Maajɨ Bɛtɔ Twamagɨɨ 22
22
1“Jǝ́ kɛtǝlamɔ jǝbɔ dʊʊmɔ, jǝ́ kaa lɔl sǝ n sʊwa jen jʊ a bwɨɨ, sǝ n nʊng jen mɨ mǝ nǝn bwɨlangkɛl.”
2Ja nyʊwa gǝn a sʊwa kɛlɔ nǝn nyiyo Yahudawagɨɨ, nǝngɔ ja yɨ shigi.
Nǝngɔ a sʊwa gɔ, 3“Mǝ bwɛ Yahuda. Ja bʌ i a Tarsus a tǝm Kilikiya. Mǝ dʊʊl fɔ a tuulɔ nɨ. Mǝ maa gǝlalantalɔ a daagɔ Gamaliyal woi, a wʊnɨ a mɛla mɨ diil tʊgalam bǝnɔ gwamɨ. Mǝ bwangtǝn Kwaama lɛ dǝngdǝng kanga gwam jenɔ jǝ́ maa lɛ dwiyeni. 4N nǝ nǝb nɨ bwangtǝn Gola nɨ lɛɨ gaalan. Mǝ bwaba nǝbɔ lɛ batǝm jǝbɔ nɔɔtǝm. Mǝ dǝg ji lɛ a lɔsomi, sǝ ja jʌbo ji. 5Dalɨ nǝkǝlagɔ jǝbɔ mʊrkalɨ nǝb dʊʊm nǝbɨɨ gwam jǝ nǝ nǝ nyiyo a dul mɨ. N daa ji woi mǝ yo langǝn bwangǝn na yɔmɔ a daagɔ kɛtǝlam bǝnɔ woi, Yahudawa nɨ a Dimaskaɨ. Mǝ shu wo sǝ ya n bwaba nǝb nɨ bwangtǝn golagɔ lɛ fʌleni, sǝ n bɛ nǝn ji a Urushalima, ja nǝ ji gaalan.
Bulus A Sʊwa Kanga Ga Yǝla A Gola Kwaamaɨ
(Mbt 9:1-19; 26:12-18)
6“Mǝ a mʊgɔ yɔm, n dwama Dimaskagɔ nǝn sɨ kɔkɔ, tʌgo a kang nǝngɔ kaa gʌleng nyalǝm a gǝla a dʌbʌl, a sum ii. 7Nǝngɔ mǝ yal a tǝmɨ. Mǝ nyʊwa kaa diil sʊwa ɨ lɛ gɔ, ‘Shawulu Shawulu, wɛ a bwɨ mʊ nɨ ɨ gaalan nɛɨ?’
8“Nǝngɔ mǝ jǝla mǝʊ, ‘Nǝmɔ mʊ wo, Tɛlalɔ?’
“Nǝngɔ a sʊwa ɨ gɔ, ‘Nǝmǝ mǝ Yesu Bwɛ Nazarat wʊnɨ mʊ nǝ gǝn gaalan nɛɨ.’ 9Nǝb nɨ nǝn dakini ja kuwo nyalǝmɔ, ja nyʊwa bɔ diilɔ sʊwa kɛl lɛ jǝbɔ mǝɨ.
10“Nǝngɔ mǝ bʌ gǝn mǝʊ, ‘N wɛ mǝ maa lɛɨ, Tɛlalɔ?’
“Nǝngɔ Tɛlalɔ a sʊwa ɨ gɔ, ‘Gun dɔ Dimaska. Kwama mʊ yɔ woi, kaa nǝl wo sʊwa ń sʊwa ń jʊ mǝ fɛka mʊn wo mʊ maa lɛɨ.’ 11Mǝ kuwo bɔ daa a dul gʌleng nyalǝm nɨ gǝm, nǝb nɨ nǝn dakini ja ta mɨ kang. Nǝngɔ ja yɔ nǝn mǝ a mʊgɔ Dimaskaɨ.
12“Nǝngɔ kaa nǝl dunɔ nǝn Hananiya a bɛ a daa mǝ woi. N nǝ bwangtǝm Kwaamaɨ a diil bǝnɔ gǝm, wʊnɨ Yahudawagɔ fʌlen gwamɨ bǝlá gǝn nɛɨ. 13A bɛ ba sʊwa ɨ gɔ, ‘Kɛgɔ Shawulu, yǝla nya kuwotǝm daagɔ tʌgo.’ Tʌgo a kang nu mǝndɨ a wumo, n kuwo gǝn.
14“Nǝngɔ a sʊwa ɨ gɔ, ‘N Kwaama tʊgalam bǝnɨ a jǝg ń sǝ ń nyǝm jʊ swɨ lɛɨ, sǝ ń kuwo Nǝ Dǝngdǝng nɨ, sǝ ń nyʊwa kɛl gǝnɔ. 15Mʊ yǝlam nǝ nǝtǝm nyiyo a kɛl gǝn a daa nǝbɔ woi pʌd, a dul jʊ mʊ kuwo, mʊ nyʊwaɨ. 16Kǝngkɔ n wɛ mʊ yam lɛɨ? Gun ja yʊ ń mwɛ sagsagɔ, ja saalǝm bwɨlangkɛl mʊnɔ a gola jotǝm dun Tɛlalɔɨ.’
Jotǝm Bulusi A Daagɔ Bʌtʌbɔ Woi
17“Kwama mǝ yǝlam a Urushalimaɨ, mǝ maa keli lɛ a Kan Kwaaman, nǝngɔ mǝ dʊga dʊgam nyangnyangɨ. 18A mʊgɔ dʊgam nyangnyang n kuwo Yesu sʊwa lɛ gɔ, ‘Gun dǝbǝr, bǝla Urushalimagɔ, jʊ a bwɨɨ mɨsɔ jǝ jǝla nǝtǝm nyiyo mʊnɔ lɛ a dul mɨ.’
19“Nǝngɔ mǝ sʊwa mǝʊ, ‘Tɛlalɔ, tʌji ja nyǝm nyɔ a kan mɛlalɨ gwam, n bwaba nǝb nɨ a nǝ bɨlǝngkɛl nǝn mʊɨ, n bʊg ji. 20Nǝn kwama ja jʌm Istifanusi, wʊnɨ nǝ nyiyo lɛ a dul mʊnɨ, mǝ nǝn kang mɨ mǝ tɨm wo, n bwa jim guu a jʊ nɨ ja maaɨ. Nǝmǝ mǝ tɔɔ dʊʊl nǝb nɨ lɛ a jʌ gǝnɨ.’
21“Nǝngɔ Tɛlalɔ a sʊwa ɨ gɔ, ‘Gun ń shu. Mǝ twam ń twam ń a kʊta kʊtaɨ a daa Bʌtʌbɔ woi.’ ”
Nǝ Dʊʊgɔ A Kubʌl Bulus
22Mʊrkalɨ nǝbɨɨ nyʊwa Bulus lɛ ba la kɛl nɨ. Nǝngɔ jǝ gaba wulongɔ lɛ gɔ, “Jǝ́ jʌ gǝn! Jǝ́ wʊlaka nʊ nɨ jǝbɔ yooligɔ! A bʊm bɔ a maa dʊʊmɨ!”
23Kanga ja tɨtǝn gabatǝm wulongi, ja jǝg dwang malǝng jinɔ, jǝ ma lɛ a dʌbʌl, jǝ wa tǝmɔ lɛ, kuulɔ gun nɛ. 24Nǝngɔ dalɨ dʊʊ sʊwajaamɔ a sʊwa sʊwajaamtɨnɔ gɔ ja yɔ nǝn Bulus a kʊtʊgadi, ja fɨɨ gǝn nǝn banjangɨ, sǝ a nyǝm jʊ a bwɨ nǝbɔ ma gǝm bwaalɨ lɛɨ. 25Kwama ja bwam Bulus sǝ ja maa gǝm banjangɨɨ, nǝngɔ a bʌ dʊʊ sʊwajaam nɨ tɨm nǝn dɔɔm jǝbɔ gɨɨ gɔ, “N dǝngdǝng a diilɔ gǝm ń maa nʊ nɨ gǝm nǝn yɨm dul Romaɨ gǝm banjangɨ, jǝ́ maa gǝm bɔ borang ka?”
26Dʊʊ sʊwajaam nɨ a nyʊwa nyɨɨ, nǝngɔ a yɔ a daa dalɨ dʊʊ sʊwajaamɔ woi a sʊwa gǝn gɔ, “N wɛ mʊ saa maatǝmɔ lɛɨ? Balɨ nɨ n nǝ yɨm dul Roma.”
27Nǝngɔ dalɨ dʊʊ sʊwajaam nɨ a bɛ a daa Bulus woi, a bʌ gǝn gɔ, “Sʊwa ɨ bɨlǝngkɛl, mʊ nǝ yɨm dul Roma ka?”
Nǝngɔ Bulus gɔ, “Ɔɔ.”
28Nǝngɔ dalɨ dʊʊ sʊwajaam nɨ gɔ, “A mɨɨ mǝ ten nǝn kemʌn nɨ a lada dangǝnɨ.”
Bulus gɔ, “A mɨɨ ja bʌ i nǝn.”
29A dul kɛl nɨ nǝb nɨ fɨɨ gǝn nɛɨ, ja gʊ nǝn gul. Dalɨ dʊʊ sʊwajaam nɨ tǝgǝn a nyǝm nyɔ Bulus n nǝ yɨm dul Romaɨ, a nyʊwa taal, jʊ a bwɨɨ a kwɛl a bwa gǝn bwaɨ.
Bulus A Kǝga Dʊʊm Nǝbɨɨ
30Nǝn tǝmsɛlɨ dalɨ dʊʊ sʊwajaam nɨ swɨ lɛ a nyǝm jʊ a bwɨ Yahudawagɔ a yɔ nǝn katǝm kɛl nɨ a dul Bulusi, nǝngɔ a kwɨ gǝn, a sʊwa dʊʊm nǝbkǝlamɔ jǝbɔ nǝb dʊʊm koteregɔ ja mʊrkaɨ. Nǝngɔ a bɛ nǝn Bulus a dǝg gǝn a tɨ a kǝga jini.
Currently Selected:
Maajɨ Bɛtɔ Twamagɨɨ 22: DBD
Highlight
Share
Compare
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
