1 Korinti 11
11
1Jǝ́ maa mɛlalɨ nǝn mǝ kanga mǝ maa mɛlalɨ nǝn Kiristii.
Nɔɔtǝmɔ Ja Bwa Dwang A Dul
2Mǝ buu jem kang lɛ jʊ a bwɨɨ jǝ́ bʊʊla lɛ nǝn mǝ a kanjǝlɔ gǝm gwam, jǝ́ ta kanjǝlɔ gwam mǝ mɛla jemi.
3Mǝ swɨ lɛ jǝ́ nyǝm nyɔ, nǝ dʊʊ balɨɨ nǝn Kiristi. Nǝ dʊʊ nɔɔlɨɨ nǝn bwɨla gɔ. Nǝ dʊʊ Kiristii nǝn Kwaama. 4Balɨ nɨ gwam a maa keli jǝbɔ kuwotǝmkǝga a sum sumi dul gǝnɨ, gǝ nǝ dʊʊ gǝnɔ gunidul. 5Gwam nɔɔlɨ nɨ a maa keli jǝbɔ kuwotǝmkǝga a bwa bɔ dwang a duli, gǝ nǝ dʊʊ gǝnɔ gunidul. Gǝ na win jǝbɔ a wʊnɨ ga bʊtɨ dul gǝnɨ. 6Na nɔɔlɨ a kɔ bwatǝm dwang a duli, bɛ ga bʊtɨm dul gǝnɔ. Na jǝ gunidul nɔɔlɨ a bʊtɨ dul gǝnɨ, bɛ ga bwa dwang a dul. 7Balɨ a bʊm bɔ a sum dul gǝnɔ, jʊ a bwɨɨ ga jelka Kwaama, gǝ nʊng dʊʊlǝn Kwaamaɨ tag. Nɔɔlɨ gǝ nʊng dʊʊlǝn bwɨla gɨɨ. 8Jʊ a bwɨɨ balɨ a jel bɔ a daagɔ nɔɔlɨ woi, n nɔɔlɨ a jel a bʊtɔ balɨɨ. 9Kwaama a fɛ bɔ balɨ a kɛl nɔɔlɨ. N nɔɔlɨ Kwaama a fɛ a kɛl balɨɨ. 10N jʊ a bwɨ a bʊm nɔɔlɨ a bwa dwang a duli, n gola nʊngtǝm kwaan. A bʊm ga bwa dwang a dul a kɛl bɛtɔ twama Kwaamaɨ.
11A fɛkalɨ Tɛlalɔɨ, ja wʊlaka bɔ nɔɔlɨ jǝbɔ balɨ, ja wʊlaka bɔ balɨ jǝbɔ nɔɔlɨ. 12Kanga nɔɔlɨ a jel a daagɔ balɨ woi, gǝ na nyɔ, balɨ n bʌtʌm nɔɔlɨɨ. Kanjǝlɔ gwam a jel a daagɔ Kwaama woi. 13Jen nǝn dul jen jǝ́ dʌng jǝ́ kuwo. A bʊm nyɔ nɔɔlɨ a kela Kwaama a bwa bɔ dwang a dul ka? 14A fwaltǝmɔ gǝmɨ Kwaama a nʊng nyɔ gɔ na balɨ a bǝla yitʌn dulɔ a sʊ nyɨɨ, n jǝ gunidul. Mɨ nyɔ ka? 15Na yitʌn dul nɔɔlɨ a sʊɨ, n jǝ bʊmɨ a daa gǝ woi. N kɛl sɔtǝm dul ja fɛ yitʌn dul gǝnɨ. 16Na kaa nǝl saa gʊtǝm lɛɨ, a nǝnɔ nǝ nyǝm bɔ kaa jǝfʊlǝn. Mʊrkalɨ nǝb bwangtǝm Kwaamaɨ nyɔ tʌji.
Kaltǝm Jǝjalǝn Bʊʊlatǝm Nǝn Tɛlalɔɨ
17A kɛl jʊ nɨ mǝ sʊwa jen sʊwa, mǝ buu jem bɔ kang, jʊ a bwɨɨ mʊrkalɨ jenɔ ke bɔ a nyan, na a bwɨla. 18Na winɔ na jǝ́ mʊrkaɨ, n mʊrkalɨ nǝb bwangtǝm Kwaamaɨ, n nyʊwa gɔ gʊbkatǝmɔ wo a kʊm jen. N tǝl mǝ jǝla lɛ nǝn kɛl gɔ. 19Mɨ nyǝmatǝm wo, jǝ́ nya nya gʊbkatǝm a kʊm jen, sǝ jǝ́ nyǝm nǝb nɨ Kwaama a jǝla nǝn ji a kʊm jeni. 20Na jǝ́ mʊrka daagɔ win jengɔ jǝ́ ja jǝjalǝn bʊʊlatǝm nǝn Tɛlalɔɨ, n ke bɔ jǝjalǝn bʊʊlatǝm nǝn Tɛlalɔɨ jǝ́ ja lɛɨ! 21Jʊ a bwɨɨ a daa jatǝm, kaamɨ gǝ ja kʌshi jin kwaaji, kaa wɔ nyʊwa jʊwan nɛ, kaa wɔ a nɔɔ maa gǝn nɛ. 22Mɨ jen nǝn lɔtɨn nɨ jǝ́ ja lɛ, jǝ́ nɔɔ lɛ woi ka? Jǝ́ soga mʊrkalɨ nǝb bwangtǝm Kwaamaɨ, jǝ́ nǝ nǝb nɨ mɨ nǝn kaa jǝlɨ gunidul ka? N wɛ mǝ sʊwa jen nɛɨ? Mǝ wana jen a dul jʊ nɨ jǝ́ maaɨ ka? Mɨ nyɔ! Mɨsɔ mǝ wana jen nɛ.
Jatǝm Kʊkkʊm Jǝbɔ Nɔɔtǝm A Kʌshi Tɛlalɔɨ
(Mat 26:26-29; Mar 14:22-25; Luk 22:14-20)
23Jʊ nɨ mǝ yo a daagɔ Tɛlalɔ woi nǝn gɔ mǝ nǝ jeni, gɔ, Tɛlalɔ bǝn Yesu a kum nɨ ja lungtom gǝnɨ, a do kʊkkʊmɔ. 24Kwama a buu Kwaama gǝm kangɨ, nǝngɔ a kǝlsa, a sʊwa gɔ, “Wʊnɨ n bʊtɔ mɨ, wʊnɨ mǝ nǝ jeni. Ya jǝ́ maa lɛ nyɔ sǝ ya jǝ́ bʊʊla lɛ nǝn mǝ.” 25A gul jǝjalǝnɔ gǝmɨ, nǝngɔ a do kʌshigɔ a sʊwa gɔ, “Kʌshi nɨ n swatǝm yaa fɨ, a wʊnɨ ja swa nǝn tʊʊm mɨɨ. Kwama nɨ gwam jǝ́ nɔɔm lɛ a kʌshi nɨɨ, bɛ jǝ́ nɔɔ sǝ jǝ́ bʊʊla nǝn mǝ.” 26Kwama nɨ gwam jǝ́ jam kʊkkʊm nɨ lɛ, jǝ́ nɔɔm lɛ a kʌshi nɨɨ, jǝ́ sʊwa bwaa Tɛlalɔɨ ba la nǝn bɛtǝm gǝnɔ.
Jatǝm Kʊkkʊm Jǝbɔ Nɔɔtǝm A Kʌshi Tɛlalɔɨ A Gola Nɨ Mɨ Dǝngdǝngɨɨ
27Nʊ nɨ a ja kʊkkʊm nɨɨ, a nɔɔ a kʌshi Tɛlalɔɨ a gola nɨ mɨ dǝngdǝngɨ, a maa bwɨlangkɛl, a kal bʊtɔ Tɛlalɔɨ jǝbɔ tʊʊm gǝnɔ. 28Bɛ ga fɛ ga fɨɨ dul gǝnɔ sǝla ga ja kʊkkʊmɔ, ga nɔɔ a kʌshigɔ gǝm. 29Nʊ nɨ gwam a ja kʊkkʊmɔ, a nɔɔ a kʌshi nɨ, a dʊʊl bɔ bʊtɔ Tɛlalɔɨ, a gʊ dul gǝnɔ gǝm borang a gola jatǝm jǝbɔ nɔɔtǝm nɨ ga maaɨ. 30N jʊ a bwɨ kaamɨ a lada nyɔ a kʊm jen jǝ daa bɔɔla lɛ mɨ ji nǝn kwaanɨ, kaamɨ a daa dumi. 31Na bǝ fɨɨ dul bǝnɨ, mɨsɔ jǝ maa bǝm borang lɛ. 32Na nǝn Tɛlalɔ maa bǝm borangɔ lɛɨ, bǝ nya mwɛtǝm lɛ, kage Kwaama a mwatɨ bǝm borang jǝbɔ tangǝn nǝbɔ yoolii nɨ.
33A na nyɔ, kɛtǝlam mɨ, na jǝ́ mʊrka jatǝm jǝjalǝnɨ, bɛ jǝ́ yamka. 34Na kaa nǝl nyʊwa jʊwan nɛɨ, bɛ ga ja a lɔ gɔ, kage mʊrkatǝm jenɔ a gʊ jem borang.
Tangǝn kaam katɨgɔ, mǝ nǝ jen nǝ diil na n bɛɨ.
Currently Selected:
1 Korinti 11: DBD
Highlight
Copy
Compare
Share
Want to have your highlights saved across all your devices? Sign up or sign in
©️2024 Luke Initiative for Scripture Translation
