Nọmbas 27
27
Ivbi E Zẹlofehad Ne Ikhuo
1E Mala, e Noa, e Hogla, e Milka, kevbe Taza kegha re emọ ikhuo ọghe Zẹlofehad ne ovbi Hẹfa, ne ovbi Giliad ne ovbi e Makẹ ne ovbi e Manasẹ ne ovbi e Josẹf. 2Iran keghi ya mudia ye odaro e Mosis. Eliaza ne ohẹn, avbe ọkaolotu kevbe emwa Izrẹl hia, vbe onurho Owa Ukpọn Ile, iran na kha wẹẹ, 3“Erha ima wu vbe otọ ẹgbo vbe ne ẹ i na mwẹ ọmọ okpia, rẹn i re ọkpa vbe uwu emwa ni yaba e Kora sọtẹ ghe Nọyaẹnmwa, orukhọ ọghe obọ ẹre ọre ọ gbe ẹe. 4Vbọzẹ ne eni erha ima gha na gbe ẹro rhunmwuda ighẹ ọ ma biẹ ọmọ okpia. Wa ghae emwi ẹgbẹe ne ima vbe uwu ẹbu avbe etẹn erha mwa.”
5E Mosis keghi mu ẹzọ iran bu e Nọyaẹnmwa gha dee. 6Ẹre Nọyaẹnmwa na tama rẹn wẹẹ, 7“Emwi ẹmwata ọre ivbi Zẹlofehad nọ rẹn, ghae emwi ewe ne iran vbe uwu ẹbu etẹn erha iran. Wa gie emwi ukhu ẹre do gha re ọghe iran. 8Tama ivbi Izrẹl wẹ a deghẹ ọmwa wu vbe ne ẹ i na mwẹ ọmọ okpia, ovbi ẹre ne okhuo ghi rri ukhu ẹre. 9A deghẹ ẹ i mwẹ ọmọ okhuo, avbe etiọnrẹn ne ikpia ghi rri ukhu ẹre. 10A deghẹ ẹ i mwẹ etẹn ne ikpia etẹn erha ẹe ghi rri ukhu ni. 11A deghẹ ẹ i mwẹ etẹn ikpia ra etẹn erha, ẹghẹ nii ọtẹn ne ọ ghi si kẹ ọre sẹ ghi rri ukhu nii, ọ ghi da ẹe yi zẹ vbe ọghe ọe. Ivbi Izrẹl ghi da ẹmwẹ na yi zẹ vbe ilele uhi zẹ vbene imẹ ne Nọyaẹnmwa yi ẹre iyi ne uẹn.”
A Zẹ Jọsua Ne Ọ Rhie Ihe Mosis
(Diuteronomi 31:1-8)
12E Nọyaẹnmwa keghi tama e Mosis wẹẹ, “Hin uhunmwu Oke Abarim ne u tọn aro mu ghe otọe ne I mu ne ivbi Izrẹl. 13U gha ghi bẹghe ẹre nẹ, u ghi wu zẹ vbene Errọn ne ọtuẹn vbe wu. 14Rhunmwuda wa eva ọre ọ sọtẹ uhi mwẹ vbe ẹgbo e Zin. Ẹghẹ ne emwa ni na gha gui ẹzọ uwu unu ghe mwẹ vbe Mẹriba. wa ma kue ne uwa miẹn ẹtin mwẹ nọhuanrẹn kue ma iran.” (Mẹriba ọrọre ẹzẹ ne ọ rre Kedẹs vbe uwu ẹgbo Zin).
15E Mosis keghi na erhunmwu wẹẹ, 16“E Nọyaẹnmwa ne Osanobua, ehe ne arrọọ hia ke rre, lahọ zẹ ọmwa ne ọ gha sẹtin su emwa na. 17Ne ọ gha vbe sẹtin gha su iran ye igbinna ne emwa ruẹn ghẹ do ye vbe ohuan ne ẹ i mwẹ ọsuohuan.” 18E Nọyaẹnmwa keghi tama e Mosis wẹẹ, “Rhie Jọsua ne ovbi e Nọn, okpia ne ọ sẹ ihe ne u viọ obọ ruẹ yan ẹre uhunmwu. 19U ghi rhie ẹre mudia ye odaro Eliaza ne ohẹn kevbe emwa nii hia, ne u vbe sirra iran tae ighẹ rẹn ọ re ọ ra rhie ihe ruẹ. 20Rhie eso vbe asẹ ruẹ ne ẹẹn, ne ivbi Izrẹl miẹn ehe na gha họn ẹmwẹ nẹẹn.
21“Eliaza ne ohẹn ọre rẹn ra ye aro khọ, ọmwa ne ọ gha ya Urim kevbe Tumin gualọ otọ emwi ne I ho. Odẹ vbenian Eliaza ọre ọ ra gha dia e Jọsua kevbe emwa Izrẹl hia vbe emwi ne iran ra gha ru hia.” 22E Mosis keghi ru ẹẹ vbene Nọyaẹnmwa tama rẹn. Ọ keghi rhie Jọsua mudia ye odaro Eliaza ne ohẹn ke emwa ni hia. 23E Mosis keghi viọ obọ yan Jọsua uhunmwu ze vbene Nọyaẹnmwa tama rẹn, ọ na ma ẹre ọmwa ne ọ rhie ihe irẹn.
Currently Selected:
Nọmbas 27: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
