1 Korinti 10
10
Gʊtǝm Lɔl A Dul Bwangtǝm Shom
1Mǝ swɨ lɛ jǝ́ nyǝm, kambɔ, tʊgalam bǝnɔ gwam ja bwangtǝn lul. Gwam jinɔ ja yab a mʊgɔ wɨma. 2Gwam jinɔ ja yʊ ji mwɛ sagsag a lul jǝbɔ wɨma, ja yǝlam nǝb bwangtǝm Musaɨ. 3Gwam jinɔ n jǝjalǝn yʊwagɔ win Kwaama a nǝ ji ja jaɨ. 4Gwam jinɔ n mwɛ yʊwagɔ win Kwaama a nǝ ji ja nɔɔɨ. Jʊ a bwɨɨ ja nɔɔ mwɛmɔ a sunte nɨ na a Kwaamaɨ, wʊnɨ a yɔ yɔm jǝbɔ jii. Sunte nɨ nǝn Kiristi. 5Kwaama a maa bɔ fulotǝm nǝl wo dǝm nǝn kɔrɔ jinɔ. Nǝn gɔ a jʌbo ji a kuuli.
6Kanjǝl nɨ n gʊtǝm lɔl a daa bǝn woi. Ka bǝ maa lɛ wɛl kanjǝl bwɨlantɨn kanga ja maaɨ. 7Ka jǝ́ yǝlam lɛ nǝb bwangtǝm shom, na kaamɨ. A mʊla mʊlaɨ gɔ, “Nǝbɔ a yɨ jatǝm jǝjalǝn jǝbɔ nɔɔtǝm. Nǝngɔ ja gun ja ta yegɔ a kǝga shomi.” 8Ka bǝ maa lɛ bulon kanga kaamɨ a maaɨ, wʊnɨ nǝbɔ fʊlkʊblǝnɔ fʊltiyo jeli taal (23,000) ja bʊla kumɔ wini. 9Ka bǝ tɛl lɛ Tɛlalɔ na nɨ kaamɨ a maaɨ, sɔɔtɨnɔ a jʌbo jii. 10Ka bǝ maa lɛ kʊngatǝm na wʊnɨ kaamɨ a maaɨ, bwɛ twama Kwaamaɨ nǝ jʌtǝmɔ a jʌbo jii.
11Jʊ nɨ a bwɨ nǝn ji gwam sǝ a yǝlam bǝm mɛlalɨ. Ja mʊla ji sǝ a gʊ bǝm lɔl, bǝn nɨ dɨltǝm yooli nɨ a bɛ bǝmɨ. 12Na gǝ na nyɨɨ, nʊ nɨ kuwo lɛ gɔ gǝ tɨɨ, bɛ ga nyǝm, kage ga yala. 13Mɨ kaa tɛltǝm nɨ a nya jen a wʊnɨ ja maa bɔ nǝfili gǝm woi. Kwaama n nǝ yiitǝm swatǝm yaa. Mɨsɔ bǝla lɛ ja tɛl jen nǝn jʊ nɨ laa kwaan jenɔ lɛɨ. A tɛltǝmɔ gǝmɨ, maa jem maa gola nɨ jǝ́ jelʌm lɛɨ, sǝ jǝ́ bwa nǝlɨ.
14Gǝ na nyɔ, fatǝlam mɨ nɨ mǝ swɨ lɛɨ, jǝ́ mwal bwangtǝm shomɔ. 15Mǝ sʊwa jen kɛlɔ na nǝb nɨ nǝn yʊlanɨ. Jǝ́ dʌng nǝn kang jen jǝ́ kuwo, na jʊ mǝ sʊwa lɛɨ n bɨlǝngkɛlɨ. 16Kʌshi buutǝm kang nɨ bǝ buum Kwaama gǝm kang lɛɨ, n ke bɔ jʊ a mʊrka bǝn a tʊʊm Kiristii ka? Kʊkkʊm nɨ bǝ kǝlsa lɛɨ, n ke bɔ jʊ a mʊrka bǝn a bʊtɔ Kiristii ka? 17Kʊkkʊmɔ wo win, bǝn nɨ bǝ lada nyɨɨ, bǝ bʊtɔgɔ win, jʊ a bwɨɨ gwam bǝnɔ n kʊkkʊm nɨ win bǝ ja lɛɨ.
18Jǝ́ dʌng gola nǝbɔ Israilaɨ. Nǝbɔ ja jʊ nɨ lɛ ja maam tǝlatǝm twamaɨ, n ke bɔ jʊ a mʊrka ji a daa twɨtǝm yulʌni ka? 19N wɛ mǝ swɨ lɛ n sʊwaɨ? N jǝjalǝnɔ ja tǝlam shomɔ gǝm twamaɨ, nǝn gɔ n kaa jǝlɨ ka? N shomɔ n kaa jǝlɨ ka? 20Mɨ nyɔ! Mǝ nʊng mǝʊ jʊ nɨ Bʌtʌbɔ biyo lɛɨ, jǝ biyom nǝblaam. Ke bɔ a Kwaamaɨ. Mǝ swɨ bɔ jǝ́ yǝlam fatǝm yɨm jǝbɔ nǝblaamɔ. 21A bʊm bɔ jǝ́ nɔɔ a kʌshi Tɛlalɔɨ, ba jǝ́ nɔɔ tag a kʌshi nǝblaamɨ. A bʊm bɔ jǝ́ ja a daa jatǝm Tɛlalɔɨ, ba jǝ́ ja tag a daa jatǝm nǝblaamɨ. 22Jǝ́ dǝg Tɛlalɔ sǝ a maa nungon ka? Bǝ laa gǝn kwaan ka?
Maa Kanjǝl Na Dʊʊlǝn Kwaamaɨ
23“Kanjǝlɔ gwam n jǝ jǝlatǝm.” Ke bɔ kanjǝlɔ gwam n jǝ nyaɨ. “Kanjǝlɔ gwam n jǝ jǝlatǝm.” Ke bɔ kanjǝlɔ gwam bɛ lɛ nǝn mɔtǝmɨ. 24Ka kaa nǝl ya maa lɛ dul gǝnɔ gǝm jǝ nya kwaagɔ. Bɛ ga maa kambɔ gǝm tʌji.
25Jǝ́ ja nam nɨ gwam jǝ miyo lɛ a gamdʌboi, ka jǝ́ bʌ lɛ kɛl a dul gǝn, kage a yǝlam jem komʌn a mʊgɔ nǝl. 26A mʊla mʊlaɨ gɔ, “Yooligɔ na a Tɛlalɔɨ jǝbɔ kanjǝlɔ gwam a mʊgɔ gǝnɨ.”
27Na kaa nʊ nɨ n ke bɔ nǝ bwangtǝmɨ a jo jen jatǝm jǝjalǝnɨ, na jǝ́ jǝla jǝ́ yɔɨ, jǝ́ ja jʊ nɨ gwam ja nǝ jeni. Ka jǝ́ bʌ lɛ kɛl, kage jǝ́ nya komʌn a mʊgɔ nǝl jen. 28Na kaa nǝl a sʊwa jen gɔ, “Ja biyom shom jʊ nɨɨ,” ka jǝ́ ja lɛ, jǝ́ dʌng nʊ nɨ a sʊwa jeni nǝn bʊʊlalɨ mʊgɔ nǝl. 29Mǝ sʊwa bʊʊlalɨ mʊgɔ nǝl gǝn, ke bɔ a mɔ. Bʊʊlalɨ nǝlɨ mɨsɔ kal nyatǝm dul mǝndɨ lɛ. 30Na n buu Kwaama gǝm kang a jǝjalǝn mǝndɨ gǝm mǝ jaɨ, n wɛ a bwɨ jǝ́ tuwo i lɛ a jǝjalǝn nɨ mǝ ja nǝn buutǝm kang a daa Kwaama woi?
31Na n nɔɔtǝmɨ, na n jatǝmɨ, na na kaa jǝl jǝ́ maa lɛɨ, jǝ́ maa gǝn gwam nǝn dʊʊlǝn Kwaamaɨ. 32Ka jǝ́ yǝlam lɛ tɛl fǝtǝm naa a daagɔ Yahudawagɔ woi, jǝbɔ nǝbɔ Girikaɨ, jǝbɔ mʊrkalɨ nǝb bwangtǝm Kwaamaɨ. 33Mǝ maa sǝ n fulo nǝbɔ gǝm nǝl a mʊgɔ kanjǝlɔ gǝm gwam mǝ maa lɛɨ. Ke bɔ dul mɨ mǝ saam lɛɨ. Mǝ maa nyɔ a dul nǝbɨɨ a lada sǝ ja nya bʊʊtǝm.
Currently Selected:
1 Korinti 10: DBD
Highlight
Copy
Compare
Share
Want to have your highlights saved across all your devices? Sign up or sign in
©️2024 Luke Initiative for Scripture Translation
