Nọmbas 28
28
Izẹọhẹ Ẹghẹ Hia
(Ẹksọdọs 29:38-46)
1E Nọyaẹnmwa keghi tama e Mosis wẹẹ, 2ne ọ tama ivbi Izrẹl wẹ ne iran gha viọ emwi izẹ ọhẹ evbare gie Nọyaẹnmwa vbe ẹghẹ ne a zẹ yọ, zẹ vbe ne ọ yẹ ọre.
3Izẹọhẹ evbare ne a gha viọ gie Nọyaẹnmwa ọ re ena khin: vbe ọghe ese ne a giẹn uan ọghe ẹdẹgbegbe vbọ, ivbi ogho ne ọ he rre ukpo ọkpa ne ẹ i mwẹ okan. 4A ghi ya oteghe ohuan ne okaro zẹ ọhẹ vbe owiẹ kevbe ne ogieva vbe ota. 5A ghi vbe zẹ ọhẹ ọka ba ehia, uwan eva Ọghe irhuarhua ne a ya ofigbọn oliv uwan eva ne ọ maa sẹ gbe. 6Ọna ọrọre izẹọhẹ evbare, emwi ne ọ winhin yẹ e Nọyaẹnmwa. 7U ghi hihiẹ ọgọ ayọn eva ye aka zẹ vbe ayọn ne a mu lele oteghe ohuan ne okaro.
8Ota gha ghi rre, u ghi vbe ya oteghe ohuan ne ogieva zọ ese zẹ vbene a vbe ruẹe vbe owiẹ ke ẹe kevbe ayọn izẹọhẹ. Izẹọhẹ evbare vbe nọ, emwi ne ọ winhin yẹ Nọyaẹnmwa.
Izẹ Ọhẹ Ẹdẹ Ikẹtin
9Ọ gha sẹ Ẹdẹ Ikẹtin, u ghi ya ivbi ogho eva ne ẹ i mwẹ okan zọ ese kevbe uwan irhuarhua enẹ ne a ye ofigbọn oliv gbe zẹ vbe izẹ ọhẹ ọka deba izẹ ọhẹ ayọn. 10A ghi gha zọ ese na giẹn uan na Ẹdẹ Ikẹtin hia deba ese ne a zọ ẹdẹgbegbe ba ayọn izẹọhẹ.
Izẹọhẹ Ikpẹdẹ Ne Okaro Vbe Uki
11Wa ghi gha zọhẹ na giẹn uan gie Nọyaẹnmwa vbe omuhẹn uki hia, ena ọre ivbi ẹkhuia ẹmila eva, ogho ọkpa, ivbi ogho ni he rre ukpo ọkpa ihinrọn, e hia ghi gha re ne ẹ i mwẹ okan. 12Izẹọhẹ ọka ni rrọọ ghi gha re vbe nian, irhuarhua ghi lele ẹkhuia ẹmila ọkpọkpa, uwan enenẹ ọghe irhuarhua ghi lele ogho ọkpọkpa, 13uwan eva ghi lele oteghe ohuan ọkpọkpa. Ese na giẹn uan na, izẹọhẹ evbare nọ, emwi nọ winhin yẹ Nọyaẹnmwa.
14Ayọn ne ọ wa lelẹe khian keghi re ọgọ enenẹ vbe ẹkhuia ẹmila ọkpọkpa, ọgọ eha vbe ogho ọkpa, ọgọ eva vbe oteghe ohuan ọkpa. Emwamwa na keghi re ọghe ese na giẹn uan ọghe ikpẹdẹ ne okaro vbe uki, ukpo te ya gba. 15U ghi gbe ovbukhọ ba emwi izọese ẹdẹgbegbe zẹ vbe izọese orukhọ.
Izẹọhẹ Vbe Ẹghẹ Emwiukpo Ebrẹd Ne Ọma Hue
(Levitikọs 23:5-14)
16A ghi ru Emwiukpo Alagberra ya ya ọghọ ne Nọyaẹnmwa vbe ikpẹdẹ ne ogiwenẹ ọghe uki ne okaro. 17Vbe ikpẹdẹ ekesugie vbọ, emwiukpo ugamwẹ ne ọ ya ikpẹdẹ ihinrọn vbotọ ghi suẹn. Vbe uwu ẹghẹ na, ebrẹd ne a ma ya eyist gbe ọkpa ọre a re. 18Vbe ikpẹdẹ ne okaro ọghe emwiukpo na, wa ghi si koko ne uwa ru ugamwẹ, a ghẹ vbe winna iwinna rhọkpa. 19Wa ghi zọ ese na giẹn uan zẹ vbe izẹ ọhẹ evbare ne Nọyaẹnmwa: ena ọrọre ivbi ẹkhuia eva, ogho ọkpa kevbe ivbi ogho ne ọ he rre ukpo ọkpa ihinrọn, ehia ghi gha re ne ẹ i mwẹ okan. 20U ghi ru izẹọhẹ ọghe irhuarhua ne a ya ofigbọn oliv gbe zẹ vbe izẹọhẹ ọka vbe ne ọ kere, uwan ehan ghi lele ẹkhuia ọkpọkpa, uwan enenẹ ghi lele ogho ọkpọkpa. 21Uwan eva ghi lele oteghe ohuan ọkpọkpa. 22U ghi vbe gbe ovbukhọ ọkpa zẹ vbe ese orukhọ, u ghi la odẹ vberriọ ru iruemwi akpehuan ne emwa nii. 23U ghi ya ena zọ ese ba ese na giẹn uan owiowiẹ ne a wa zọ.
24Erriọ wa gha vbe ya zọ ese izẹọhẹ evbare ghe Nọyaẹnmwa la ikpẹdẹ ihinrọn, emwi ne ọ winhin yẹ Nọyaẹnmwa nọ, wa ghi ye ọna zẹ ọhẹ ba ese ne a giẹn uan ẹdẹgbegbe kevbe izẹọhẹ ọghe ayọn. 25Vbe ikpẹdẹ ne ogihinrọn, wa ghi si koko ne uwa ru ugamwẹ, wa ghẹ winna iwinna rhọkpa.
Izẹ Ọhẹ Vbe Ẹghẹ Emwiukpo Akọrhọre
(Levitikọs 23:15-22)
26Vbe ikpẹdẹ ne okaro ọghe Emwiukpo Akọrhọre, ẹghẹ ne uwa ya viọ ọka akọrhọre gie Nọyaẹnmwa, wa ghi si egbe koko ru ugamwẹ, wa ghẹ winna iwinna rhọkpa. 27Wa ghi ya avbe emwi na zọ ese na giẹn uan zẹ vbe emwi ni winhin yẹ Nọyaẹnmwa, ivbi ẹkhuia ẹmila eva, ogho ọkpa kevbe ivbi ogho ihinrọn ni he rre ukpo ọkpa, ehia ghi gha re ne ẹ i mwẹ okan. 28Deba izẹọhẹ ọka zẹ vbene ọ kei yi, irhuarhua ne a ya ofigbọn oliv gbe, uwan ehan ghi lele ẹkhuia ọkpọkpa, uwan enenẹ ghi lele ogho ọkpọkpa. 29Uwan eva ghi lele oteghe ohuan ọkpọkpa. 30U ghi vbe ya ovbukhọ ọkpa zọ ese orukhọ, odẹ vberriọ, u ghi ru iruemwi akpehuan ne avbe emwa nii. 31U ghi ya ena kevbe ayọn zẹ ọhẹ deba ese na giẹn uan ẹdẹgbegbe le izẹ ọhẹ ọka.
Currently Selected:
Nọmbas 28: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
