Filibii 2
2
Mɛlalɨ Nǝn Shigtǝm Dul Kiristii
1Kiristi a kʊʊ jem nǝl. Swɨtǝm gǝnɔ a yʌb jem nǝl. Yʊwa Kwaamaɨ a mʊrka jen. Jǝ́ nʊngka bʊnatǝm jǝbɔ swɨkan. 2Bɛ jǝ́ dǝg fulotǝm nǝl mǝndɨ a yii. Jǝ́ yɨ nǝn jǝlakatǝm jǝbɔ swɨkan a kʊm jen. Jǝ́ mʊrka dul, bʊʊlalɨ jenɔ win. 3Ka jǝ́ maa lɛ swɨtǝm dul jǝbɔ gungtǝm dul. Jǝ́ na nǝn shigtǝm dul. Jǝ́ do nǝbɔ a laa jen laaɨ. 4Bɛ ka jǝ́ ya lɛ kaa maajɨ dul jen a kǝga. Bɛ ya jǝ́ maaka tɨkalɨ lɛ.
5Bɛ jǝ́ maa bʊʊlalɨ na a Yesu Kiristii a maaɨ,
6wʊnɨ n jelkalǝng Kwaamaɨ.
Jelkalǝng gǝnɔ na Kwaamaɨ,
a dǝg gǝn bɔ a do jʊ
nɨ gǝ tɨtǝn nɛ tʌgoi.
7A bǝla kanjǝlɔ gwam a gul.
A do jelkalǝng
bwɛ jwaalɛɨ dangǝn.
Ja bʌ gǝn na nǝfili.
8A yǝlam nǝfili,
a shig dul gǝnɔ.
A bwangtǝn Kwaama.
A yɔ nǝn gɔ a bwaa.
A bʊla bwaa na nǝ bwɨlangkɛl
a dʌbʌl tɨya kʊʊtǝm!
9A na nyɔ Kwaama a gung gǝn a dʌbʌli,
a nǝ gǝn dun nɨ a laa
tangǝn duntɨnɔ gwamɨ,
10sǝ a mʊgɔ dun Yesui,
nǝbɔ gwam jʊng jʊng nǝn dun
a dʌbʌl, jǝbɔ tǝm,
jǝbɔ mʊgɔ tǝm.
11A maa nyɔ tag sǝ nyiyotɨnɔ gwam a sʊwa gɔ Yesu Kiristi nǝn Tɛlalɔ,
sǝ ja dʊʊl Kwaama Tɛtɛ.
Nyalǝm A Mʊgɔ Yooli
12Jǝ́ nǝbɔ mǝ swɨ lɛɨ, kwangkwang jǝ́ bwangtǝn diil mǝndɨ lɛ kwama bǝ dakinii. Kǝngkǝnɨ mɨ bǝ dakini, bɛ maajɨ jenɔ a laa nyɔ. Bɛ jǝ́ maa maajɨ nɨ bʊʊ lɛ nǝn jeni nǝn taal jǝbɔ katǝm bʊtɔ. 13Kwaama a maa maajɨ a nǝl jen. Nǝn gɔ nǝ jen swɨtǝmɔ lɛɨ jǝbɔ kwaan, sǝ jǝ́ maa jʊ nɨ fulo gǝm nǝl lɛɨ.
14Bɛ jǝ́ maa kanjǝlɔ gwam mɨ kʊngatǝm wo jǝbɔ gʊbkatǝm. 15Jǝ́ maa nyɔ sǝ jǝ́ yǝlam nǝb nɨ mɨ nǝn jǝ tuwoli, nǝb sagsag, bɛtɔ lɔ Kwaamaɨ nɨ mɨ nǝn kʊlanɨ. Jǝ́ yɨ yɨm jenɔ a kʊm nǝb nɨ dulɔ a yǝla yǝlaɨ, nǝb bwɨlangkɛlɔ, nyalǝm jenɔ won nɛ ganggang a kʊm jin a yooli nɨ. 16Jǝ́ ta kɛl kʊlɨ nɨ gwanggwang. Na jǝ́ ja kǝga nǝn maatǝm nyɨɨ, na Kiristi a bɛɨ, mǝ maa maa sʊtɔ. Mǝ sʊwa sʊwa mǝʊ maajɨ mǝndɨ jǝbɔ gaalan mǝndɨ, a yɔ bɔ nǝn kwan. 17Nǝtǝm bɨlǝngkɛl jenɔ jǝbɔ maajɨ jenɔ a daagɔ Tɛlalɔ woi a maa na tǝlatǝm twama. Na na mǝ tǝla tǝla tʊʊm mǝndɨ a dul twama nɨɨ, mǝ nyʊwa nyʊwa lǝma, n maa fulotǝm nǝl nǝbɔ jen. 18Jen tʌjen jǝ́ nyʊwa nyʊwa lǝma, jǝ́ maa fulotǝm nǝl jǝbɔ mǝ.
Timoti Jǝbɔ Abafaroditas
19Mǝ ya nǝl lɛ a daagɔ Tɛlalɔ Yesu woi, mǝ tʊng jem tʊng Timoti mɨ tatǝm bʊtɔ wo, sǝ n nya kwaan bʊtɔ nǝn nyʊwatǝm fulon jenɔ. 20Mɨ mǝ nǝn kaa nǝl wo wʊnɨ ta jen nɛ, a dʌng yɨm jenɔ a bʊm na gɨɨ. 21Tangǝn jinɔ n maajɨ jin ja ya a kǝga jin jǝ maa lɛɨ. N ke bɔ maajɨ Yesu Kiristii. 22Jen jǝ́ nyǝm yɨm Timotii kanga nǝn maa maajɨ fulon kɛl lǝmɨ Kwaamaɨ dakinii, maamɔ n tɛ bwɛ jǝbɔ bʊla gɔ. 23Nǝn gɔ mǝ swɨ lɛ n twam gǝnɨ, na n kuwo kanjǝl mǝndɨ yɔ lɛ dǝngdǝngɨ. 24Mǝ ya nǝl a daagɔ Tɛlalɔ woi, mǝ tǝmɨ mǝ bɛ lɛ mɨsɔ mǝ ta bʊtɔ lɛ.
25N kuwo a bʊm nyɔ n yǝla n twam jem Abafaroditas, kɨla mɨ, fwalɨ maajɨ mǝndɨ, fwalɨ gʌtǝm mǝndɨ, wʊnɨ jǝ́ twam gǝn sǝ a tɨka ɨɨ. 26A kʊta na swɨ lɛ a kuwo jen gwamɨ, jʊ a bwɨɨ a nya komʌn a fulon kɛl bɔɔla gǝnɔ jǝ́ nyʊwaɨ. 27A daa twɨla dangǝn, ya la bwaa lɛ. Kwaama a ji bʊnǝn gǝnɔ, ke bɔ gɔ kwaagɔ, jǝbɔ mǝ tǝmɨ, jʊ a bwɨɨ kage n maa kaltǝm nǝl a dul kaltǝm nǝl. 28N jʊ a bwɨ mǝ sɨn nɛ sǝ n twam gǝn a daa jen woi, sǝ jǝ́ maa fulotǝm nǝl na jǝ́ kuwo gǝn tagɨ. Mǝ tǝmɨ n dem komʌn mǝndɨ dǝm. 29Bɛ jǝ́ yo gǝn nǝn fulotǝm nǝl dangǝn a mʊgɔ Tɛlalɔɨ. Bɛ jǝ́ nǝ nǝb nɨ na gɨɨ dʊʊn, 30jʊ a bwɨɨ ya bʊla lɛ a maajɨ Kiristii, miyo kʊlɨ gǝnɔ lɛ sǝ a tɨka ɨ maajɨ nɨ jǝ́ dwal bɔ jǝ́ maaɨ.
Currently Selected:
Filibii 2: DBD
Highlight
Copy
Compare
Share
Want to have your highlights saved across all your devices? Sign up or sign in
©️2024 Luke Initiative for Scripture Translation