Matiu 3
3
Ikporhu E Jọn Ne Ọsamẹ
(Mak 1:1-8; Luk 3:1-18; Jọn 1:19-28)
1Ẹghẹ ni ọre Jọn ne Ọsamẹ na suẹn gha kporhu vbe uwu ato ọghe Judia, ọ wẹẹ, 2“Wa zobọ vbe orukhọ ne a ru rhunmwuda Arriọba ẹrinmwi sotọ fo.” 3E Jọn na ọre Aizaia ne akhasẹ ta ẹmwẹ ọnrẹn wẹẹ,
“Arhunmwu ọkpa gha vannọ vbe uwu ato:
Wa zodẹ yotọ khẹ Nọyaẹnmwa,
wa zodẹ ne ọ diae nẹẹn la.”
4Ukpọn ne a ye eto aranmwẹ oha do ọre Jọn na gha mu rhuan, ọ ghi mu ugbẹkun ohian gba ẹkun, evbare ne ọ re keghi re irhiso kevbe owọn oha. 5Emwa nibun keghi ke Jerusalẹm kevbe iwewe Judia kevbe isoko ni lẹga Jọdan hia bu ẹre rre. 6Iran miẹn Orukhọ iran kue. Ọ keghi samẹ ne iran vbe ẹzẹ Jọdan.
7Ugbẹn vbe Jọn ghi miẹn ighe avbe Farisi kevbe e Sadusi vẹ bu irẹn rre ne ọ do samẹ ne iran, ọ tama iran wẹẹ, “Wa ne ẹyẹn, gha ọ ghi giodẹ ne uwa gha na miẹn uhunmwu vbe obọ irriaikhi Osanobua ne ọ dee ma uwa yi? 8Wa gie uyinmwẹ uwa rhie ma ighe wa gele zobọ vbe orukhọ ne a ru. 9Wa ghẹ gha roro ighe uwa gha sẹtin mu Ebraham zasa ne uwa muẹn gba ye ukpẹ gha tie, ‘Ivbi Ebraham ma khin.’ Ne I tama uwa wẹ Osanobua gha sẹtin viọ vbe avbe okuta na ya ru uniẹn ne Ebraham. 10A rhie ughanmwa yan dọmwadẹ erhan ẹzi nẹ, erhan ne ọ ma ghi mọ ọmọ esi, a gha tọn ẹn gbe otọ, a ghi giagia ẹe hẹku erhẹn. 11Amẹ ọre imẹ ya samẹ ne uwa ne ọ rhie ma ighe wa gele zobọ vbe orukhọ ne a ru. Sokpan ọmwa ne ọ ghi ra rre lele mwẹ gha ya Orhiọn Ne Ọ Huanrẹn kevbe erhẹn samẹ ne uwa. Rẹn kpọlọ sẹ mwẹ ẹsẹse, mẹ ma sẹ ne ọ gha ban ẹre ibata vbe owẹ. 12Ọ rhie ahẹn ne ọ ra ya khan ọka mwẹ obọ, ọ gha viọ ọka la owa, ọ ghi ya erhẹn ne ẹ i dọyọ giẹn ihunhun ni rrọọ.”
Isamẹ Ọghe Jesu
(Mak 1:9-11; Luk 3:21-22)
13Ẹghẹ ni ọre Jesu na bu Jọn gha die Jọdan ne ọ do samẹn ne irẹn. 14E Jọn keghi te gha tama Jesu ighe ọ ma la vberriọ, ọ wẹẹ, “Wẹ ọre ọ kere ne ọ gha samẹn ne imẹ, vbe uwẹ ghi na bu mwẹ gha dee hẹẹ?”
15Jesu keghi tama rẹn wẹẹ, “Gie a ruẹe vbenian, ne a miẹn ehe na ru vbene Osanobua gie.” E Jọn ma ghi vbe muan rẹn. 16Ugbẹn vbe a ghi samẹn ne Jesu nẹ, vbene ọ wa ladian vbe uwu amẹ, ẹrinmwi keghi kie ye otọ, rẹn keghi miẹn Orhiọn Osanobua vbe ọ tuorre, ọ yevbe idu, ọ keghi rhuẹ yan rẹn. 17Urhu ọkpa keghi ke ẹrinmwi rre wẹẹ, “Ọna ọre ovbi mwẹ ni ho ẹmwẹ ọnrẹn, ọmwa ne ekhọe mwẹ rhiẹnrhiẹn ghe ẹsẹsẹmwẹse.”
Currently Selected:
Matiu 3: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
