Mak 7
7
Vbene Avbe Enikaro Khare
(Matiu 15:1-9)
1Avbe Farisi kevbe enimaemwa Uhi eso ni ke Jerusalẹm rre keghi do doga Jesu. 2Iran miẹn wẹ eso vbe uwu avbe erhuanegbe ye obọ “Ne ọ ma huan” rri evbare, ọ ni nọ wẹ iran ma lele ọbakpe obọ zẹ vbe ne avbe Farisi mwamwa ẹn na gha ruẹ.
( 3Rhunmwuda avbe Farisi kevbe avbe Ju nekpa hia, uyinmwẹ ne iran miẹn vbe obọ avbe enikaro ọre iran gba mu mwẹ obọ, iran ma lele ọbakpe obọ nẹ iran i rri evbare. 4Emwi ne a rhirhi dẹ ke ẹki rre, iran ma kpe ẹe nẹ, iran i rri ọe. Ilele ni bun vberriọ ne iran do vba vbe otọ iran ghi wa gha lele ẹe, zẹ vbene a na lele ọbakpe avbe ukpu, akhe, ọkpan ẹrọnmwọ kevbe ukpo ne a vbiẹ.) 5Rhunmwuda ọnii avbe Farisi kevbe iran ni ma emwa Uhi nọọn Jesu wẹẹ, “Vbọzẹ ne avbe erhuanegbe ruẹ i na ya ẹmwẹ enikaro ru emwi yi, sokpan iran ghi gha ya obọ ne a ma kpe rri emwi?”
6Jesu zẹ wanniẹn iran wẹẹ, “Ẹmwata ọre Aizaia wa ta vbe ẹmwẹ ne ọ guan vbe ekpa uwa. Emwa ẹkẹ vbe iwẹnwẹn wa khin zẹẹ vbene ọ gbẹn ọẹn.
“ ‘Osanobua khare wẹẹ,
Ukpunu avbe emwa na ya ye ọghọ mẹ,
sokpan ekhọe iran khian rrei mẹ.
7Ọga ne iran ga mwẹ i mwẹ esa,
ugbẹn vbe a miẹn wẹ iran ma emwa Uhi emwa kẹkan,
vbene a gha kha wẹ uhi Osanobua nọ!’ ”
8Jesu keghi khama iran wẹẹ, “Wa sẹ uhi Osanobua rae ye otọ, wa na gha lele uhi emwa kẹkan.”
9Jesu keghi ye rhie tẹe wẹẹ, “Ẹkẹ vbe ero ọre uwa hẹko ya fi iyeke gbe ẹmwẹ Osanobua, ne uwa miẹn ehe na gha zẹ ne egbe uwa ru. 10Rhunmwuda Mosis yi ẹre iyi wẹẹ, ‘Ya ọghọ ne erha kevbe iyuẹ,’ kevbe wẹ, ‘Ọmwa ne ọ rhirhi kpa unu ghe erha ẹe ra iye ẹe ne a gha gbe ẹe rua.’ 11Wa ghi ra kha, wa wẹẹ, ‘Deghẹ ọmwa mwẹ emwi ne ọ gha te ya ye erha ẹe ra iye ẹe obọ, ọ na ghi kẹ ọre ya kha nẹ wẹ, Kọban nọ’ (emwi ne a ya ọnii kha ọrọre, a yae fi ohan ne Osanobua.) 12Ẹ i ghi ru ne erha, ẹ i ghi ru ne iye ọvbehe. 13Wa ma miẹn ighe wa so uhi Osanobua gọọ, wa na rhie ọ wua ye ihe ẹre gha ma emwa ẹre. Egbe emwi vbe nian ne uwa ru i re avbiẹ.”
Avbe Emwi Ni Ya Ọmwa Khian Ne Ọ Ma Huan
(Matiu 15:10-20)
14Ẹghẹ ni ọre Jesu na dọlegbe tie emwa ni gbe ẹbu ye evba, ọ tama iran wẹẹ, “Wa hia fẹẹrẹ wa danmwehọ mwẹ ne ọ miẹn ehe na la uwa ekhọe. 15Emwikemwi ne ọ ghi ke ore egbe la uwu egbe nẹ, ne ọ sẹtin ya ọmwa khian ne ọ ma huan ẹ i rrọọ, sokpan emwi ni ke uwu ọmwa ladian ọre ọ ya ẹe khian ne ọ ma huan. [ 16Ne ehọ re họn ẹmwẹ, gi ẹe họn.]”
17Ọ ghi kpao vbe ehe ne emwa gbe ẹbu yi la owa nẹ, avbe erhuanegbe ẹre keghi do nọ rẹn otọ itan nii. 18Jesu tama iran wẹẹ, “Ẹwaẹn uwa ma vbe sẹ ọghe emwa ọvbehe khekherriọ. Wa rẹn otọ ẹre ra? Emwi ne ọ ke ore la uwa ọmwa, ẹ i ya ẹe khian ne ọ ma huan. 19Rhunmwuda, ọ ma la uwu ekhọe ẹre, ẹkpokhurhu ọre ọ lao, ọ ghi levba hin uwu egbe rre.” [Zẹ vbe ne ọ tae na, te Jesu ghi kha ighe a sẹtin rri evbare hia.]
20Ọ keghi rhie tẹe wẹẹ, “Emwi ne ọ ke uwu ọmwa ladian ọre ọ ya ẹe khian ne ọ ma huan. 21Rhunmwuda, uwu ọmwa ọre iro dan ne ọ ya ẹe ru emwi dan hia ke ladian, alama, oyi, izigha. 22Oghẹ, arovbẹmwẹ, uyinmwẹ ẹrhia hia, erẹrẹ, ohoghe, igbọvo, ọtakhọ, itengbemu kevbe ukọnmwẹ. 23Uwu ọmwa ọre emwi na hia ke ladian, iran ghi ya ọmwa khian ne ọ ma huan.”
Iyayi Okhuo Ọkpa
(Matiu 15:21-28)
24Jesu keghi kpao vbe evba gha rrie avbe ẹvbo ni lẹga Taia. Ọ keghi la uwu owa ọkpa, ọ ma vbe ho ne ọmwa rhọkpa rẹn ighẹ rẹn rre evba, sokpan ọ ma gia rhie lẹre. 25Okhuo ọkpa ne orhiọn esu rre uwu ovbi ẹre ne okhuo keghi họn ẹmwẹ Jesu, ọ keghi bu ẹre gha dee, ọ de fi iguẹ vbe akharha ẹre. 26Okhuo na kegha re ọrriọvbe, ẹvbo ne a tiẹre Fonisia ne ọ rre Siria ọre a na biẹ ọe. Ọ rinmwian Jesu ne ọ khu orhiọn esu nii hin uwu ovbi irẹn rre. 27Sokpan Jesu wanniẹn tama rẹn wẹẹ, “Gia ka koko emọ nẹ, rhunmwuda ọ ma kei ne a viọ evbare ne a ya koko emọ ne avbe ekita.”
28Okhuo nii wanniẹn wẹẹ, “Sokpan avbe ekita ye vbe rhọ iku evbare ni ke eteburu emọ kharha ku otọ re.”
29Rhunmwuda ọnii Jesu tama rẹn wẹẹ, “Gha rrie owa, rhunmwuda ẹmwẹ ne u tae na, orhiọn esu ni lahin uwu ovbi uẹ rre nẹ.”
30Rẹn keghi gele gha rrie owa, ọ na do vba ighe ovbi ẹre lovbiẹ ye ukpo, orhiọn esu vbe lahin uwu ẹre rre nẹ.
Jesu Sinmwi Okpia N Ọ Re Odin Ne Ayin Ehọ
31Jesu keghi kpao vbe isoko Taia, ọ na la Saidọn defi ọkpẹn odighi e Galili vbe ọ la Odẹ Ẹvbo Igbe gberra nẹ. 32Iran keghi rhie okpia ne ayin ehọ ne ẹ i vbe sẹtin guan ẹse bu ẹre rre, iran rinmwian Jesu ne ọ viọ obọ yan rẹn. 33Jesu keghi rhie ẹre hin uwu ẹbu rre, ọ na viọ ikpinhianbọ ye ẹre ehọ, ọ keghi tu asẹn ya kan okpia ni aranmwẹ. 34Jesu keghi tọn aro mu ghe odukhunmwu, ọ keghi kakabọ gbẹtin, ọ tama okpia ni wẹẹ, “Ephphatha,” ọnii nọ wẹ, “Kie ye otọ.”
35Vbe ọwarọkpa nii, ehọ okpia ni keghi kie, aranmwẹ ọnrẹn keghi rhan, ọ na suẹn gha guan sai sai. 36Jesu keghi tama iran hia wẹ ne iran ghẹ tama ọmwa rhọkpa. Sokpan vbene irẹn ya tua unu mu ẹn erriọ iran vbe ya gha bọnmwẹ ọẹn khian.
37Unu keghi yan emwa hia ni họn ẹn, iran wẹẹ, “Ọ dọlọ emwi hia yi, ọ ruẹe ne odin gha guan ọ vbe ruẹe ne ayin ehọ gha họn ẹmwẹ.”
Currently Selected:
Mak 7: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
