1 Tasalonikaɨ 2
2
Maajɨ Bulusi A Tasalonikaɨ
1Kambɔ, jen nǝn kang jen jǝ́ nyǝm fɔla nɨ nǝn yɔ jemi, ke bɔ nǝn kwan. 2Nǝn nɔɔ gʌleng gaalan jǝbɔ sogan a tuulɔ Filibi, kanga jǝ́ nyǝmɨ, nǝn tɨkalɨ Kwaama bǝnɨ, nǝn sʊwa jen fulon kɛl lǝmɨ Kwaamaɨ a kǝga nǝb nɨ kɔ nǝn nɛɨ. 3Keli nɨ nǝn maa jem lɛɨ, mɨ gabakɛl wo, mɨ dǝnglatǝm kɛl wo a mʊgɔ gǝn, mɨ swagtǝm wo. 4Kanga Kwaama a jǝla nǝn nǝnɨ, a nǝ nǝn tatǝm fulon kɛl lǝmɨgɨɨ, nǝn gɔ nǝn sʊwa lɛɨ, ke bɔ sǝ nǝn fulo nǝbɔ gǝm nǝl. Nǝn fulo Kwaama gǝm nǝl, wʊnɨ tɛl nǝl bǝnɔ lɛɨ. 5Kanga jǝ́ nyǝmɨ, mɨ nǝn nǝn lǝma nyiyo jǝbɔ wɛl a nǝl nǝn. Kwaama nǝn gɔ a nǝ nyiyo a nǝn gǝmɨ. 6Nǝn saa bɔ bǝlátǝm wo a daagɔ nǝbɨɨ, ke bɔ a daa jen woi jǝbɔ kaamɨ.
Na na nǝn swɨ lɛɨ, na nǝn maa maajɨ nǝn fɔlɔn nǝnɔ na bɛtɔ twama Kiristii, na nǝn saa tɨkalɨ. 7Nǝn dʌng jen nɛ kanga nɛ bwɛ gǝ dʌngʌm bɛtɔ lɔ gɨɨ lɛɨ. 8Nǝn swɨ jen nɛ nǝn bɨlǝngǝn, n jʊ a bwɨ nǝn fɛka sǝ nǝn mal jem nyiyo a dul fulon kɛl lǝmɨɨ. N ke bɔ fulon kɛl lǝmɨ Kwaamaɨ nɨ kwaagɔ. Nǝn fɛka sǝ nǝn nǝ kʊlɨ nǝnɔ a kɛl dul jen, jʊ a bwɨɨ jǝ́ dɔ nǝl nǝnɔ dangǝn. 9Kambɔ, bɛ jǝ́ bʊʊla nǝn gaalanɔ nǝn nɔɔɨ, jǝbɔ gʌtǝmɔ nǝn gʌi kwama nǝn kiyom fulon kɛl lǝmɨ Kwaamaɨ lɛɨ, nǝn maa maajɨ lɛ kum jǝbɔ kɔkɔ, nǝn gɔ ka nǝn ya jem tuulo.
10Jǝ́ nǝb nǝtǝm nyiyo, gǝ na nyɔ a daa Kwaama woi, a yɨm sagsagɔ, jǝbɔ yɨm dǝngdǝngɔ, jǝbɔ yɨm nɨ mɨ nǝn kʊlanɨ nǝn yɨ a kʊm jeni, jǝ́ nǝbɔ jǝ́ nǝ bɨlǝngkɛlɨ. 11Jǝ́ nyǝm nǝn bwangtǝn nɛ nǝn jen kanga tɛ bwɛ gǝ bwangtǝn nɛ nǝn bɛtɔ lɔ gɨɨ. 12Nǝn kʊʊ jem nǝl lɛ, nǝn yʌb jem nǝl lɛ, nǝn kel jen nɛ jǝ́ yɨ yɨm nɨ a daa tʌgo a bǝlátǝm Kwaamaɨ, wʊnɨ a jo jen a fɔlɔn gǝnɨ, jǝbɔ dʊʊlǝn gǝnɨ.
13Nǝn buu Kwaama gǝm kang lɛ kwangkwang jʊ a bwɨɨ, nǝn kwama jǝ́ yem kɛl Kwaamaɨ, wʊnɨ jǝ́ nyʊwa a daa nǝn woi, jǝ́ yo bɔ na kɛl nǝfilii, jǝ́ yo gǝn kanga a namɨ. Kɛl Kwaamaɨ n bɨlǝngǝn, wʊnɨ maa maajɨ lɛ a mʊgɔ nǝl jen jǝ́ nǝb nǝtǝm bɨlǝngkɛlɨ. 14Kambɔ, jǝ́ yǝlam jǝ bangal a mʊrkalɨtɨn nǝb bwangtǝm Kwaamaɨ wʊnɨ a mʊgɔ Kiristi Yesui, wʊnɨ a tǝm Yahudiyaɨ, jʊ a bwɨɨ jen tʌjen jǝ́ nɔɔ gaalan a kang nǝb tǝm jenɔ gǝm, kanga ji tʌji ja nɔɔ gaalan a kang Yahudawagɨɨ.
15N nǝbɔ a jʌ Tɛlalɔ Yesu jǝbɔ nǝbkuwotǝmkǝgagɨɨ, ja kaa nǝnɨ. Mɨ jǝ maa maajɨ nɨ lɛ Kwaama swɨ lɛɨ. N nǝb kɔtǝm nǝbɨɨ gwam. 16Ja bǝla nǝn bɔ nǝn kiyo Bʌtʌbɔ gǝm kage ja nya bʊʊtǝm. A na nyɔ, kwangkwang jǝ yii bʊtɔ jinɔ sǝgǝr nǝn bwɨlangkɛl jinɔ. A dɨltǝmɔ gǝmɨ, nabwɨl Kwaamaɨ a gǝla jim.
Bulus Swɨ Lɛ A Yɔ Fɔla A Tasalonika
17Kambɔ, nǝn kwama ja wʊlaka nǝn jǝbɔ jen a kǝlɨ kwama nǝn dǝm nyɨɨ (wʊlakatǝm a bʊtɔ ke bɔ a bʊʊlalɨ), nǝn ya nǝl sǝ nǝn kuwo jen kǝga jǝbɔ kǝga. 18Nǝn maa bʊʊlalɨ yɔm lɛ a daa jen woi. Mǝ Bulus, ke bɔ naa win. Mammɔ a kʌshi gola nǝnɔ. 19N wɛ nyɨɨ n jǝ yatǝm nǝl nǝnɨ, jǝbɔ jǝ fulotǝm nǝl nǝnɨ, jǝbɔ dwang dul lɨyal nǝnɔ a kǝga Tɛlalɔ bǝn Yesui a di yǝlatǝm gǝnɨ? N ke bɔ jen ka? 20Nǝjen jǝ́ jǝ lɨyal nǝnɨ, jǝbɔ jǝ fulotǝm nǝl nǝnɨ.
Currently Selected:
1 Tasalonikaɨ 2: DBD
Highlight
Copy
Compare
Share
Want to have your highlights saved across all your devices? Sign up or sign in
©️2024 Luke Initiative for Scripture Translation