Filibii 3
3
Mɨ Yatǝm Nǝl Wo A Maajɨ Bʊtɔ
1A dɨltǝmɔ gǝmɨ kambɔ, jǝ́ maa fulotǝm nǝl nǝn Tɛlalɔ! Mɨ komtǝm wo n yǝla n mʊla jem kanjǝl nɨ tʌgo tag. Maatǝmɔ nyɨɨ nǝn gɔ n tɨkalɨ jeni.
2Bɛ jǝ́ kɨla sǝgantɨn nɨɨ! Bɛ jǝ́ kɨla nǝb maajɨ bwɨla nɨ! Jǝ́ kɨla nǝb biyotǝm mwɛn nɨ! 3Jʊ a bwɨɨ, nǝbǝn bǝ biyo mwɛn bɨlǝngǝnɨ. Bǝn nǝb nɨ bǝ bǝlá Kwaama lɛ a gola Yʊwa Kwaamaɨ. Bǝ maa sʊtɔ lɛ a mʊgɔ Kiristi Yesui. Bǝ ya bɔ kwaan a maajɨ bʊtɔ sul, 4mǝ tǝmɨ mǝ ya ya nǝl a maajɨ bʊtɔ na mǝ swɨ lɛɨ.
Na kaam nǝbɔ ji nǝn jǝ yatǝm nǝl a maajɨ bʊtɔɨ, mǝ tǝmɨ mǝ nǝngǝn, n laa ji. 5Ja biyo mɨ mwɛnɔ a kum na naalǝb. Mǝ bwɛ Israila. Mǝ dʊʊm Biliyaminui. Mǝ bwɛ Ibrane, bʌtʌm Ibrane. A diilɔ gǝmɨ mǝ bwɛ Farisa, mǝ kɨla diilɔ lɛ dangǝn. 6A gom maajɨ nǝn kwaan bʊtɔ, n nʊ nǝ mʊrkalɨ nǝb bwangtǝm Kwaamaɨ gaalan bwɨla lɛɨ. A gola kɨlatǝm diilɔ gǝm sǝ n yǝlam nǝ dǝngdǝngɨ, mɨ mǝ nǝn daa tuwol.
7Gwam jʊ nɨ na jeltǝmɨ, n do gǝn a yǝlam yalatǝm a kɛl dul Kiristii. 8Bɨlǝngǝn n do kanjǝlɔ gwam yalatǝm na n mʊrka ji jǝbɔ nyǝmtǝm dʊʊlǝn Yesu Kiristii, Tɛlalɔ mɨ. N kɛl dul gǝn mǝ tǝlam kanjǝlɔ gwamɨ, n do ji n jǝl nǝn kwan sǝ Kiristi a yǝlam a mɨ, 9sǝ n yǝlam win nǝbɔ gɔ. Mǝ ya bɔ nǝl mǝ mǝ nǝ dǝngdǝng a gola bwangtǝm diil, na ke bɔ a gola nǝtǝm bɨlǝngkɛl a dul Kiristii. N dǝngdǝng nɨ a daa Kwaama woi bɛ lɛ nǝn nǝtǝm bɨlǝngkɛlɨ. 10Swɨtǝm mǝndɨ nǝn gɔ n nyǝm Kiristi, n nyǝm kwaan guntǝm gǝnɔ a bwaaɨ, n nya mʊrkatǝm nǝbɔ gɔ a nɔɔtǝm gaalan gǝnɔ gǝm, n yǝlam na gɔ a bwaa gǝnɔ gǝm, 11sǝ na maa nyǝnɨ, sǝ a la nǝn mǝ a guntǝm a bwaa.
Sɨnatǝm Jatǝm Kǝga A Daagɔ Bǝ Ya Nǝl Woi
12Mǝ sʊwa bɔ mǝʊ n kwɛl n nya kanjǝl nɨ gwam. Mǝ lǝga bɔ n dɨl. Mǝ sɨn nɛ tʌgo sǝ n la kanjǝl nɨ Yesu Kiristi a jo i a kɛl dul gǝnɨ. 13Kambɔ, mǝ do bɔ mǝʊ n kwɛl n la kanjǝl nɨ. Jʊ win na mǝ maa lɛɨ, mǝ twab jʊ nɨ lɛ a guli, mǝ dɔta lɛ sǝ n la jʊ nɨ a kǝgaɨ. 14Mǝ sɨn nɛ n ja kǝga sǝ n yo lǝma. Lǝma nɨ Kwaama a jo i a dʌbʌl kwamaɨ, a kɛl dul Kiristi Yesui. 15Gwam bǝnɔ nɨ bǝ yǝlam nǝfitʌm a mʊgɔ bwangtǝmɨ, bɛ bǝ bʊʊla nǝn kanjǝl nɨ nyɔ. Na jǝ́ jǝla bɔ nǝn kaam kanjǝl nɨɨ, Kwaama nʊng jen nʊng jʊ nɨ dǝngdǝngɨ. 16Bɛ bǝ ja kǝga nǝn jʊ nɨ Kwaama swɨ lɛ bǝ maaɨ.
17Kambɔ, bɛ jǝ́ maa mɛlalɨ nǝn mǝ. Jǝ́ dʌng nǝb nɨ yɨm jinɔ win jǝbɔ mɛlalɨ nɨ nǝ maaɨ. 18N sʊwa jen naagɔ a lada, kǝngkɔ mǝ sʊwa jen nɛ tag nǝn mwɛ num, nǝbɔ a lada yɨm jinɔ maamɔ nǝb kiim tɨya kʊʊtǝm Kiristii. 19Dɨltǝm jinɔ n bwaa, kwaama jinɔ n fʌl. Jǝ maa sʊtɔ jinɔ nǝn jǝ gunidul. Ja ya nǝl jinɔ a kanjǝl yooli nɨ. 20A bǝnɔ bǝ na a yɨm dʌbʌl. N daagɔ bǝ yam Nǝbʊʊlɨ Tɛlalɔ Yesu Kiristi bɛm lɛɨ. 21Nǝn gɔ fʌto bʊtɔ bǝnɔ nɨ lɛ a gɨya gɨyaɨ, sǝ a fʌto nǝn bʊtɔ dʊʊlǝn na gǝnɔ. Maa nyɔ nǝn kwaan gǝnɔ wʊnɨ bɛ lɛ nǝn kanjǝlɔ gwam a fɔlɔn gǝnɨ.
©️2024 Luke Initiative for Scripture Translation