प्रकाशितवाक्य 19

स्वर्ग़ा मां नरीकारा ची स्तुति

1ऐचे बाद स्वर्ग़ा मां मैं हेक भीड़ नु ऊंची अवाजी लारे ईं केहते सुणले कि,

“हालेलुय्याह!

उद्धार, ते महिमा, ते सामर्थ अम्चे नरीकारा ची ही छै।

2कांकि ओचे फैंसले सच्‍चे ते ठीक छी,

ऐवास्ते कि ओणे वे बङी वेश्या नु जको आपणे व्यभिचार लारे धरती नु गन्दे करती, फैंसला करला,

ते विचे कनु आपणे दासा चे लुहींया चा बदला गेहला।”

3बल्ति ङुजा वारी वाणे केहले,

“हालेलुय्याह!

ते विचे ब़लणे चा धूंआ युगानयुग तक यानिकि सदा-मदा उङरता रिही।”

4ते चौबीसा प्राचीना ने ते चऊं जीते जींया ने ढेती कर जको सिंहासना उपर ब़ेहले आले नरीकारा नु ङण्डवत करती कर केहले,

“हालेलुय्याह! आमीन!”

मैमणे चा बीहा

5तब सिंहासन महु हेक शब्द निकड़ला कि,

“हे अम्चे नरीकारा कनु सारे जणे ङरणे आले दास, का छोटे,

का बङे, तम्ही सारे ओची स्तुति करा।”

6बल्ति मैं बङी भीड़ी चा ते घणे पाणीया चे झरने ची ते बदला चे गरजणे चा बङा शब्द सुणला कि,

“हालेलुय्याह!

ऐवास्ते कि प्रभु अम्चा नरीकार, सर्वशक्‍तिमान राज़ करे।

7ते आवा, अम्ही खौश हुती कर आनन्द मनाऊं,

ते ओची स्तुति करु,

कांकि मैमणे चा बीहा आती गेला।

ते ओची घराआली ने आपणे आप नु तियार करती गेहले।

8ते विनु शोद्ध ते चमकदार ते मलमल ची ओढ़णी घालणे चा अधिकार ङिला गेला।”

कांकि वे मलमल ओढ़णा चा हा मतलब छै, कि नरीकारा चे पवित्र लौका चे धर्म चे कामे छी।

9 # मत्ती 22:2,3 ते ओणे मनु केहले, “ईं लेख, कि धन्‍न छै ओ, जको मैमणे चे बीहा चे भोज़ मां हकारले गेले।” बल्ति ओणे मनु केहले, “ये वचन नरीकारा चे सच्‍च वचन छी।”

10ते मैं ओनु ङण्डवत करने चे वास्ते ओचे पग़्ग़ा मां ढेला, ओणे मनु केहले, ङेख, “इसड़े ना कर, मैं दुधा ते दुधे भावां चे लारे चा दास छै, जको ईशु ची ग़वाही ङेणे उपर मजबूत छै, नरीकारा नु ही ङण्डवत कर, कांकि ईशु ची ग़वाही भविष्यवाणी ची आत्मा छै।”

चिट्टे घोड़े उपर सवार

11बल्ति मैं स्वर्ग़ा नु खुड़ले आले ङेखले, ते ङेखे कि हेक चिट्टा घोड़ा छै, ते ओचे उपर हेक सवार छै, जको विश्‍वास चे लायक, ते सच्‍च किहवावे, ते ओ धर्म चे लारे फैंसला ते योद्ध करे। 12ओचीया आँखीया जाखते ची लपटी आलीकर हुतीया। ते ओचे ठोङा उपर घणे सारे मुग़ट हुते। ते ओचे हेक नां लिखले आले छै, ते ओनु छोड़ती कर नेरे कुई वी ना जाणी। 13ते ओणे इसड़ी ओढ़णी घाली आली हुती। जिंवे लुहींया मां वानु ब़ुङाले गेले हो ते ओचे नाम हुते, “नरीकारा चा वचन।” 14ते स्वर्ग़ा ची सैना चिट्टा घोड़ा उपर सवार हुती कर, शोद्ध चिट्टी मलमल ची ओढ़णी घालती कर ओचे भांसु-भांसु छै। 15#प्र.वा 14:20ते जाति-जाति नु मारणे चे वास्ते ओचे मुँहा कनु हेक तेज धार ची तलवार निकले पलती ली, ते ओ लोहे चा राज़ङण्ड चती कर वांचे उपर राज़ करी, ते ओ सर्वशक्‍तिमान नरीकारा चे खतरनाक गुस्से ची जलजलाहट चे मदिरा चे कुण्डे मां अंगूरा चे रसा नु निचोड़ी। 16ते ओचे ओढ़णा उपर ते ओची सतले उपर ईं नां लिखले आले छै कि,

राजा चा राजा ते प्रभुआं चा प्रभु।

17ते बल्ति मैं हेके स्वर्ग़दूत नु सूरजा उपर भिले आले ङेखले, ते बङी अवाजी लारे रौल मचाती कर आसमाना मां उङरने आले सारे पखीयां नु केहले, “आवा, नरीकारा चे बङे भोज़ चे वास्ते भेले हुती जावा, 18जाये कनु तम्ही राजा चा मांस, ते सरदारा चा मांस, ते खास बङा लौका चा मांस, ते घोड़ा चा मांस, ते वांचे उपर सवार बन्दा चा मांस, ते का ही आजाद लौक, का दास, का छोटे, का बङे, सारे लौका चा मांस खावा।”

19बल्ति मैं ङरावणे ढौर ते धरती चे राजा ते वांची सैना नु ते ओ घोड़े उपर सवार, ते ओची सैना लारे योद्ध करने चे वास्ते भेले हुले ङेखले। 20#प्र.वा 13:1–18ते ऊं ङरावणे ढौर ते ओचे लारे ओ कूड़ा भविष्यवक्‍ता पकड़ीला गेला, जेह्णे ओचे सामणे इसड़े चैन्ह ङिखाणले हुते, जाये जरिये ओणे वानु भरमाले हुते, जाणे ओ ङरावणे ढौरा ची मौहर लवाली हुती, ते जको वे मूर्ति ची पूजा करते। ऊं ङरावणे ढौर ते कूड़े भविष्यवक्‍ता नु जीते-जी ओ जाखते ची झील मां जको गन्धक लारे ब़लती रिहे, नाखती ङिले गेले। 21ते बाकि बन्दी ओ घोड़े चे सवार ची तलवारी लारे जको ओचे मुँहा कनु निकलती, मारती नाखले गेले, ते सारे पखीं वांचे मांसा लारे रज़ती गेले।

Currently Selected:

प्रकाशितवाक्य 19: ODR

Highlight

Copy

Compare