2 Korinti 9
9
Kɛtǝm Kemʌn Nǝb Sagsagɨɨ
1A yǝlam bɔ nyɔ n yǝla n mʊla jem kɛl tɨkalɨ a dul nǝb sagsagɨɨ tag. 2Jʊ a bwɨɨ, n nyǝm jǝ́ nǝn a nǝl jen jǝ́ maa tɨkalɨ. Mǝ maa lɨyal lɛ nǝn jen a dul jʊ nɨ a daa nǝbɔ Makidoniyaɨ woi. Mǝ sʊwa ji lɛ mǝʊ mʊrkalɨ nǝb bwangtǝm Kwaamaɨ nɨ a tǝm Akayaɨ ja maa fɛkalɨ jol nɨ a shui. Jʊ jǝ́ swɨ maatǝmɔ lɛɨ, a gung kɔrɔ jinɔ gǝm nǝl nǝtǝm.
3Jǝ́ maa lɛ a bʊm nyɔ sul, mǝ twam jem twam kɛtǝlam nɨ kage lɨyal nɨ nǝn maa lɛ nǝn jeni, a yɔ nǝn kwan. Bɛ jǝ́ yɨ nǝn fɛkalɨ, kanga mǝ sʊwa mǝʊ jǝ́ fɛkaɨ, 4kage a yǝlam na kaam nǝbɔ Makidoniyaɨ a bɛ dakini jǝbɔ mɨɨ, ba ja nya jǝ́ fɛka bɨɨ, gunidulɔ ta nǝn ta, a bwɨlam kǝga a daa jen woi, a jǝlatǝm nɨ nǝ maa lɛ nǝn jeni. 5N jʊ a bwɨ mǝ kela kambɔ nɨ dakini jǝbɔ mǝɨ, ja laa ɨ yɔtǝmɔ a daa jen woi, sǝ ja sʊwa jen jǝ́ tagǝm nǝtǝm nɨ jǝ́ maa swatǝm yaa galɨgǝnɨ, sǝla n yɔ. Bɛ jǝ́ fɛka, ke bɔ sɨnatǝm, n nǝtǝm nǝlɔ win.
6Jǝ dʌngtǝmɔ n wɔ, nʊ nɨ a wa dʊʊmɔ dǝmɨ, kʌso nǝn dǝm nyɔ. Nʊ nɨ a wa dʊʊmɔ a ladaɨ, kʌso a lada nyɔ. 7Gwam jenɔ bɛ jǝ́ nǝ kanga jǝ́ maa bʊʊlalɨɨ, ke bɔ sɨnatǝm jen jǝbɔ kaltǝm nǝl, jʊ a bwɨɨ Kwaamagɔ swɨ nʊ nɨ lɛ maa nǝtǝm lɛ nǝn fulotǝm nǝlɨ. 8Kwaama nǝn kwaan a nǝ jen a laa jʊ jǝ́ saa lɛɨ, dɨsɔ jǝ́ yǝlam nǝb nyatǝm kwangkwang nǝn kanjǝlɔ a golantɨnɔ gǝm gwam, sǝ jǝ́ dem kang a nǝtǝm jenɔ gǝm a maajɨ nya gwam. 9Kanga a mʊla mʊlaɨ gɔ,
“A nǝ nǝb bʊnǝnɔ a daatɨnɔ gǝlala nyɔ.
Maajɨ dǝngdǝng gǝnɔ mɨ dɨtǝm wo.”
10Nǝn Kwaama gǝ nǝ nǝbɔ dʊʊmɔ lɛɨ. Nǝn gɔ nǝ jǝjalǝn nɛɨ. Nǝn gɔ sʊ mʊn nyatǝmɔ lɛɨ, sǝ ya jǝ́ tɨka nǝb nɨ lɛ mɨ nǝnɨ. 11Kwaama dǝg jem dǝg bwili a golantɨnɔ gǝm gwam, sǝ ya jǝ́ nǝ lɛ nǝn kwɨtǝm kang. Nǝtǝm nɨ jǝ́ maa lɛɨ, yǝlam gola buutǝm kang a daa Kwaama woi a gola nǝn.
12Jʊ a bwɨɨ, nǝtǝm nɨ jǝ́ maa lɛɨ, ke bɔ ywatǝm komʌm nǝb sagsagɨɨ kwaaji maa lɛɨ, gǝ sʊ buutǝm kang a daa Kwaama woi dangǝn. 13Maajɨ nǝtǝm jenɔ nɨ gǝ nʊng jǝ́ nǝb bwangtǝm bɨlǝngǝn. N gola nɨ nǝbɔ gung dʊʊlǝn Kwaamaɨ lɛɨ, jʊ a bwɨɨ jǝ́ jǝla nǝn fulon kɛl lǝmɨ Kiristii, jǝ́ bwangtǝn. Nǝbɔ gung gung dʊʊlǝn Kwaamaɨ a tɨkalɨ nɨ jǝ́ maa jim jǝbɔ tangǝn nǝbɔ nǝlɔ wini. 14Jǝ maa jem maa keli, nǝn bʊʊlalɨ swɨtǝm jenɔ a nǝl jin, a kɛl dul lǝma Kwaamaɨ wʊnɨ mɨsɔ jǝ́ dwal kiyotǝmɔ lɛ a maa jemi. 15Buutǝm kangɔ na a Kwaamaɨ a nǝtǝm gǝnɔ gǝm wʊnɨ a laa kwaan sʊwatǝmɨ.
Currently Selected:
2 Korinti 9: DBD
Highlight
Copy
Compare
Share
Want to have your highlights saved across all your devices? Sign up or sign in
©️2024 Luke Initiative for Scripture Translation
