Mak 13
13
Jesu Ta Ẹmwẹ Uguọghọmwẹ Ọgua Osa
(Matiu 24:1-2; Luk 21:5-6)
1Ugbẹn vbe Jesu ghi ladian vbe uwu Ọgua Osa, ọkpa vbe uwu avbe erhuanegbe tama rẹn wẹẹ, “Ọmamwaemwi, u miẹn vbe iran ya okuta bọ owa na hẹẹ!”
2Jesu keghi wanniẹn wẹẹ, “Deghẹ u miẹn owa ẹrekhẹrẹ na? Okuta ọkpa ne a ra sẹ rae ye ehe nọ ye ẹ i rrọọ, ta a ra dunmwu ehia sẹ otọ.”
Olọghọ Kevbe Ukpokpo
(Matiu 24:3-14; Luk 21:7-19)
3Ugbẹn vbe Jesu ghi tota ye uhunmwu oke Ọliv, vbe a gha ke Ọgua Osa fian odẹ rra, Pita, Jems, Jọn, kevbe Andru keghi hẹko bu Jesu gha dee, iran ọkpa. 4Iran nọ rẹn wẹẹ, “Tama ima ẹghẹ ne ọ gha ya sunu. de ama ne ọ gha rhie ma ighe te avbe emwi na ghi ra gha sunu.”
5Jesu keghi suẹn gha ma iran emwi, “Wa khẹ ye egbe ne ọmwaikọmwa ghẹ hiẹ uwa mu ru. 6Emwa ni bun gha rre vbe eni mwẹ wẹ, ‘Mẹ ọre nọ,’ ọ ghi hiẹ emwa mwẹ mu ru. 7Wa gha rhe gha họn ẹmwẹ owogho okuo vbe ọkpẹn owa ra ogbigbi okuo ne ọ rre urria, wa ghẹ fian afianma. Ẹ i mwẹ emwi vberriọ ma sunu sokpan ọ nii ma rhie ma ighe ufomwẹ rre nẹ. 8Okpẹvbo ọkpa gha mu okuo gie okpẹvbo ọvbehe. Arriọba ọkpa gha vbe mu okuo gie arriọba ọvbehe. Igbohiotọ ghi gha rre ehe hia. Ukhunmwu ghi gha fi. Ena hia gha yevbe ne emwi ubiẹmwẹ ru okhuo.
9“Wa tobọ uwa, wa ghi khẹ ye egbe. Rhunmwuda emwa gha dekun uwa gha munọ ye iko ẹzọ. Iran gha gbele uwa vbe Ọgua ediọn. Wa gha mudia vbe odaro avbe ọba kevbe ekhaẹmwẹ rhunmwuda mwẹ, ne uwa kpe orhu Iyẹn Ne ọ maa ma iran. 10Te a gha ka kpe orhu iyẹn ne ọ maa ma emwa hia nẹ. 11Iran gha munọ uwa hẹ gha rrie iko, wa ghẹ si osi ye ẹmwẹ ne uwa gha ta. Ẹghẹ gha sẹ, ta ẹmwẹ ne a rhirhi rhie nuẹn ta vbe ẹghẹ nii. Rhunmwuda ẹ i re ẹmwẹ obọ ruẹ ọre u ra ta, ehe ne Orhiọn Nọhuanrẹn ye ọre ọ ra ke rre. 12Emwa ghi silo etẹn iran ne ikpia ladian ne agbelua, emọ gha kpe lele erha iran, iran ghi silo iran ladian ne agbelua. 13Emwa hia ghi gha khuiwu uwa ba ẹmwẹ mwẹ. Sokpan ọmwa ne ọ mu uhunmwu ke ọe ya sẹ ufomwẹ, a gha miẹn rẹn fan.
Omurhia Ne Ugborrirri
(Matiu 24:15-28; Luk 21:20-24)
14“Wa ghi do miẹn ‘Omurhia Ne Ugborrirri’ vbe ọ gha miẹndia ye ehe ne ọ ma khẹ ke.” (Wẹ ne ọ tiebe na, hia ne u rẹn odun ẹmwẹ na.) “Ẹghẹ nii wa ni rre Judia, wa lẹ gha rrie uhunmwu oke. 15Ọmwa ne ọ rre ẹrhunrhun owa, wẹ ne ọ ghẹ zẹdẹ ye egbe fi alasẹ wẹ rẹn ra ya rhie emwi vbe uwu owa mwẹ obọ. 16Ọmwa ne ọ rre ugbo, wẹ ne ọ ghẹ gha di owa do mu agbada ẹwu. 17Umiẹn vbe ọ gha ba so ikhuo ohanmwẹ kevbe ne emobọ gue hẹ ẹdẹ ne ẹdẹrriọ. 18Wa rinmwian Osanobua ne avbe emwi na ghẹ sunu vbe ẹghẹ okhuakhua! 19Rhunmwuda ọlọghọmwa ọghe ẹdẹ ne ẹdọ keghi re egbe ne a ma he miẹn ke ne a bu agbọn tu agbọn gha dee do sẹ ẹdẹ ne ẹrẹna. A i ra vbe dọlegbe miẹn egbọre. 20Sokpan, e Nọyaẹnmwa fian avbe ẹdẹ nii kanmwa nẹ, adeghẹ ẹ i re erriọ, orhiọnkpa ne ọ gha miẹn uhunmwu ẹ i rrọọ, vbene ọ rhirhi a gha ye hẹẹ, rẹn fian avbe ẹdẹ ni kanmwa nẹ rhunmwuda emwa irẹn ne ọ hannọ zẹ.
21“Rhunmwuda ọnii, a deghẹ ọmwa ọkpa do khama ruẹn wẹẹ, ‘Do ghe nene Mẹzaia vbe emwa,’ ra ‘ya ghe ẹre vbe odọọ,’ ghe yayi. 22Rhunmwuda Mẹzaia ohoghe kevbe akhasẹ ohoghe ni bun gha rre. Iran gha winna iwinna ọyunnuan, a deghẹ ọ gie iran ru ne iran ya hiẹ emwa ne Osanobua hannọ zẹ mu ru. 23Wa gha ba egbe. I ta emwi hia ma uwa ye otọ nẹ.
Urremwẹ Ovbi Omwa
(Matiu 24:29-31; Luk 21:25-28)
24“Ẹghẹ nii, vbe avbe orueghe na a ghi gberra nẹ, owẹn ghi so ebiebi, uki i ghi baa. 25Avbe orhọnmwẹ ghi gha kharha ke iso rre, a ghi si avbe ẹtin ni rre ideghe-dieghe hin urodẹ iran rre. 26Ẹkpo nii Ovbi Ọmwa gha ye egbe ladian, ọ ghi ke ikpakpa iso gha dee ke irẹn kevbe ẹtin kevbe uyi. 27Rẹn gha gie avbe odibosa ẹre gha rrie igie enenẹ ọghe agbọn, ne iran si avbe emwa ne Osanobua hannọ zẹ si koko ke okhiẹ agbọn ọkpa ya sẹ nọkpa.
Emwi Ne Erhan Ohọ Ma Mwa Re
(Matiu 24:32-35; Luk 21:29-33)
28“Wa ye erhan ohọ ru igiemwi ẹnrẹn. Abọ ẹre gha bi nunuunu, ọna vbe ye sọguọsọguọ, ọ na vbe gha họn ebe ladian, wa ghi rẹn ighẹ ẹghẹ uyunmwu bu otọ. 29Erriọ vbe nọ zẹẹ, wa ghẹ ghi miẹn ighẹ avbe emwi na hia sunu, wa ghi rẹn ighẹ ẹghẹ ni bu otọ, ọ mu egbe nẹ ne ọ gha ya suẹn. 30Ne I tama uwa, emwa hia ni ne agbọn ẹghẹ na nian i he ra wulo fo vbe emwi na hia a gha sunu. 31Ẹrinmwi kevbe agbọn gha gberra, sokpan ẹmwẹ mwẹ i ra gberra ẹdẹ.
Ọmwa Nọ Rẹn Ikpẹdẹ Ra Ẹghẹ Ne Ọ Khin Dandaandan, Ẹ I Rrọọ
(Matiu 24:36-44)
32“Sokpan ọmwa ne ọ rẹn ikpẹdẹ ra ẹghẹ ne emwi na gha ya sunu dandaandan, ẹ i rrọọ, avbe odibosa ni rre ẹrinmwi, kevbe Ọmọ ma rẹn ọnrẹn vbe ọ gberra Evbavba ọkpa. 33Wa gha ba egbe, wa khẹ ye egbe, rhunmwuda wa ma rẹn ẹdẹ ne ọ gha khin. 34Te ọ ra ye vbe okpia ọkpa ne ọ kpao vbe owa gha rrie ehe, ọ na sẹ eguọmwadia ẹre rae ye owa, ọ na fian okhuo dọmwadẹ ọghọe nẹ ẹn, ọ na vbe khama ukọ ne urho ne ọ gha ba odẹ. 35Rhunmwuda ọnii, wa gha ba odẹ, rhunmwuda wa ma rẹn ẹghẹ ne ọdafẹn ne ọ yan owa gha ya rre, deghẹ ota nọ, ra ogiasọn, vbe ẹdẹ a gha wan, ra vbe ovẹn a yan rre nọ. 36A i ghẹ miẹn ighẹ ọ rre vbe udomwurri ne ọ ghẹ do vba ighẹ wa vbiẹ. 37Ẹmwẹ ne I tama uwa na, wa hia ọre I tae ma, wa gha ba odẹ!”
Currently Selected:
Mak 13: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
