Hozia 12
12
1“Emwi ne ivbi Izrẹl ru hia fẹẹrẹ, ke owiẹ ya sẹ ota ọfuan kevbe ọrhiae ọ re ehia khin. Uma dan kevbe uyinmwẹ ibalegbe wa dọlegbe gbọ yọ vbe ehe ne iran ye. Iran gu Asiria rhie obọ ye ebe, iran vbe gu Igipt do ẹki. 2E Nọyaẹnmwa mwẹ ẹzọ ne ọ gha ba ivbi Juda re, ọ gha vbe rri ivbi Izrẹl oya, rhunmwuda uyinmwẹ emwa rẹn. Ọ gha ha iran osa emwi ne iran ru.”
3E Jekọb ne erha iran odede kevbe Isọ ne irẹn vbe ọre gba re ivin eva gba ru egbe vbe iran eva he rre uwu ẹko iye iran; e Jekọb ghi waan nẹ ọ gu Osanobua suan. 4Ọ gu odibosa khọn, obọ ẹre keghi ke ukhunmwu. Ọ keghi viẹ, ọ na nọ afiangbe. Osanobua keghi bu erha ima odede ighe Jekọb rre vbe Bẹtẹl, ọ na do gu ẹe guan. 5Ọnọna ọ re Nọyaẹnmwa Osanobua ne Oghodua, e Nọyaẹnmwa ọrọre eni ne a gha ya gha ga ẹe. 6Rhunmwuda ọnii nian, wa ne ivbi uniẹn e Jekọb wa mu ẹtin yan Osanobua uwa ne uwa vbe hu ẹre gha dee. Wa mudia ẹse, wa gha ru emwi ẹmwata ne uwa ya i ziengbe mudia khẹ Osanobua uwa ne ọ guan yọ.
Ẹmwẹ Ibu Ohiẹn Ye Nọ
7E Nọyaẹnmwa khare wẹẹ, “Emwa nii vbe zẹ ibeleku zẹ vbene ivbi e Kenan ye ọ re ivbi Izrẹl wa khin. Esike ne ẹ i maa ọ re iran ya mu emwa ni gu iran do ẹki ru. Iran ghi gha kha wẹẹ, 8‘Ma fe nẹ. Ma rri okpe ere, ọmwa ne ọ gha sẹtin gunmwa gui ẹe i rrọ wẹ odẹ omuru ọ re ima ya họn ẹfe.’ 9Sokpan, mẹ ne Nọyaẹnmwa ne Osanobua uwa, ne ọ viọ uwa ke Igipt ladian gha dee, I gha dọlegbe ru ẹe ne uwa dọlegbe ya gha di okhogbo ya. Zẹ vbene uwa gha ru ẹe vbe ẹghẹ ne I na bu uwa rre vbe uwu ato.
10“I gu avbe akhasẹ guaan, I keghi ya umian nibun ne iran miẹn, I keghi vbe la unu avbe akhasẹ bu emwa mwẹ ude yotọ khẹ ọ dee. 11Sevba te emwa ye ya uhunmwu rhanmwẹ otọ ne avbe ẹbọ vbe Giliad, iran ni ya uhunmwu rhanmwẹ otọ ne iran gha wulo. A ya ẹkhuia ẹmila zọ ese vbe Gilgal, avbe Ogiukpo ni re evba gha khian utete okuta vbe oha.”
12E Jekọb ne erha mwa odede, e Mẹsopotamia ọ re ọ lẹẹ gha rrie, vbe odọ niii, te ọ gha ga ọmwa ọvbehe ọ na gha su ohuan ẹnrẹn ne ẹẹn, ne ọ miẹn ehe na sẹtin rhie okhuo. 13E Nọyaẹnmwa keghi giee akhasẹ ne ọ ya fannọ ivbi Izrẹl hin ọviẹn rre vbe Igipt, kevbe ne ọ gha gbearoghe iran. 14Ivbi Izrẹl wa ya ẹko e Nọyaẹnmwa kakabọ rhia, te ọ kere ne iran wulo ye orukhọ ne iran ru. E Nọyaẹnmwa ghi rri iran oya ye ne iran na si efa ye ọre egbe.
Currently Selected:
Hozia 12: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
