Rom 2
2
Ibuohiẹn Osanobua
1Ọse mwẹ, te uwẹ bu ohiẹn ọmwa ọvbehe ra? U i miẹn ẹmwẹ ọkpa ta ya fan egbe ruẹ ye otọ, ọmwa ne ọ rhirhi khọn ruẹn ne u gha khin. Rhunmwuda wẹ gha bu ohiẹn emwa ọvbehe, wẹ na vbe gha ru egbe emwi ne iran ru, ẹghẹ ni, u bu ohiẹn gbe egbe uẹ nẹ. 2Ma rẹnrẹn wẹ Osanobua gha bu ohiẹn emwa ni ru emwi vbe nian, ohiẹn ẹmwata ọre ọ buru. 3Sokpan, wẹ ne ọse mwẹ, wẹ ne ọ ru egbe emwi ne uwẹ bu ohiẹn ọnrẹn gbe emwa ọvbehe na, te uwẹ ro ighẹ ibuohiẹn Osanobua gha la uwẹ baan ra? 4Ra te uwẹ miẹn ọẹn fo ighẹ itohan rẹn nọkhua kevbe ifuẹko kevbe i ziengbe ẹre? Wẹ ma rẹn ighẹ te Osanobua ziengbe ne ọ rhie ẹghẹ nuẹn ne u ya fiwerriẹ? 5Sokpan ẹkoko udu ne ọ ze kevbe ne ọ wo vbe egbe ọre u mwẹ. Rhunmwuda ọnii te u yae kpọlọ yọ ighẹ oya ne a gha rriọ re vbe ẹdẹnẹdẹrriọ ne izohu Osanobua kevbe ihuohiẹn emwata ẹre gha rhie egbe maa. 6Rhunmwuda Osanobua gha hae ne dọmwadẹ ọghọe, zẹ vbe iwinna ne ọ winnaẹn. 7Emwa eso rrọọ ni winna iwinna esi khian, iran ghi gha gualọ uyi, kevbe ọghọ, kevbe ẹfe etẹbitẹ, Osanobua gha rhie ẹfe etẹbitẹ ne iran. 8Emwa ọvbehe vberriọ ni rẹn ọghe enegbe iran ọkpa, iran ma ye obọ ye ẹmwẹ emwi ne ọre ẹmwata, ne iran miẹn ehe na gha lele emwi ne ẹ i re ẹmwata. Osanobua gha hihiẹ okuosu kevbe ohu ẹre yan iran. 9Oya kevbe obalọ gha rrọọ ne emwa hia ni ru emwi dan, okaro ne avbe Ju, vbe iyeke ọnii, kevbe ne iran ne ẹ i re Ju. 10Sokpan Osanobua gha rhie uyi, ọghọ, kevbe ọfumwegbe ne iran ne ẹ i re Ju. 11Rhunmwuda, aro ọkpa ọre Osanobua ya ghe emwa hia.
12Iran ne ẹ i re Ju i mwẹ Uhi e Mosis, iran gha ru orukhọ, iran ghi vbe fuẹn uan vbe ne Uhi nii i na rrọọ. Avbe Ju mwẹ Uhi, iran gha ru orukhọ, a ghi vbe lele Uhi ni bu ohiẹn iran. 13Rhunmwuda ẹ i re rhunmwuda ighẹ a họn ẹmwẹ nene Uhi ọre a ya rri asẹ vbe odaro Osanobua, sokpan ne a gha ru vbene Uhi ni kha re. 14Iran ne ẹ i re Ju i mwẹ nene Uhi, sokpan iran gha ye ekhọe obọ iran ru vbene nene uhi kha re, ẹghẹ nii iran ọre ọ ghi tobọ iran re nene Uhi ne egbe iran, a gha rhe miẹn wẹ iran i mwẹ nene Uhi. 15Uyinmwẹ iran rhie maa ighẹ a gbẹnnẹ egbe emwi ne Uhi ni ho ye ekhọe iran. Ekhọe iran vbe rhie maa wẹ ẹmwata ọna khin vbe ne a na miẹn wẹ, ekhọe iran zẹdia bu asẹ ne iran, ugbẹnso, ọ ghi vbe gha gu iran gui. 16Zẹ vbene Iyẹn Ne ọ maa ne I kpe orhu ẹre kha re, erriọ ọre ọ khian gha ye vbe Ẹdẹnẹdẹrriọ, ne Osanobua gha la obọ Jesu Kristi bu ohiẹn iro ẹkhokho ni rre ekhọe emwa hia.
Avbe Ju Kevbe Nene Uhi
17Wẹ vbo? Ẹ i re Ju ọre u tie egbe ruẹ re, u mu ẹtin yan nene Uhi gha ya Osanobua rhuọ. 18U rẹn emwi ne Osanobua ho ne u gha ru, nene Uhi vbe ma ruẹn re nẹ ne u gha dobọ mu emwi ne ọre ne ọkere. 19Ekhọe ruẹ mu ẹẹn nẹ, ighẹ wẹ ọrọre arọndẹ ne iran ni rhu aro, uwanmwẹ ne iran ni rre uwu ebiebi. 20Ne ọ gie odẹ ma enọkọẹn, ọmamwaemwi avbe igbama. Ekhọe ruẹ muẹn nẹ wẹ vbekpa nene Uhi, emwi hia ni rre uwu irẹnmwi kevbe ẹmwata suẹ obọ nẹ fẹẹrẹ. 21Wẹ ne ọma emwa ọvbehe emwi, vbe ọ zẹ ne u ma na ma egbe ruẹ re? U kpe orhu kha wẹ, “Wa ghẹ rha,” wẹ tobọ ruẹ vbo, wẹ rha ra? 22U khare wẹ, “Wa ghẹ ghẹ.” Sokpan, wẹ ghẹ ra? Te amazẹ hia wa sọnnọ ọn, sokpan u do emwi hẹ vbe aro ẹbọ ra? 23U rhuẹ khian ighẹ uhi Osanobua guẹ, sokpan wẹ ye ekhue mu Osanobua vbekpa ne u na rra uhi ẹre ra? 24Rhunmwuda Ebe tae wẹ, “Rhunmwuda avbe uwa ne Ju, eni Osanobua keghi khian ne avbe iran ne ẹ i re Ju ghi ye ukpẹ sakan.”
25U gha ru vbene nene Uhi khare, ọre arhuẹ ruẹ na mwẹ esa. Sokpan adeghẹ u i ru vbene nene Uhi kha re, esa ne ọ ma rhuẹ ọre u ye. 26Adeghẹ ọmwa ne ẹ i re Ju, ne ọ ma vbe rhuẹ ru vbene nene Uhi kha re, ẹ i re te Osanobua gha ka ẹe ye enọ rhuẹre ra. 27Avbe iran ne ẹ i re Ju ọre ọ ra bu ohiẹn gbe avbe uwa ne Ju na. Rhunmwuda, u rra nene Uhi, egbe ne a rhe ya gbẹn ọẹn yu uẹ otọ, u keghi vbe rhuẹ, vberriọ iran i ru vbene nene Uhi kha re egbe ne a ma rhe ya rhuẹ iran vbe ọghe ikinnegbe. 28Ne a ta ẹmwata, gha ọ re Ju ne Ju ne a gele rhuẹ yi? Ẹ i re Ju ne ọ ye ikinnegbe re Ju ne arhuẹ ọre re ọghe ikpakpa egbe kẹkan. 29Sokpan e Ju ne ọ gele re Ju ọrọre ne ọ re Ju vbe ekhọe, ọnii nọ wẹ ne a rhuẹre vbe uwu ekhọe, emwi na keghi re iwinna ne Orhiọn Osanobua winna ighẹ ẹ i re Uhi ne a gbẹnnẹ ye otọ. Ọmwa vbe nian, Osanobua ọre ọ tian rẹn ighẹ ẹ i re emwa ne agbọn.
@ The Bible Society of Nigeria, 1996