Maajɨ Bɛtɔ Twamagɨɨ 21
21
Yɔm Bulusi A Urushalima
1Wʊlakatǝm nǝnɔ nǝbɔ jii a bwa. Nǝngɔ nǝn dɔ tɨyamwɛngɔ nǝn shu a kǝga Kosi, tǝm nɨ a tɨbǝl wɨmaɨ. Nǝn tǝmsɛlɨ nǝngɔ nǝn shu a Rodusaɨ. A daa gɔ nǝngɔ nǝn shu a Bataraɨ. 2N daagɔ nǝn nya kaa tɨyamwɛng nɨ shu lɛ a tǝm Finikiyaɨ. Nǝngɔ nǝn dɔ nǝn shui. 3Kanga nǝn mal nugɔ nǝn kuwo Sayifurus lɛɨ, tǝm nɨ a tɨbǝl wɨmaɨ, nǝn ya gǝn nǝn kang fɔlɔng. Nǝngɔ nǝn ja kǝga nǝn yɔmɨ, nǝn yɔ a tǝm Suriyaɨ. Nǝngɔ nǝn gǝla a Tayaɨ. N daagɔ tɨyamwɛngɔ shigʌm kanjǝl gǝnɔ lɛ a doi.
4Nǝn nya nǝb bwangtǝmɔ woi, nǝngɔ nǝn yɨ wo kumɔ nʌbʌli. Yʊwa Kwaamaɨ a sʊwa ji gɔ ja sʊwa Bulus ka ga yɔ lɛ a Urushalima. 5Kwama guntǝm nǝnɔ a laɨ, nǝngɔ nǝn gun nǝn ja kǝga nǝn yɔm nǝnɨ. Gwam jinɔ jǝbɔ nɔɔtǝlam jinɔ jǝbɔ bɛtɔ lɔ jii, ya ja ywa nǝn a gul tuulɔ. Nǝngɔ nǝn jʊng a kʌng mwɛ nǝn maa keligɨɨ. 6Nǝngɔ nǝn ywabkaɨ. Nǝngɔ nǝn dɔ tɨyamwɛngɨ, ji tʌji ja yǝla a lɔ.
7Nǝn ja kǝga nǝn yɔm nǝnɔ nǝn bǝla Tayagɔ, nǝngɔ nǝn la Talamayasɨ. Nǝngɔ nǝn yalka nǝbɔ kambɨɨ, nǝn maa kumɔ win a daa ji woi. 8Nǝn tǝmsɛlɨ nǝngɔ nǝn gun nǝn shu a Kaisarɨ. Nǝn dɔ lɔ Filibusi, nǝ kiyotǝm kɛl Kwaamaɨ, wʊnɨ win a mʊgɔ nǝbɔ ja jǝgǝm nʌbʌl sǝ ja tɨka nǝb bwangtǝmɔ a Urushalimaɨ. Nǝngɔ nǝn shig a daa gǝ woi. 9Nǝngǝn nǝn banatǝmɔ naal wʊnɨ ja naa bɔ batǝm woi. Jǝ maa kuwotǝmkǝga.
10Nǝn maa kumtɨn woi, nǝngɔ kaa nǝkuwotǝmkǝga dunɔ nǝn Agabus, a jel a Yahudiya. 11Agabus a bɛ a daa nǝn woi, nǝngɔ a do dwang fɛl Bulusi. Nǝngɔ Agabus a bwa kang gǝnɔ jǝbɔ naa gǝnɔ a sʊwa gɔ, “Yʊwa Kwaamaɨ a sʊwa gɔ, ‘Yahudawa nɨ a Urushalimaɨ bwa bwa nǝ dwang fɛl nɨ nyɔ, sǝ ja nǝ Bʌtʌbɔ.’ ”
12Nǝn nyʊwa nyɨɨ, nǝn jǝbɔ nǝbɔ woi, nǝn kela Bulus nǝngɔ ka ga yɔ lɛ a Urushalima. 13Nǝngɔ Bulus a jǝla gɔ, “N wɛ a bwɨ jǝ́ maa lɛ nyɨɨ? Jǝ́ ji wi lɛ, jǝ́ nɨ ɨ fitǝm nǝl lɛɨ? N kwɛl n fɛka fɛkaɨ, ke bɔ bwatǝm kwaagɔ, jǝ jʌ i jʌ i a Urushalima a kɛl dun Tɛlalɔ Yesui.”
14Nǝn kuwo a laa kwaan nǝnɨ, nǝngɔ nǝn yɨ shigi, nǝ sʊwa nǝngɔ, “Jʊ Tɛlalɔ swɨ lɛɨ, bɛ a nya maatǝm.”
15Kumtɨn gɔ a shui, nǝngɔ nǝn fɛka nǝn gwi nǝn shu a Urushalimaɨ. 16Kaam nǝb bwangtǝmɔ a Kaisarɨ ya ja ywa nǝn. Ja yɔ nǝn nǝn a lɔ Manasoni, a daagɔ nǝn shig lɛ woi. N bwɛ Sayifurus, win a mʊgɔ nǝb bwangtǝm tɨkǝgagɔ.
Bulus A Yɔ Yakubu Gǝm Fɔla
17Nǝn bɛ a Urushalimaɨ, kambɔ a yo nǝn nǝn fulotǝm nǝl. 18Nǝn tǝmsɛlɨ Bulus a bwanga jǝbɔ nǝn a daagɔ Yakubu woi. Dʊʊm nǝb bwangtǝmɔ gwam jǝ wo. 19A yal jii, nǝngɔ a kiyo jim kanjǝlɔ gwam Kwaama a maa a kʊm Bʌtʌbi a gola maajɨ nɨ ga maaɨ.
20Ja nyʊwa nyɨɨ, nǝngɔ ja bǝlá Kwaamagɨɨ, ja sʊwa Bulus gɔ, “Ń kuwo, kɛgɔ, bwɨ nǝbɔ a lada a kʊm Yahudawagɨɨ ja nǝ bɨlǝngkɛl. Gwam jinɔ jǝ bwangtǝn diilɔ lɛ dǝngdǝng. 21Ja sʊwa ji fulon kɛl mʊnɔ gɔ mʊ mɛla Yahudawagɔ gǝm lɛ gwam a kʊm Bʌtʌbi, ja bǝla diil Musaɨ. Mɔ ka ja biyo lɛ bɛtɔ lɔ ji gǝm mwɛn, ka ja bwangtǝn nɛ jǝfʊlǝn bǝnɔ. 22Laa bǝ maa nyǝn? N wɔ ja nyʊwa nyʊwaɨ fulon bɛtǝm mʊnɔ.
23“A dul kɛl nɨ bɛ maa jʊ nǝn sʊwa ń nɛɨ. Nǝn nǝn nǝbɔ naal fɔ wʊnɨ ja wɛɛl wɛɛlɨɨ. 24Bɛ ń yɔ jǝbɔ ji a Kan Kwaaman, ya ń saal dul mʊnɔ jǝbɔ a jinɔ gwam. Bɛ ń ywa kemʌn sǝ ja bʊtɨ jim dulɔ. A gola maatǝm nyɔ nǝbɔ gwam nyǝm nyǝm gɔ gwam jʊ nɨ ja sʊwa a dul mʊnɨ n gabakɛl. Jǝ kuwo kuwo mʊ kɨla diilɔ lɛ. 25A Bʌtʌb nɨ ja nǝ bɨlǝngkɛlɨ, nǝn kwɛl nǝn twam jim twamɨ langǝn bwangǝn nǝn gɔ nǝn biyo borangɔ. Ka ja ja lɛ jǝjalǝn nɨ ja tǝlam twama a shomtɨnɔ gǝmɨ, ka ja ja lɛ nam nɨ ja mʌlʌm mʌlʌmi kwɨlɨ, ka ja nɔɔ lɛ tʊʊm nam, ka ja maa lɛ bulon.”
26Nǝn tǝmsɛlɨ Bulus a do nǝb nɨɨ, nǝngɔ a saal dul gǝnɔ jǝbɔ a jini, nǝngɔ a dɔ Kan Kwaamanɔ sǝ a sʊwa kum yiitǝm saaltǝm jinɔ jǝbɔ kum tǝlatǝm twamagɔ a kɛl dul jin win wini.
Ja Ta Bulus A Kan Kwaaman
27Kum nʌbʌlɔ ya yii lɛɨ, kaam Yahudawagɔ a Asiyaɨ ja kuwo Bulus a Kan Kwaamanɨ, nǝngɔ ja swir mʊrkalɨ nǝbɨɨ a ta gǝnɨ. 28Jǝ gaba wulong lɛ jǝ sʊwa lɛ gɔ, “Kambɔ, nǝbɔ Israilaɨ, jǝ́ tɨka nǝn! N nʊ nɨ bwangtǝn daatɨnɔ lɛ soga nǝbam bǝnɔ lɛ, jǝbɔ diil bǝnɨ, jǝbɔ Kan Kwaaman bǝnɨ. A bɛ nǝn kaam nǝbɔ Girikaɨ a mʊgɔ Kan Kwaaman. A kal daa sagsagɔ.” 29Ja sʊwa nyɔ a dul kuwotǝm Bulusi jǝbɔ Tarofimas bwɛ Afisaɨ nɨ a mʊgɔ tuulɔɨ. Ja do gɔ kɛna Bulus a dɔ jǝbɔ gɔ a Kan Kwaamanɨ.
30Nǝngɔ tuulɔngɔ gwam a mǝgaɨ, nǝbɔ gwam a gun nǝn sʊgɔl ja ta Bulus, ja jǝg gǝn a Kan Kwaaman, ja nʊngam nyanga kanɔ yagɨ yagɨɨ. 31Jǝ swɨ lɛ ja jʌ gǝn dangǝnɨ, nǝngɔ fulonɔ ya la dalɨ dʊʊ sʊwajaamɨ gɔ Urushalimagɔ gǝ na a mʊgɔ komʌn. 32Tʌgo a kang nǝngɔ a wɔɔ sʊwajaamɔ jǝbɔ dʊʊm sʊwajaam Romagɔ ja shu a daagɔ nǝn sʊgɔlɨ. Nǝb kutʌmɔ a kuwo dalɨ dʊʊ sʊwajaamɔ jǝbɔ sʊwajaamtɨnɨ, nǝngɔ ja bǝla bʊgtǝm Bulusi.
33Nǝngɔ dalɨ dʊʊ sʊwajaamɔ a ta Bulus a dǝg ja bwa gǝn nǝn golmanɔ yoi. Nǝngɔ a bʌ gɔ, “Nʊ nɨ nuwo? N wɛ a maaɨ?” 34Mʊrkalɨ nǝbɨɨ ma bwaalɨgɔ lɛ, sʊwala katɨgɔ lɛ nǝn dʌmʌn. Bwaalɨ jinɔ a dǝg dalɨ dʊʊ sʊwajaam nɨ a nya bɔ bɨlǝngkɛlɨ, nǝngɔ a dǝg ja shu nǝn Bulus a kʊtʊgadi. 35Kwama Bulus a bɛ a daa delii, nǝngɔ sʊwajaamtɨnɔ a dem gǝnɨ, jʊ a bwɨɨ kutʌm mʊrkalɨ nǝbɨɨ a lada. 36Mʊrkalɨ nǝb nɨ a bwang jimi, jǝ ma bwaalɨgɔ lɛ jǝ sʊwa lɛ gɔ, “Jǝ́ jʌ gǝn!”
Bulus A Sʊwa Mʊrkalɨ Nǝbɨɨ Kɛl
37Ya jǝ dɔ lɛ nǝn Bulus a kʊtʊgadi, nǝngɔ a kela dalɨ dʊʊ sʊwajaamɔ gɔ, “Ń jǝla n sʊwa kɛl jǝbɔ mɔ ka?”
Nǝngɔ nǝ dʊʊgɔ gɔ, “Ń nyǝm nyiyo Girika ka? 38Mʊ bwɛ Masar wʊnɨ a joltɨnɔ a shui a gʊ kutʌm, a dǝg nǝbɔ fʊlkʊblǝn naal a jʌ dul a kuuli, ke bɔ mʊ ka?”
39Nǝngɔ Bulus a jǝla gǝn gɔ, “Mǝ bwɛ Yahudiyaɨ a Tarsus a tǝm Kilikiya. Mǝ bwɛ tǝm tuulɔ nyan. Mǝ kela ń nɛ bǝla ɨ n sʊwa nǝb nɨ kɛl.”
40Nǝngɔ a nǝ gǝn golaɨ. Bulus a tɨ a daa deli, a gung nǝbɔ gǝm kang gɔ ja yɨ shig. Ja yɨ shigi, nǝngɔ a sʊwa ji kɛlɔ nǝn nyiyo Yahudawagɨɨ.
Currently Selected:
Maajɨ Bɛtɔ Twamagɨɨ 21: DBD
Highlight
Share
Compare
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
