Mak 14
14
Iran Ko Iko Jesu
(Matiu 26:1-5; Luk 22:1-2; Jọn 11:45-53)
1Ikpẹdẹ eha ọre ọ ghi kẹe ne a suẹn Emwiukpo Alagberra kevbe Eka Ne ọ ma hue. Avbe igie ohẹn kevbe avbe iran ni ma emwa Uhi kegha gualọ vbene iran gha ya do mu Jesu hẹ ne iran gbe ẹe rua. 2Iran keghi kha wẹ, “Ọ ma kei ne a ru emwi na vbe uwu emwiukpo, ne otutu ghẹ ya tu vbe uwu ẹbu emwa.”
A Tue Ori Ye Jesu Uhunmwu Vbe Bẹtani
(Matiu 26:6-13; Jọn 12:1-8)
3Jesu kegha rre owa Saimọn ne ọkhọnmwọ alalọ vbe Bẹtani, ugbẹn vbe ọ ghi rri evbare, okhuo ọkpa keghi rre ke irẹn kevbe ovbi ẹluba ọghe ori ne ọ winhin ọghe ighobioye ne a ma gua. Rẹn keghi kie ovbi ẹluba ni, ọ na tue ori ne ọ rrọọ yan Jesu uhunmwu. 4Ohu keghi mu emwa eso ni rre evba, iran kegha gui ẹzọ uwunu wẹ, “Vbe a ghi mu ori ne ọ winhin na rhia a ha nian? 5Emwi ne a gha khiẹn ọre igho ne ọ yan naira ọgban ne a gha ẹre ne avbe ivbiogue.” Iran keghi ye ẹzọ yan okhuo ni.
6Sokpan Jesu tama iran wẹẹ, “Wa sẹ ọe rae! De emwi ne uwa ghi kpokpo ẹe ba nian? Emwi usi ọghe ẹmwata ọre ọ ru mẹ. 7Ẹghẹ hia ọre uwa gha ya gha miẹn avbe ivbiogue, wa gha sẹtin ru iran ẹse vbe ẹghẹ ne uwa a rhirhi gha ho, sokpan mẹ i ra gha gue uwa rrọọ vbe ẹghẹ hia. 8Ọ ru emwi ne ọ gha sẹtin ru nẹ, ọ tue ori ne ọ winhin na yan mwẹ egbe ne ọ ya dọlọ ẹe ye otọ khẹ ẹghẹ irorinmwi. 9Ne I tama uwa nian, eheikehe ne a gha na kpe orhu iyẹn ne ọ maa na vbe uhunmwu otọ agbọn hia, a gha vbe na iyẹn emwi ne ọ ru na ne a ya gha ye ẹre rre.”
Judas Khuẹnniẹn Yọ Ne Ọ Rhie Jesu Maa
(Matiu 26:14-16; Luk 22:3-6)
10Judas Iskariọt, ọkpa vbe uwu iran ne erhuanegbe iweva keghi bu avbe igie ohẹn gha khian ne ọ miẹn ehe na rhie Jesu ye iran obọ. 11Ẹmwẹ ne ọ tae keghi wa rhiẹnrhiẹn iran ẹsẹse, iran keghi ve ẹre igho. Judas na rhunmwuda ọnii gha gualọ ẹghẹ ne ọ kei yi ne ọ ya rhie Jesu maa.
Jesu Gu Avbe Erhuanegbe Rri Evbare Alagberra
(Matiu 26:17-25; Luk 22:7-14, 21-23; Jọn 13:21-30)
12Vbe ikpẹdẹ ne okaro ọghe Emwiukpo Eka Ne ọ ma hue, vbe ẹdẹ ne a gbele avbe ohuan Alagberra, avbe erhuanegbe Jesu nọ rẹn wẹẹ, “De ehe ne u ho ne ima na ya le evbare Alagberra ye otọ khẹ ruẹ?”
13Jesu keghi gie eva vbe uwu iran, ọ khama iran wẹẹ, “Wa gha rrie adesẹ ore ẹvbo, okpia ọkpa ne ọ mu esago amẹ gha do khian vba uwa. 14Wa lele ẹe la owa ne ọ lao, wa ghi tama ne ọ yan owa wẹẹ, ‘Ọmamwaemwi wẹ, Ughugha mwẹ ne imẹ vbe erhuanegbe mwẹ gha na do gba rri evbare Alagberra vbo?’ 15Ọ gha ma uwa Ọgua ọkpa vbe egedege, a mwamwa ẹn ye otọ, a wa vbe te ẹre egbe, evba nii wa gha viọ emwi hia yi khẹ ima.”
16Avbe erhuanegbe nii kegha khian, iran keghi wa do vba emwi hia vbe ne Jesu gie ẹre zẹẹ iran keghi le evbare Alagberra.
17Ọ ghi sẹ ẹdogbo ota, Jesu kẹe kevbe avbe erhuanegbe ẹre keghi rre. 18Ehe ne iran ghi na rri evbare vbe eteburu ni, Jesu tama iran wẹẹ, “Ne I tama uwa nian, ọkpa vbe uwu uwa, ọmwa ne ima gba rri evbare, gha rhie mwẹ ma an.”
19Egbe keghi wa wọ avbe erhuanegbe ẹre ye otọ, ọkpọkpa vbe uwu iran keghi suẹn gha nọ wẹẹ, “I yayi ghẹ ẹ i re imẹ u kha?”
20Jesu wanniẹn wẹẹ, “Ọkpa vbe uwu uwa ne iweva nọ, ọmwa ne ọ gunmwẹ ya evbare rhanmwẹ vbe ọkpan ọkpa. 21Ovbi Ọmwa gha gele wu zẹ vbene Ebe khare ighe ọ gha ya wu, sokpan, ọsọre ighe ọmwa ne ọ gha rhie Ovbi Ọmwa ma an! A ma zẹdẹ biẹ ọe ọre ọ gha maa nẹ ẹn sẹẹ!”
Evbare Ota Nọyaẹnmwa
(Matiu 26:26-30; Luk 22:14-20; I Kọrinti 11:23-25)
22Ugbẹn vbe iran ghi rri evbare, Jesu keghi rhie ebrẹd ọ keghi na erhunmwu ekpọnmwẹ, ọ bun ẹnrẹn ọ keghi viọ ne avbe erhuanegbe ẹre ọ wẹẹ, “Wa miẹn, egbe mwẹ ọ re ọna khin.”
23Ọ keghi vbe mu ukpu, ugbẹn vbe ọ ghi kpọnmwẹ Osanobua nẹ, ọ mu ne iran, iran hia keghi wọn vbọ. 24Jesu keghi khama iran wẹẹ, “Ọnọna ọrọre esagiẹn mwẹ ne a gbe ye otọ ne emwa ni bun, esagiẹn mwẹ ne a ya yi ile Osanobua okhi. 25Ne I tama uwa, mẹ i ra ghi da vbe ayọn na ọvbehe, ọ te do sẹ ẹdẹ ne I gha da ọghọgbọn vbe Arriọba Osanobua.”
26Iran keghi so ihuan ọkpa, iran na gha rrie uhunmwu oke erhan Ọliv.
Jesu Tae Ye Otọ Ighẹ Pita Gha Siẹn Irẹn
(Matiu 26:31-35; Luk 22:31-34; Jọn 13:36-38)
27Jesu keghi tama iran wẹẹ, “Wa hia gha lẹ kua, wa ghi sẹ imẹ ọkpa rae rhunmwuda ebe tae nẹ wẹẹ, ‘Osanobua gha gbe ọsuohuan, avbe ohuan ghi zagha kua.’ 28Sokpan I gha rhiọrre nẹ vbe idin, I gha ke aro ne uwa gha rrie Galili.”
29Pita keghi wanniẹn wẹẹ, “Ọ gha khọn iran nekpa hia ne iran sẹ ruẹ rae, mẹ i ra sẹ uẹ rae ẹdẹ.”
30Jesu wanniẹn tama Pita wẹẹ, “Ne I tama ruẹn, vbene ọkpa te viẹ igba eva, u gha siẹn mwẹ igba eha.”
31Pita keghi dọlegbe tua unu mu ẹn wẹẹ, “Ọ gha khọnrẹn wẹ ne I gha na wu lele uẹ nọ, mẹ i ra siẹn uẹn ẹdẹ.” Ẹmwẹ ọkpa ni avbe erhuanegbe hia vbe ta.
Jesu Ya Na Erhunmwu Vbe Uwu Ogba Getsemani
(Matiu 26:36-46; Luk 22:39-46)
32Iran keghi do sẹ ihe ọkpa ne a tie ẹre Getsemani. Jesu keghi tama avbe erhuanegbe ẹre wẹẹ, “Wa tota vbe emwa, I ra ya na erhunmwu.” 33Ọ keghi rhie Pita, Jems kevbe Jọn ba egbe. Egbe hia keghi wa gha mannọ ẹn. 34Ọ keghi tama iran wẹẹ, “Akhiẹ ekhọe mwẹ kpọlọ sẹrriọ wẹ, ọ te ra kuẹn mwẹ gbua. Wa mudia vbe emwa ne uwa gha ba odẹ.”
35Rẹn keghi khian sikẹ odaro, ọ na wa mu ẹko rhu otọ gha na erhunmwu wẹ, A deghẹ ọ gha gie a ru ne oya nii la irẹn baan. 36Ọ wẹẹ, “Evbavba, Erha mwẹ, a i miẹn emwi ne ẹ i gie uwẹ ru, gie oya na la mwẹ baan sokpan, ẹ i re vbene Imẹ ho vbe ẹ i re vbene uwẹ ho.”
37Ọ keghi werriegbe gha dee ọ ghi do ghee avbe erhuanegbe ẹre eha gha vbiẹ. Rẹn keghi tama Pita wẹẹ, “Saimọn, te u vbiẹ? U ma sẹtin kọn ovbe la ẹgogo ọkpa!” 38Ọ tama iran wẹẹ, “Wa gha ba odẹ, wa gha na erhunmwu, ne uwa ghẹ miẹn ehe na de fi edanmwẹ. Orhiọn te wa ho sokpan ikinnegbe khuẹrhẹ.”
39Ọ kevbe dọlegbe gha khian ya na erhunmwu, ẹmwẹ ọkpa nii ọre ọ vbe ta. 40Ọ keghi vbe dọlegbe bu avbe erhuanegbe gha dee, ọ keghi vbe do vba ighe iran vbiẹ, iran ma sẹtin rhan aro rua. Iran ma vbe rẹn ẹmwẹ ne iran gha tama rẹn.
41Ọ ghi dọlegbe rre vbe ne ukpogieha, ọ tama iran wẹẹ, “Te uwa ye gbe ẹkun sẹ otọ gha vbiẹ? Ọ sẹe! Ne ẹghẹ sẹ nẹ! Wa ghe ighe a rhie Ovbi Ọmwa yan ẹtin avbe emwa orukhọ obọ. 42Wa kpaegbe ne uwa gie ima gha khian. Ghe ighe ọmwa ne ọ rhie mwẹ ma an sẹ emwa nẹ!”
Umumwẹ Jesu
(Matiu 26:47-56; Luk 22:47-53; Jọn 18:3-12)
43Te Jesu he wa ye guan vbe Judas, ọkpa vbe uwu iran ne iweva sẹ evba. Emwa ne avbe igie ohẹn, kevbe iran ni ma emwa Uhi kevbe avbe ediọn gie, keghi viọ umozo kevbe orhokhua mwẹ obọ lele ẹe gha dee. 44Ọgueva nii rhie ama ne iran wẹẹ, “I gha ya unu soso ọmwa ne uwa gualọ khian unu, wa mu ẹn, ne uwa ghae ga ẹre mu ẹn gha rrie.”
45Ugbẹn vbe Judas ghi wa sẹ evba, ọ bu Jesu gha khian ọ wẹẹ, “Ọmamwaemwi,” ọ keghi ya unu soso ẹre unu. 46Rhunmwuda ọnii, iran keghi de obọ mu Jesu, iran keghi mu ẹn mwẹ gbain. 47Sokpan ọkpa vbe uwu iran ni mudia vbe evba keghi yuo umozo ua, ọ na yae yan ọguọmwadia ogie ohẹn ọkpa, ọ keghi wa fian ẹre ehọ fua. 48Jesu wanniẹn tama iran wẹẹ, “Vbe uwa ghi na hẹ umozo kevbe orhokhua mwẹ obọ hẹ yi vbe uwa ra do mu mwẹ, vbe ne a khakha ighe ikpata ọre Imẹ khin. 49Ẹdẹ i gbe sẹ ẹdẹ rae ọre I ya gha gu uwa rre Ọgua Osa vbe ehe ne I na ma emwa emwi, wa ma de obọ mu mwẹ. Sokpan, ẹ i ra mwẹ ẹmwẹ Ebe ma sẹ.”
50Ẹghẹ ni ọre avbe erhuanegbe hia ghi na sẹ ọe rae, iran keghi lẹẹ kua. 51Igbama ọkpa ne ọ mu ukpọn eto ovbiohuẹ hin egbe kegha lele Jesu khian. Iran keghi te ra vbe mu ẹn. 52Sokpan rẹn keghi ban ukpọn eto ovbiohuẹ ni mu fua, ọ na ya irhunmwirhun lẹ gha rrie.
Jesu Vbe Odaro Iko
(Matiu 26:57-68; Luk 22:54-55, 63-71; Jọn 18:13-14, 19-24)
53Iran keghi mu Jesu gha rrie owa Ogie Ohẹn, ehe ne avbe igie ohẹn, avbe ediọn kevbe iran ni ma emwa Uhi si koko yi. 54Pita keghi lele iran iyeke gbaan, ọ na lele iran la ẹguae Ogie Ohẹn. Ọ keghi gu iran ni khẹ odẹ tota gha ye egbe ra erhẹn. 55Avbe igie ohẹn kevbe ẹvbo nii, kegha gualọ osẹe ne iran gha sẹ gbe Jesu ne iran miẹn ehe na gbe ẹe rua, sokpan iran ma miẹn. 56Osẹe ni bun ọre ọ ba Jesu ohoghe, sokpan, osẹe iran ma sẹtin gu egbe ro.
57Ẹghẹ nii ọre emwa eso ghi na guakpao, iran keghi mu ẹmwẹ ohoghe na ba Jesu wẹẹ, 58“Ma họn ẹn vbe ọ tae wẹ, ‘I gha guọghọ Ọgua Osa na ne emwa bọe sẹ otọ, vbe iyeke ikpẹdẹ eha, I gha bọ ọvbehe ne emwa ma bọ’ ” 59Levba sevba, osẹe iran ma ye sẹtin gu egbe ro.
60Ẹghẹ nii ọre Ogie Ohẹn ghi na gua kpaegbe vbe odaro iran hia, ọ na gha nọ Jesu ọta wẹẹ, “U ma miẹn ewanniẹn rhie ye ifi ẹzọ ne iran ba ruẹ re na hia.”
61Sokpan Jesu keghi wa hunwan, ọ ma ta ẹmwẹ rhọkpa. Ogie Ohẹn keghi dọlegbe nọ rẹn wẹẹ, “Wẹ ọrọre Mẹzaia ne Ovbi Osanobua Ne a fiangbe ra?”
62Jesu wanniẹn tama rẹn wẹẹ, “Mẹ nọ, u gha vbe miẹn Ovbi Ọmwa vbe ọ gha tota vbe obọ erha ọmwa ọghe Oghodua kevbe ọ gha ke ikpakpa iso ẹrinmwi dee.”
63Ogie Ohẹn keghi sọ ẹwu ẹre ua, ọ wẹẹ, “Ma i ghi gualọ osẹe ọvbehe. 64Wa họn ẹmwẹ dan ne ọ ke unu ẹnrẹn ladian, vbe uwa ghi kha hẹẹ?” Ehia keghi wa ye unu ọkpa tae wẹ: “Ọ rria abe kevbe wẹ, ne a gbe ẹe rua.”
65Eso vbe uwu iran keghi suẹn gha tu asẹn ku Jesu, iran keghi gba ẹre aro, iran ghẹ ghi fi ẹre emwi nẹ, iran ghi nọ rẹn, “Ta ọmwa nọ fi uẹ emwi!” Iran ni khẹ odẹ keghi rhie ẹre, iran na ya ubi yan rẹn.
Pita Siẹn Jesu
(Matiu 26:69-75; Luk 22:56-62; Jọn 18:15-18, 25-27)
66Ehe ne Pita na rre Ọgua ore ni, ọguọmwadia Ogie Ohẹn ne okhuo ọkpa kegha dee. 67Ọ ghi bẹghe Pita vbe ehe ne ọ na ye egbe ra erhẹn, ọ keghi ziẹn aro ye ọre aro, ọ wẹẹ, “Wẹ na vbe ye egbe ba Jesu ne ovbi e Nazarẹt.”
68Sokpan rẹn keghi wa siẹn, “Mẹ mwẹ, I ma zẹdẹ rẹn otọ ẹmwẹ ne u guan na hiehie.” Ọ keghi ladian vbe evba, ọ na gha rrie ọlẹla. Ọwarọkpa ni, ọkpa keghi viẹ.
69Ọvbokhan okhuo nii ghi vbe miẹn ọẹn vbe evba, ọ keghi vbe suẹn gha khama iran ni rre evba wẹẹ, “Ọkpa vbe uwu iran nọ.” 70Sokpan Pita keghi vbe dọlegbe siẹn. Ọ ma ghi re vbe kpẹe, iran ni mudia vbe evba keghi ya yan Pita, “Ẹ i guẹ siẹn ighẹ ẹ i re ọkpa vbe uwu iran u khin, ugbẹn vbe a miẹn wẹ Ovbi e Galili wẹ vbe khin.”
71Ẹghẹ nii Pita ghi na vẹn ihẹn, “Deghẹ ẹ i re ẹmwata I ta ne Osanobua werriẹ aro ne ọ khọ da mwẹ. I ma zẹdẹ rẹn ọmwa ne uwa ta ẹmwẹ ọnrẹn na.”
72Ọwarọkpa nii, ọkpa keghi viẹ ukpogieva. Pita keghi ye ẹmwẹ ne Jesu tama rẹn rre wẹẹ, “Vbene ọkpa te viẹ igba eva, u gha siẹn mwẹ igba eha.” Ọ keghi de guo, ọ na viẹ egbe ua.
Currently Selected:
Mak 14: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
