Matiu 4
4
Edanmwẹ Jesu
(Mak 1:12-13; Luk 4:1-13)
1Ẹghẹ ni, Orhiọn keghi gban Jesu uhunmwu ghe uwu ẹgbo ne Esu ya danmwẹ ọẹn ghe. 2Jesu ghi gbe asọn iyeva kevbe avan iyeva vbe uwu ẹgbo nẹ, vbe ne ọ ma na rri evbare, ohanmwẹ kegha gbe ẹe. 3Esu keghi bu ẹre rre, ọ wẹẹ, “Deghẹ Ovbi Osanobua wẹ gele khin tama avbe okuta na ne iran khian eka.”
4Jesu wanniẹn tama rẹn wẹẹ, “Agbẹn ọẹn ye otọ nẹ wẹ, ‘Eka ọkpa i sẹ ọmwa ya egbe yan vbe ẹ i re ẹmwẹ ne ọ ke unu Osanobua rre.’ ”
5Iyeke ọnii, Esu keghi vbe rhie Jesu gha rrie ẹvbo Nọhuanrẹn ni, ọ keghi muẹn yan ehe ne ọ yo sẹ vbe Ọgua Osa. 6Ọ tama rẹn wẹẹ, “Deghẹ Ovbi Osanobua wẹ gele khin, ke odọ ni san fi otọ rhunmwuda a gbẹn ọẹn nẹ wẹẹ, ‘Osanobua gha yi iyi ne avbe odibo ẹre rhunmwuda ruẹ iran gha da obọ rra ruẹ, ne okuta ghẹ ya fian an owẹ.’ ” 7Jesu keghi vbe wanniẹn tama rẹn wẹẹ, “Sokpan ebe nọhuanrẹn vbe tae nẹ wẹẹ, ‘Ghẹ danmwẹ Osanobua Nọyaẹnmwa ruẹn ghe.’ ” 8Iyeke ọnii, Esu keghi mu Jesu gha rrie uhunmwu oke ne ọ yo ẹsẹse, ọ keghi rhie arriọba otọ agbọn hia ma rẹn, ehe ne ọ sẹe, ehe ne ọ rhanmwẹ, ọ tama rẹn wẹẹ, 9“U gha sẹtin diguẹ ya uhunmwu rhanmwẹ otọ mẹ, I gha ya ena hia fi ohan nuẹn.”
10Ẹkpo nii ọre Jesu ghi na wanniẹn tama rẹn wẹẹ, “Ladian mwa Setan, ebe nọhuanrẹn khare wẹẹ, ‘Osanobua ruẹ ọkpa wẹ gha gaa, ne u gha vbe ya uhunmwu rhanmwẹ otọ na.’ ”
11Rhunmwuda ọnii, Esu keghi sọrae, avbe odibosa keghi rre do ru ọguọmwadia nẹẹn.
Jesu Suẹn Iwinna Rẹn Vbe Galili
(Mak 1:14-15; Luk 4:14-15)
12Ugbẹn vbe Jesu ghi họn ighe a mu e Jọn khui ye eghan, ọ kegha rrie Galili. 13Ọ ma yakọ vbe Nazarẹt, ọ keghi rhiegberra ya die Kapaniọn ya, ọkpẹn odighi e Galili ọre ẹvbo ni ye vbe isoko Zẹbulọn kevbe Naftali. 14Ọ ru ọna ne ẹmwẹ ne Aizaia ne akhasẹ tae miẹn ehe na sẹ wẹẹ,
15“Ẹvbo Zẹbulọn kevbe ẹvbo Naftali,
ni rre odẹ vbe a gha rrie okun
vbe iyeke nọkpa ọghe Jọdan,
Galili, ẹvbo iran ne ẹ i re Ju!
16Iran ni rre uwu ebiebi,
gha miẹn uwanmwẹ nọkhua.
Uwanmwẹ gha wan yan iran,
ni rre otọe uwu ne ọ so ebiebi.”
17Ke ẹghẹ ni kpao ọre Jesu na suẹn gha kporhu, ọ wẹẹ, “Wa ro iro fi uyinmwẹ werriẹ, rhunmwuda Arriọba ẹrinmwi sẹ otọ fo.”
Jesu Tie Avbe Ọgbehẹn Enẹ
(Mak 1:16-20; Luk 5:1-11)
18Ugbẹn vbe Jesu ghi lele ọkpẹn okun Galili khian, ọ miẹn etẹn eva ni re ọgbehẹn, Saimọn (ne a vbe tie ẹre Pita) kevbe Andru ne ọtiọnrẹn, iran gha ya ọga gbe ehẹn vbe uwu odighi. 19Jesu tama iran wẹẹ, “Wa lele mwẹ, I gha ma uwa vbene a ya munọ emwa nagbọn hẹ.” 20Iran keghi sẹ ọga iran rae vbe ọwarọkpa, iran keghi lele ẹe.
21Ọ ghi vbe khian sikẹ odaro kherhe, ọ miẹn etẹn eva ọvbehe, Jems kevbe Jọn ne ivbi e Zẹbede ke iran kevbe erha iran gha dọlọ ọga yi vbe uwu okọ. Jesu keghi tie iran. 22Vbe ọwarọkpa ni, iran sẹ erha iran kevbe okọ rae, iran keghi lele ẹe.
Jesu Kporhu, Ọ Ma Emwa Emwi, Ọ Kevbe Sinmwi Emwa Eso
(Luk 6:17-19)
23Jesu keghi lele Galili sẹ otọ sẹ ukhunmwu, ọ kegha ma emwa emwi vbe dọmwadẹ Ọgua ediọn, ọ kporhu Iyẹn Ne ọ maa ọghe Arriọba, ọ keghi vbe sinmwi emwa nikhuọnmwi kevbe ni huẹhuẹ. 24Ẹmwẹ ọnrẹn keghi wa titi gba otọ Siria hia sẹrriọ wẹ iran kegha viọ emwa nikhuọnmwi kevbe ne emwikemwi ghi ru bu ẹre rre, iran ni mwẹ orhiọn esu, iran ni de, iran ne arọ kinmwi, Jesu keghi mu ehia egbe rran. 25Emwa keghi wa vẹ lele ẹe ke Galili kevbe Ẹvbo Igbe, kevbe Jerusalẹm, Judia, kevbe iyeke Jọdan rre.
Currently Selected:
Matiu 4: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
