Nahum 2

Udemwẹ E Ninevi

1E Ninevi, ghe vbe iran hẹ rhu uẹ!

Ẹtin ne ọ ra duẹ ruẹ ua rre nẹ!

Viọ emwa ye ogba ikhẹegbe ruẹ;

mu egbe khẹ okuo!

2(Te Nọyaẹnmwa ghi ra rhie uyi Izrẹl dọlegbe ye ihe, zẹ vbene ọ te gha ye ẹkpo ne avbe eghian rẹn ma na he zanzan ẹẹn ruan.)

3Avbe ivbiyokuo eghian ni viọ asa ni baa mwẹ obọ,

iran keghi vbe yọ ẹwu ukpọn ne ọ baa.

Iran mu egbe ne iran ya hẹ rhu ẹe

ikẹkẹ okuo iran gha kpannọ ogiọnmwẹ erhẹn zẹ vbe erhẹn.

Avbe ẹsin iran gha vin yo vin rre!

4Ikẹkẹ okuo iran wa vinnọ uvinnọmwẹ ẹrhia lele adesẹ ore.

Iran gha khọn yo khọn rre vbe ughe.

Iran gha baa vbe ukpekhọe,

iran vbe sanmwẹ yo sanmwẹ rre vbe ayan.

5A tie avbe ọkaolotu iran ye iko,

iran rrua owẹ vbe iran yẹn egbe ghe odaro.

Iran ni gu iran gbinna bi ghe odẹ ekẹn,

iran keghi mu asa ye odẹ khẹ olẹtin ne

ọ dunmwu iran an.

6Urho ni rre odẹ ẹzẹ yannọ ye otọ

ohan nọkhua keghi vuọn ẹguae.

7A mu oloi oghunmwu;

avbe eguọmwadia ẹre gha viẹ vbe idu

iran kegha ye obọ akhiẹ gbe ẹwẹe.

8Emwa hia hii lahin e Ninevi rre,

zẹ vbe amẹ uhae ne ọ vẹ ua,

ọmwa ọkpa datu wẹẹ,

“Wa mudia! Wa mudia!” A kakabọ ye ugomwẹ ta ẹe

sokpan a ma miẹn ne ọ gbearoghe iyeke.

9Wa fu avbe esiliva viọ, wa fu igoru viọ.

Ẹfe wa vuọn ẹvbo nii!

10A fuẹn Ninevi ua,

a hee ẹe ye otọ, ọ dihoi rua!

Ẹtin hia ranran an rhunmwuda ohan,

igbọn gha rhie gbe egbe, ẹtin fo.

Te aro ghi reghe ua vbe uhunmwu.

11Okpẹvbo nii ghi vbo yi?

Ẹvbo ne ọ te ye vbe uvun oduma,

ehe ne a na te koko ivbi oduma

ehe ne oduma ọwẹe kevbe oduma amwẹ ye,

ne ivbi iran na gu iran rrọọ vbe a i mwẹ ẹbe?

12Oduma gbe emwi ne ọ ra re nẹ,

ọ keghi yanghaan ẹre ukhiọnmwẹ ukhiọnmwẹ ne amwẹ kevbe ivbi ẹre

ọ ye efun ne a yanghaẹn vuọn uvun ẹnrẹn.

13Nọyaẹnmwa ne Oghodua khare wẹẹ, “Oghian uwa ọ re I khin. I gha giẹn avbe ikẹkẹ okuo uwa a. A gha gbele avbe ivbiyokuo uwa vbe okuo. I gha vbe viọ emwi hia ne uwa miẹn emwa ọvbehe re gha rrie. A i ghi dọlegbe họn ẹmwẹ ukọ ruẹ ọvbehe.”

Currently Selected:

Nahum 2: EDO96

Highlight

Copy

Compare