Galatiya 1
1
Yaltǝm
1Nǝmǝ mǝ Bulus bwɛ twama, wʊnɨ ke bɔ a daagɔ nǝfitʌmi, ke bɔ nǝfili a twam ɨɨ. Nǝn Yesu Kiristi jǝbɔ Tɛtɛ Kwaama, wʊnɨ a gung gǝn a bwaaɨ, a twam ɨɨ. 2Gwam kambɔ nɨ dakini jǝbɔ mǝ fǝɨ, nǝn yal mʊrkalɨtɨn nǝb bwangtǝm Kwaamaɨ nɨ lɛ a Galatiyaɨ.
3Bɛ lǝmagɔ jǝbɔ yɨm kwamɨgǝn a Kwaama Tɛtɛɨ jǝbɔ Yesu Kiristii Tɛlalɔ bǝn, a yɨ jǝbɔ jen.
4Yesu Kiristi a nǝ dul gǝnɔ a dul bwɨlangkɛl bǝn, sǝ a jǝg bǝn a mʊgɔ bwɨlan yooli nɨ gǝm. Wʊnɨ nǝn gɔ swɨtǝm Kwaama Tɛtɛ bǝnɨ. 5Bɛ dʊʊlǝnɔ a yɨ a daa gǝ woi mɨ dɨtǝm wo. A daa nyɔ.
Mɨ Kaa Fulon Kɛl Lǝmɨ Kwaamaɨ Wo Kwaagɔ
6Jʊ nɨ jǝ́ maa lɛɨ, a yǝlam mɨ komʌn dangǝn. A kǝlɨ kwama nǝn dǝm nyɔ jǝ́ bǝla bwangtǝm nʊ nɨ lɛ a jo jen a mʊgɔ lǝma Kiristii, jǝ́ yǝla jǝ́ bwangtǝn kaa fulon kɛl lɛ nǝn kwan. 7Mɨ kaa fulon kɛl lǝmɨ wo. Kaam nǝbɔ swag jen nɛ, jǝ swɨ lɛ ja kal fulon kɛl lǝmɨ Kiristii. 8Mǝ sʊwa jen nɛ, na kaa nǝl a bɛ a daa jen woi nǝn kaa fulon kɛl ke bɔ a wʊnɨ nǝn sʊwa jen nǝn tɨkǝgaɨ, na n bwɛ twama Kwaamaɨ wʊnɨ a dʌbʌli, na nǝnǝn nǝn kang nǝnɨ, bɛ a yǝlam nǝ lagtǝm! 9Kanga nǝn kwɛl nǝn sʊwa jen nǝn tɨkǝgaɨ, mǝ yǝla mǝ sʊwa jen nɛ tʌgo mǝʊ, na kaa nǝl a sʊwa jen kaa fulon kɛl nǝn kwanɨ, ke bɔ a wʊnɨ jǝ́ kwɛl jǝ́ nyʊwa, jǝ́ yoi, bɛ a yǝlam nǝ lagtǝm.
10Jǝ́ kuwo lɛ mǝ swɨ lɛ n fulo nǝbɔ gǝm nǝl ka? Ke bɔ a Kwaamaɨ ka? Jǝ́ nyǝma lɛ jengɔ mǝ maa sǝ n fulo nǝbɔ gǝm nǝl ka? Mɨ nyɔ. Na na mǝ fulo nǝbɔ gǝm nǝlɨ, na mǝ yǝlam bɔ bwɛ jwaalɛ Kiristii.
Bulus A Yǝlam Bwɛ Twama Yesui
11Kambɔ, mǝ swɨ lɛ n sʊwa jen, fulon kɛl lǝmɨ nɨ mǝ sʊwa jen nɛɨ, a jel bɔ a daagɔ nǝfili woi. 12Mǝ yo bɔ a daagɔ nǝfili woi. Mɨ nʊ nɨ wo a mɛla mɨɨ. Nǝn Yesu Kiristi nǝn kang gǝn a nʊng ɨ fulon kɛl lǝmɨ nɨɨ.
13Jǝ́ nyʊwa yɨm nɨ mǝ yɨ galɨgǝn a mʊgɔ jǝfʊlǝn Yahudawagɨɨ, kanga mǝ nǝ mʊrkalɨ nǝb bwangtǝm Kwaamaɨ gaalan bwɨla nǝn bɨlǝngǝnɨ, mǝ maa gola jʌbotǝm jini. 14Jen tʌjen jǝ́ nyǝm kanga a mʊgɔ jǝfʊlǝn Yahudawagɨɨ, n laa kɔrɔ Yahudawa nɨ nǝn dʊʊl dakinii. N sʊtǝn kwaan a bwangtǝm jǝfʊlǝn tʊgalam nǝnɨ nǝn bɨlǝngǝn dangǝn.
15Kwaama a jǝg ɨ na lǝga bɔ ja bʌ i. A jo i a mʊgɔ lǝma gǝn. Nǝn fulotǝm nǝl 16a nʊng ɨ bʊla gɔ, sǝ n kiyo fulon kɛl lǝmɨ gǝnɔ a daagɔ Bʌtʌbɔ woi. Mǝ yo bɔ mɛlalɨ a daa kaa nǝl woi. 17Mǝ yɔ bɔ a Urushalima a daagɔ nǝb nɨ a laa ɨ yǝlamtǝm bɛtɔ twamaɨ. Jʊ mǝ maaɨ, mɨ tatǝm bʊtɔ wo, nǝngɔ mǝ shu a tǝm Larabawagɨɨ, nǝngɔ la mǝ yǝla mǝ bɛ a Dimaskaɨ. 18Jolɔ taal a shui, nǝngɔ mǝ gwi mǝ shu a Urushalimaɨ, sǝ n kuwo Kefas wʊnɨ nǝn Siman Bitrusi. N maa kumɔ kʊb jeli nʊ nǝbɔ gɔ. 19Mǝ kuwo bɔ kaa nǝl win a mʊgɔ bɛtɔ twamagɨɨ, na ke bɔ Yakubu kɨla Tɛlalɔɨ. 20Jʊ nɨ mǝ mʊla jem lɛɨ ke bɔ gabakɛl. Bɨlǝngkɛl a kǝga Kwaamaɨ mǝ sʊwa lɛɨ.
21Nǝn gul tag, n shu a tǝm Suriya jǝbɔ Kilikiya. 22A kwama gɔ, mʊrkalɨ nǝb bwangtǝm Kwaamaɨ nɨ a mʊgɔ Kiristii a Yahudiyaɨ ja kuwo i bɔ wo nu jǝbɔ nu. 23Jʊ win ja nyʊwaɨ nǝn gǝ gɔ, “Nʊ nɨ galɨgǝn nǝ bǝn gaalan nɛɨ, n wɔ kiyo kɛl nǝtǝm bɨlǝngkɛl lɛ wʊnɨ gǝ kal lɛ galɨgǝnɨ.” 24Nǝngɔ ja bǝlá Kwaama nǝn jʊ nɨ ga maa a daa mǝ woi.
Currently Selected:
Galatiya 1: DBD
Highlight
Copy
Compare
Share
Want to have your highlights saved across all your devices? Sign up or sign in
©️2024 Luke Initiative for Scripture Translation
