2 Korinti 10
10
Bulus A Kʌshi Maajɨ Gǝnɔ
1Mǝ Bulus nǝn kang mɨ mǝ kel jen nɛ nǝn shigtǝm dul jǝbɔ nǝl yʌbi a Kiristii. Nǝbɔ sʊwala lɛ gɔ mǝ nǝ taal na mǝ a kʊm jeni. Mǝ nǝ sʊwatǝm kɛl nǝn kwaan na n bǝla jeni. 2Mǝ kela jen nɛ ka jǝ́ dǝg ɨ lɛ n yǝlam nǝ sʊwatǝm kɛl nǝn kwaan na n bɛɨ. Mǝ bʊʊla lɛ n sʊwa kɛl nǝn kwaan a nǝb nɨ sʊwa lɛ gɔ jʊ nɨ nǝ maa lɛɨ n maajɨ yoolii.
3Nǝ nyǝm nyɔ yɨm nǝnɔ n yɨm yooli sul, tatǝm kun nǝnɔ ke bɔ a yooli. 4Kanjǝl tatǝm kun nǝnɔ n ke bɔ a yooli. N kwaan Kwaamaɨ, wʊnɨ gǝ kʌb kanjǝl kwaan Mammɨ lɛɨ. 5Nǝn kʊwa nǝbɔ taba fɨ lɛ a katɨ jinɔ gǝmɨ. Nǝn tʊngam kwalɨtɨn nɨ kʌshi kɛl Kwaamaɨ lɛɨ. Nǝn gʊ bʊʊlalɨ nǝl nǝbɨɨ lɛ gwam sǝ ja bwangtǝn Kiristi. 6Na jǝ́ bwangtǝn Kiristi lɛ dǝngdǝngɨ, nǝn maa fɛkalɨ, sǝ nǝ mwɛ nǝb nɨ gwam a bwangtǝn bɨɨ.
7Jǝ́ dʌng jʊ nɨ a talɨ! Na nǝl a jǝla gɔ gǝ na a Kiristii, bɛ ga nyǝm gɔ nǝn tǝnǝn nǝ na nyɔ. 8Na mǝ maa maa lɨyal a gǝlala a kwaan fɔlɔn nǝnɔ nɨɨ, wʊnɨ Tɛlalɔ a nǝ nǝn sǝ a dǝg jen jǝ́ dʊʊl a maajɨ gǝnɔ gǝmɨ, na ke bɔ jʊ nɨ kʌb jen nɛɨ, mɨsɔ mǝ nyʊwa gunidul lɛ. 9Bɛ ka jǝ́ kuwo lɛ maamɔ mǝ nǝ jen taal a langǝn bwangǝn. 10Kaamɨ sʊwa lɛ gɔ, “Langǝn bwangǝn gǝnɔ gǝ dɔ bʊtɔ, nǝn kwaan, a kaa gola na ń kuwo gǝn kǝga jǝbɔ kǝgaɨ, n ke bɔ kwamɨ nǝlɨ, kɛl gǝnɔ tag n ke bɔ kɛl.” 11Bɛ nǝb nɨ a nyǝm gɔ jʊ nǝn sʊwa lɛ a mʊgɔ langǝn bwangǝnɨ na mɨ nǝ woi, n jʊ nǝ maa lɛɨ na nǝn woi.
12Na nǝn nǝn wo nǝn mʊrka dul nǝnɔ lɛ jǝbɔ kaam nǝb nɨ gung dul lɛɨ? Nǝn la bɔ nyɔ nǝn mʊrka dul nǝnɔ jǝbɔ nǝb nɨ gung dul lɛɨ! Nǝb nɨ n nǝbɔ gǝ sʊwa dul jinɔ lɛ a kʊm jini, jǝ mʊrka dul jinɔ lɛ a kʊm jin tagɨ, mɨ ji nǝn yʊlan.
13A nǝnɔ mɨsɔ nǝn gung dul nǝnɔ lɛ a laa nyɔ. Nǝn tɨ a daa Kwaama a mwatɨ nǝmɨ, a la daagɔ jen woi gwam. 14Nǝn yab bɔ daa nɨ Kwaama a mwatɨ nǝmɨ, maamɔ jǝ́ na bɔ a daa nǝn woi. Nǝnǝn nǝn yɔ a daagɔ jen woi nǝn fulon kɛl lǝmɨ Kiristii nǝn tɨkǝgaɨ.
15Lɨyal nǝnɔ a yab bɔ tili, jʊ a bwɨɨ nǝ maa bɔ lɨyal nǝn maajɨ kaam nǝbɨɨ. Nǝn ya nǝl lɛ kanga nǝtǝm bɨlǝngkɛl jenɔ sʊ lɛ a kǝgaɨ, maajɨ nǝnɔ a mʊgɔ jeni, sʊ sʊ a kǝga dangǝn. 16N gola nɨ nǝ nya kiyotǝm fulon kɛl lǝmɨ lɛ a tǝmtɨn nɨ a kǝga jǝbɔ jeni. Nǝ swɨ bɔ nǝ maa lɨyal a tǝm nɨ nǝl a kwɛl a maa maajɨ woi, n daa gǝnɨ. 17Kanga a mʊla mʊlaɨ gɔ, “Nʊ nɨ maa lɨyal lɛɨ, ga maa lɨyal nǝn Tɛlalɔ.” 18Mɨ nʊ nɨ wo gung dul gǝnɔ lɛ jǝ jǝla lɛ nǝn gɨɨ, na ke bɔ nʊ nɨ Tɛlalɔ a gung dul gǝnɨ.
Currently Selected:
2 Korinti 10: DBD
Highlight
Copy
Compare
Share
Want to have your highlights saved across all your devices? Sign up or sign in
©️2024 Luke Initiative for Scripture Translation
