1 Tasalonikaɨ 3
3
1Kanga nǝn mwɨ bɔ nǝn bwa nǝl a kʊtaɨ, nǝngɔ nǝn kuwo nǝn gɔ a bʊm nyɔ nǝn yɨ a Atina kwaanǝn. 2Nǝn twam Timoti, wʊnɨ nǝn kɨla nǝnɨ, n fwalɨ maajɨ nǝn a dul maajɨ Kwaamaɨ a kiyotǝm fulon kɛl lǝmɨ Kiristii, sǝ a sʊ jem kwaan, a kʊʊ jem nǝl a nǝtǝm bɨlǝngkɛl jenɔ gǝm. 3Nǝn twam gǝn kage kaa nǝl a nya komtǝm a mʊgɔ gaalan nɨɨ. Jen nǝn kang jen jǝ́ nyǝm n jʊ ja ya nǝmɨ. 4Nǝn kwama nǝnɔ jeni nǝn sʊwa jen nɛ nǝn gɔ, bǝ nɔɔ nɔɔ gaalan. A ba yǝlam nyɔ kanga jǝ́ nyǝmɨ. 5A dul kɛl nɨɨ, mǝ mwɨ bɔ n bwa nǝl a kʊtaɨ, nǝngɔ mǝ twam dɨsɔ n nyʊwa fulon nǝtǝm bɨlǝngkɛl jeni. Mǝ sa lɛ mǝʊ kage nǝ tɛltǝm nɨ a tɛl jen, gaalan maajɨ nǝnɔ a yɔ mwɛ nǝn kwan.
6N wɔ, kǝngkɔ, Timoti a yǝla a bɛ a daa jen woi. A bɛ nǝm nǝn fulon kɛl lǝmɨ a dul nǝtǝm bɨlǝngkɛl jenɔ gǝm jǝbɔ swɨtǝm jenɔ. A sʊwa nǝn kanga kwangkwang jǝ́ bʊʊla lɛ nǝn nǝnɨ, nǝn bʊʊlalɨ nyanɨ, jǝ́ ya nǝl lɛ dangǝn jǝ́ kuwo nǝn, kanga nǝn tǝnǝn nǝn ya nǝl lɛ nǝn kuwo jeni. 7A na nyɔ kambɔ, a mʊgɔ gʌtǝm nǝnɔ gǝm, jǝbɔ gaalanɔ nǝn nɔɔɨ, nǝn kʊʊ nǝl a dul jen a kɛl nǝtǝm bɨlǝngkɛl jenɔ gǝm. 8Kǝngkɔ nǝl nǝnɔ a yʌb, na jǝ́ tɨm nǝn kwaan a mʊgɔ Tɛlalɔɨ. 9N buutǝm kang won nǝn maa Kwaama gǝm lɛ a dul jeni, a fulotǝm nǝl nɨ nǝn maa lɛ a kǝga Kwaama bǝn a kɛl dul jeni? 10Kum jǝbɔ kɔkɔ nǝn maa keli lɛ dangǝn mɨ tɨtǝm wo, sǝ nǝn nya kuwotǝm jenɔ kǝga jǝbɔ kǝga, sǝ nǝn yii jʊ nɨ a gɨya a nǝtǝm bɨlǝngkɛl jenɔ gǝmɨ.
11Bɛ Kwaama bǝnɔ, Tɛtɛ bǝn nǝn kang gǝn, jǝbɔ Tɛlalɔ bǝn Yesu, a fɛka nǝm gola sǝ nǝn yɔ a daa jen woi. 12Bɛ Tɛlalɔ a dǝg jǝ́ nya sʊtǝm a mʊgɔ swɨkan a lada a kʊm jen jǝbɔ nǝbɔ gwam, kanga nǝn maa jem lɛɨ. 13Bɛ Kwaama a kwam jem nǝl, jǝ́ yǝlam nǝb nɨ mɨsɔ jǝ tuwo jen nɛɨ, nǝb sagsag a kǝga Kwaama Tɛtɛ bǝnɨ, nǝn kɔkɔ nɨ Tɛlalɔ bǝn Yesu yǝla bɛm lɛ dakini jǝbɔ nǝb sagsag gǝnɔ gwamɨ.
©️2024 Luke Initiative for Scripture Translation