Rom 3
3
1De emwi ne avbe Ju ghi ya maa sẹ avbe iran ne ẹ i re Ju yi khekherriọ? Ne a gha rhuẹ na zẹdẹ mwẹ esa ne ọ khin ra? 2Ẹsẹse, vbe ẹmwata, vbe odẹ hia. Vbe ne okaro, avbe Ju ọre Osanobua rhie ẹmwẹ ọnrẹn nẹ rhie mwẹ. 3A deghẹ eso vbe uwu iran ghi khian ne ọ hiẹ ọmwa vbo? Te ọnii ghi rhie maa ighẹ Osanobua gha vbe rhunmwuda ọnii hiẹ ọmwa ra? 4Hiehiere. Ọmwa ẹmwata ọre Osanobua khin, emwa hia gha rhe gha re ọhọn ohoghe, Zẹ vbene Ebe tae:
“U gha guan, te a gha rẹn ighẹ ẹmwata u ta.
A gha bu ohiẹn ruẹn, te u gha rri ase.”
5Sokpan a deghẹ a ghi miẹn wẹ emwi ne ima baku ru ọre ọ zẹẹ ighẹ a rẹn vbene Osanobua ru emwi ẹse hẹ vbo? Vbe ima gha ghi kha hẹ? Wẹ Osanobua ma ru ẹe ẹse vbe ọ gha rri ima oya? (Vbene emwa ne agbọn guan ọre I guan na.) 6Hiehiere. A deghẹ Osanobua i ta ẹmwata, vbe ọ ra na sẹtin bu ohiẹn agbọn na hẹẹ?
7Ẹn hẹn, a deghẹ te a i ta ẹmwata ọ ghi mẹ ghi fiante uyi Osanobua vbe kpa ne ọ na gie ẹmwata ọghọe ghi do vẹ ne agbọn rẹn sẹ ayọ vbo? Vbe ọ zẹ ne a na ye bu agbe gbe mwẹ wẹ ọmwa orukhọ mẹ khin? 8A ghi wa tae vbe nian khekherriọ wẹ, “Wa gie ima wa gha ru emwi dan ne emwi ne ọ maa miẹn ehe na gha rre ẹmwata,” emwa eso wa rhia mwẹ eni ruan nẹ vbe ne iran na ba mwẹ ifi ẹzọ wẹ erriọ ọre imẹ kha re. A gha hu ahe gbe iran na, zẹ vbene ọ kere ne iran.
Orhiọnkpa Ne Ọre Ọmwata Ẹ I Rrọọ
9A deghẹ erriọ nọ, ọ mwẹ emwi ne ima ne Ju ya maa sẹ avbe iran ne ẹ i re Ju ra khekherriọ? Hiehie re! I ka zẹ ọre uke nẹ wẹ avbe Ju kevbe avbe iran ne ẹ i re Ju, ọkpa ehia khin, ototọ ẹtin orukhọ ọre ehia ye. 10Zẹ vbene Ebe kha re:
“Ukpo orhiọnkpa ne ọ la ẹre ekhọe ẹ i rrọọ,
11orhiọnkpa ne ọ la ẹre ekhọe ẹ i rrọọ
ra ne ọ gualọ Osanobua.
12Emwa hia fi iyeke gbe Osanobua nẹ,
ehia ba odẹ ku nẹ.
Orhiọnkpa nọ ru emwi ne ọ maa ẹ i rrọọ,
kaka ọkpa kẹkan.
13Unu iran ye vbe idin ne ọ we unu uan.
Ohoghe ne ọ vẹ ẹki ọre ọ werriẹ ke aranmwẹ iran rre,
ẹmwẹ ne ọ yevbe obi ẹyẹn ghi gha ke akhuarhamwunu iran rre,
14unu iran vuọn ne ihẹn agan i bọ ọmọ.
15Gbe ẹe rua, rhia rua, ọre obọ na kẹ iran.
16Ọrhiae vbe ọzaghae ọre a ya rẹn ehe ne iran lae.
17Iran ma rẹn emwi ne a tie ẹre obẹlẹ ọfumwegbe,
18amawẹ ne iran ruẹ vbene a mu ohan Osanobua hẹ.”
19Ma rẹnrẹn wẹ emwa ne ọ yan Uhi ọre emwi ne ọ rre Uhi kan rẹn, ne a miẹn ehe na gbe ukhu aho gui emwa ne agbọn rua, ne a mu agbọn na hia ye obọ ibuohiẹn Osanobua. 20Ọmwa ne ogha sẹtin la ekpa ighẹ ọ mu nene Uhi sẹ khian ọmwata vbe odaro Osanobua, ẹ i rrọọ. Emwi ne nene Uhi ru ọrọre ne ọ rhie ma ọmwa wẹ re, ọ ru orukhọ.
Vbe Ne Osa Ya Ye Emwa Khian Ọmwata Hẹ
21Sokpan a ta ẹe ladian nẹ nian ighẹ vbene Osanobua ya ye ọmwa khian ọmwata vbe odaro ẹre hẹ, ọ ma zẹdẹ dekan uhi hiehie re. Te uhi kevbe avbe akhasẹ sẹ osẹ nẹẹn. 22A ya Jesu yi, ọre Osanobua rhunmwuda ẹre ya ọmwa khian ọmwata. Emwa hia ni ya Jesu yi, ọre Osanobua ru vberriọ rhunmwuda alughaẹn ne egbe i rrọọ hiehie re. 23Rhunmwuda, emwa hia ru orukhọ nẹ, iran keghi vbe khian rrei ne uyi imiẹnfan Osanobua. 24Sokpan vbekpa ẹsọhẹ Osanobua ne a rhie ne emwa vbe ọhẹ, a keghi la ekpa Jesu Kristi ne ọ fannọ iran ye otọ ye ehia khian ọmwata vbe odaro ẹre. 25Te Osanobua yae ru ọmwa ẹse wẹ rhunmwuda uwu ẹre, ne irẹn do khian emwi ne a la ekpa ẹre ya orukhọ bọ emwa vbe iran a ya ẹe yi. Te Osanobua ye Kristi ru ẹse ne ọ ya ma emwa ẹre vbene irẹn ya ye emwa khian emwata vbe odaro ẹre hẹ. Vbe ẹghẹ ne ọ gberra, Osanobua keghi ziengbe, ọ ma vbe zẹ ye orukhọ ne emwa ne agbọn ru. 26Sokpan banbanna nian, vbe ẹghẹ ne a ghi ye na, ọ rhuan orukhọ emwa ne agbọn ghe, ne ọ miẹn ehe na rhie maa iran ighẹ rẹn ya emwa khian emwata vbe odaro irẹn. Odẹ vbe nian ọre Osanobua ya rhie maa ighẹ ọmwata ọre irẹn tobọ ẹre khin, kevbe wẹ ọmwaikọmwa ne ọ mu ẹtin yan Jesu, te irẹn ya ẹe khian ọmwata.
27De emwi ne a ghi ra ya rhuọ vbe emwa na yi? Ẹ i rrọọ! Rhunmwuda vbe ọ khin yi? Rhunmwuda ighẹ ọmwa ru vbene nene Uhi kha re nọ ra? Ẹn o, sokpan rhunmwuda ighẹ ọ yayi. 28Vbene a ghi ya mu ẹmwẹ na ye owa ẹre ọrọre wẹ, iyayi ọkpa ọre ọ ye ọmwa khian ọmwata vbe odaro Osanobua, ighẹ ẹ i re ne ọ na ru vbene nene Uhi kha re. 29Ra ne ne Osanobua, Osanobua ọ ghe avbe Ju ọkpa nọ ra? Ẹ i re rẹn ọre ọ vbe re Osanobua avbe iran ne ẹ i re Ju ra? Ẹsẹse, rẹn vbe nọ. 30Ọkpa ọre Osanobua khin. Rẹn gha ye avbe Ju khian emwata vbe odaro ẹre zẹ vbene iyayi iran kha re, ọ ghi vbe ye avbe iran ne ẹ i re Ju khian emwata vbekpa iyayi iran. 31Ọnii rhie maa ra ighẹ te ima ya iyayi gbe ukhu nene Uhi rua? Hiehie re, vbene ẹmwata, te ima rhie nene uhi mwẹ.
@ The Bible Society of Nigeria, 1996