Nahum 1
1
1Uhunmwu ne a giee vbe ekpa Ninevi ọ re ọna khin, zẹ vbene ọ gbẹn ọẹn ye otọ vbe ekpa umian ne ọ miẹn ighe Nahum ne ovbi ẹvbo ne a tie ẹre Ẹlkos.
Ohu E Nọyaẹnmwa Ghe Ninevi
2E Nọyaẹnmwa i zẹdẹ kue ne ọmwaikọmwa gu ẹe mwa ẹrrẹe;
te ọ rri iran ni gbe odan ghe ẹre oya.
Ọ ha ẹre werriegbe ne iran vbe ohu ẹre.
3Ohu i rherhe mu e Nọyaẹnmwa sokpan rẹn mwẹ ẹtin,
ẹ i gie ọmwa ne ọ rria abe gha rrie vbe ne ọ ma na rri oya.
Okpẹhoho guakpao, vbe ehe ne Nọyaẹnmwa khian la;
okuku amẹ, ebubẹ ne owẹ ọre gbe nọ!
4Ọ gu okun guan ọ keghi ka mu otọ!
Ọ ru ẹe ne avbe ẹzẹ ka mu otọ.
Oha ni rre Basan luẹluẹe.
Te Oke Kamẹl ghi ba rriẹrriẹ,
obobo ni rre Lebanọn fafaa.
5Avbe oke nekhua mu rueghe vbe ehe ne Nọyaẹnmwa ye
avbe oke negiẹrẹ ranraẹn vbe odaro ẹre.
E Nọyaẹnmwa gha ladian, otọe ghi mu rueghe.
6Ohu gha mu ẹẹn, de ọmwa ne ọ gha miẹn uhunmwu?
De ọmwa ne ọ gha miẹn uhunmwu vbe obọ ohu ẹre nọkhua?
Ọ hihiẹ ohu ẹre ne ọ baa vbe erhẹn ladian,
avbe okuta nekhua rẹnkhẹn uan
iran khian ebubẹ vbe odaro ẹre.
7E Nọyaẹnmwa wa maa
ọ degue avbe emwa rẹn vbe ẹghẹ ibaro;
ọ gbe aro ghe iran ni lẹ bu ẹre rre.
8Ọ fuẹn avbe eghian rẹn uan fẹẹrẹ,
zẹ vbe orogho nọkhua ne ọ khọn khian,
iran ni gbe odan ghe ẹre, ọ gha wa viọ iran la uwu.
9De uma ne uwa si ghe Nọyaẹnmwa yi?
Ọ gha fuẹn uwa a.
A i miẹn ne ọ sẹtin gbe odan ghe ẹre gberra uhukpa.
10A gha giẹn uwa a, zẹ vbe igban ni kinnọ egbe kevbe ebe ne ọ kakae.
11E Ninevi ehe ne u ye ọ re okpia ọkpa kegha dee, ọmwa ne ọ vuọn ne uma dan, rẹn keghi vbe khuan khẹ e Nọyaẹnmwa. 12Vbenian ọ re Nọyaẹnmwa tama ivbi Izrẹl ne emwa rẹn: “A gha rhe miẹn wẹ ivbi Asiria wegbe, iran vbe bun, a gha fuẹn iran an, a ghi ho iran bẹkun. Wa ne emwa mwẹ, I gie uwa sẹ usẹ, sokpan, I i ghi dọlegbe ru ẹe vberriọ. 13I gha dobọ ẹtin ne Asiria mwẹ vbe uhunmwu uwa yi, I ghi vbe bunnọ ọgiọrọ ne ọ ya munọ uwa gbalọ.” 14Ẹmwẹ ne Nọyaẹnmwa ye ẹre iyi vbe ekpa Asiria ọ re ọna khin: “Iran i ra miẹn ivbi uniẹn iran ne ọ gha khuẹnniẹn eni iran khian, I gha guọghọ ehia ighe avbe amazẹ ni rre aro ẹbọ iran. I fian idin ye otọ khẹ ivbi Asiria nẹ. Ọ ma kei ne iran di agbọn ya.” 15Ghe vbe odibo ọkpa rhie iyẹn ne ọ maa ke avbe uhunmwu oke ni yo dee! Ọ dee do na iyẹn akhọnmiotọ! Wa ne ivbi e Juda, wa do ugie emwiukpo uwa ne uwa ha emwi ne uwa ye ekhọe uwa ve ne Nọyaẹnmwa. Emwa dan i ghi dọlegbe mu okuo la otọ uwa ọvbehe. A fuẹn iran an nẹ fẹẹrẹ.
Currently Selected:
Nahum 1: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
