nyanagha.
Kị́nị́nyánáḅọ Tọ́ntọ́ Fị́nyẹ Ma
(Mat 26.26-29; Mak 14.22-25; Luk 22.14-20)
17Mị́sa a pa ọ pịrị dọghụ againma ma ḅụ, a ọ tuminigha tegó ọmịna susi Tamuno pịrị kobiri anị mịẹarị siinyẹ anị ibi nẹngịm. 18Párị nyẹ, n dugho ọ pịrịmam ḅẹẹ puama ọmịnị ogboku bie imi o ḅo kobirimaẹrẹ sọsị ḅara ḅẹẹ ọ tẹ́ghẹ̄, mịma a pịghị kálá ḅara pa anị mininim. 19(Pighi bẹnyẹ anị bie ofori, puama ọmịna ogboku bie fịnịbẹm sị karakáráma ḅụ fịnịapụ ma nnị ibima nna árị bẹ ḅara). 20Ó ḅo kobiri sáá, Tọ́ntọ́ fị́nyẹ ma anịị ọ fịarị nyẹ́gha, 21ọ nyẹ ma fịarị sáá, ọ́rụ́ḅọ ọ́rụ́ḅọ amịna fị́nyẹ fịịarị gbẹ́rẹ́ḅọ sọ kurugha pa, mịma gosi jẹ́apụ ḅurutarị ḅụ imi, jẹ́apụ ịrụ ḅuu tọ́rụ́ḅáma. 22Ọ́ warị nyánágha ọ fị sị pịghị ḅuu bẹ angaá ọ Tamuno sọsị ma dighisima bẹ sị bẹnyẹ bẹnyẹ nyánágháapụ ma pa ḅụ́gịrịrị bie sua bẹ? A tẹ́ dugho ọ pịrịbẹ mịma gbolomanyẹ? A ọ túminị́ bẹ? A ọkọ mịẹbịgha!
23A Kị́nị́nyánáḅọ ḅara daaḅom, a pịghị ḅọ́rọ́ma ọ pịrịarị dienyẹ ma, ḅẹẹ Kị́nị́nyánáḅọ Jizọs nnị ọ dẹrịfị éné dii ma ḅụ, ọ fịturu mpara akịm. 24Ịmịẹḅam pa Tamuno ma pịrị, anị puu warị ḅẹẹ, <<Mị ị́yẹ́ oju ma, n pa pịrịm ọmịna sịbị go. Ọ mịma mịẹsị pa i pa biekóróma.>> 25Anị gbẹ́rẹ́ ḅara ma n fị́nyẹ ma fị sọọ sáá ori ọmọngọ ma sághị akịm warị ḅẹẹ, <<Mịị ọmọngọ ma anịị Tamuno ịwọ ọḅọọ ma, ori ị́yẹ́ ọmbịnyẹ́ pa miẹtẹ́lẹ́ma nyẹ ị́ anị ḅuu sáá gonyẹ́ gonyẹ́ pa i pa biekóróma.>>
26Mịma dughoarị ḅẹẹ ị mị fịtúrú ma fị sáá gonyẹ́ gonyẹ́ pịghị mị ọmọngọ ma ḅụ ḅụụ sa gonyẹ́ gonyẹ́ i Kị́nị́nyánáḅọ ma fịị dugho pághámaarị akị mú o ḅo bẹ sáá láa. 27Anịgosi ḅọ́rọ́ kị́nị́ Kị́nị́nyánáḅọ fịtúrú ma fịfị na pịghị ori ọmọngọ ma bie ḅuu ḅuu anị ḅụgbẹ́gha ḅara i siinyẹ pa Kị́nị́nyánáḅọ oju ma na ọmbịnyẹ́ mịẹm. 28Anị ẹrẹ́sị, ibima párị ịḅụ peele dighi, anịsáa fịtúrú ma fị pịghị ọmọngọ ma bie ḅụụ. 29Ị ḅọ́rọ́ Kị́nị́nyánáḅọ ma oju sẹ́pịrịnyẹ ma lighilighiḅogha lighilighiḅogha i fịtúrú ma fịarị sa na pịghị ọmọngọ ma bie ḅuuarị sáá, i ḅẹ́rẹ́kọọ akuoo ịḅụ pịrịarị i fịị pịghị ḅụụ sáá. 30Anị ọ ḅụ tọghaapụ goo obikiri ḅụ iminyẹ jẹapụ ịnyọ ḅụ oforighaapụ sọnyẹ, tọghaapụ pịghị fịịmam. 31Wa ḅọ́rọ́ párị wa ḅụ peele dighi bẹ ọkụ́ma, wa Tamuno ḅẹ́rẹ́kọọ siri ḅụ sọbịgha. 32Kụ́ma Kị́nị́nyánáḅọ wa sịbị ḅẹ́rẹ́kọm pịghị fomḅara pa wa fom, sị n tuminikiriapụ na wa sua ḅẹ́rẹ́ ḅárásiapụ sọmabịgha ḅara.
33Anịgo, i jẹa mininiapụ okobirimaere ḅẹẹ ọ Kị́nị́nyánáḅọ ḅupiri fị́nyẹ ma fịị, o jụghọ jụghọ kúru 34Ọmịna bie fị́nyẹ táarịarịḅọ imi imi n ḅo tarị nyẹ fị wárị, sị Tamuno ḅẹ́rẹ́kọọ ma n ḅo sịbị gbanabịgha ḅara o kobirimaẹrẹ.
Isi angaá ḅẹ́rẹ́ ma a ḅo láa sáá a ọ daatụ́ghụ́mabẹm.
Currently Selected:
1 Kọrịntịapụ 11: IBY
Highlight
Copy
Compare
Share
Want to have your highlights saved across all your devices? Sign up or sign in
©2024 Luke Initiative for Scripture Translation
