प्रकाशितवाक्य 12

असतरी ते ब़ोहत बङा अजगर

1बल्ति स्वर्ग़ा मां ब़ोहत बङा चैन्ह ङिसला, यानिकि हेक असतरी जको सूरजा नु आपणे उपर ओढ़ली भिलती ली, ते चाँद विचे पग़्ग़ा तले हुता, ते विचे ठोङा उपर ब़ारहा तारा चा मुग़ट हुता। 2ते वा ढिड्डा लारे हुली, ते रौल मचाती, कांकि ब़ाला चा दर्द विनु हुवे पलता ला, ते ब़ाल पैदा करने चे दर्दा मां हुती।

3ते हेक नेरा चैन्ह स्वर्ग़ा मां ङिसला, ते ङेखा, हेक बङा लाल अजगर हुता, जाया सात ठोङीया ते ङस सींगे हुती, ते ओचे ठोङा उपर सात राजमुङक हुते। 4ते ओची पूंछे ने आसमाना चे तारा ची हेक तिहाई भाग़ ब़ुहारती कर धरती उपर नाखती ङिले। वां असतरी जको ब़ाला नु पैदा करने आली हुती, ओ अजगर आती कर विचे सामणे भिला रेहती गेला ताकि जिंवे वा ब़ाला नु पैदा करी, ओ वे ब़ाला नु निग़लती जाओ।

5ते विणे पूत पैदा करला जको लोहे चे ङण्ड लारे सारीया जातिया उपर राज़ करने आला हुता, ते विचे ब़ाल ओही बेले ब़ा नरीकारा चे गोढु, ते ओचे सिंहासन चे गोढु चती ते पुचाती ङिले। 6ते वा असतरी वे बरब्यान जग़हा मां नासती गेली, जिठे नरीकारा ची ओर कनु विचे वास्ते हेक जग़हा तियार करली गेलती ली, कि ओठे वा हेक हजार ङोन साऔ साठ ङिहां तक पाड़ली-पोसली जाओ।

7 # यहू 1:9 बल्ति स्वर्ग़ा उपर लड़ाई हुली, खास मीकाईल ते ओचे स्वर्ग़दूत अजगर लारे लड़ाई करने चे वास्ते निकड़ले, अजगर ने वी ओचे दूता लारे योद्ध करला। 8पर ओ अजगर वांचे उपर भारी कोनी पड़ सग़ला, ते स्वर्ग़ा मां अजगर ते ओचे दूता वास्ते बल्ति जग़हा कोनी रेहली। 9#लूक 10:18ते ओ बङा अजगर यानिकि ओही पुराणा नाग़, जको इबलीस शैतान किहवावे, ते सारे संसारा नु भरमावे, धरती उपर ढाती ङिला गेला, ते ओचे दूत ओचे लारे तले भुकाती ङिले गेले।

10बल्ति मैं स्वर्ग़ा कनु हा बङा शब्द कानु केहते हुले सुणला कि, “हमा अम्चे नरीकार चा उद्धार, ते सामर्थ, ते राज़, ते ओचे मसीह चा अधिकार उजागर हुला, कांकि अम्चे भावां उपर दोष लावणे आला, जको रात-ङिओ अम्चे नरीकारा चे सामणे वांचे उपर दोष लाता रेहता, तले भुकाती ङिला गेला। 11ते वे मैमणे चे लुहींया ची वजह कनु, ते आपणी ग़वाही चे वचन ची वजह कनु, ओचे कनु जीतती गेले, ते वाणे आपणे प्राण नु प्यारे कोनी जाणले, इठे तक कि मौत नु वी सहन करती गेले। 12येही वजह कनु, ओ स्वर्ग़, ते ओचे मां रेहणे आले खौश हुती जावा। पर हे धरती, ते समुन्दर, तम्चे उपर हाय! कांकि शैतान तम्चे गोढु बङे गुस्से लारे तले उतरती आला, कांकि ओ जाणे, कि ओचा थोड़ा ही समय नेरा बाकि छै।”

13ते जिसे बेले अजगर ने ङेखले कि मैं धरती उपर नाखती ङिला गेला, ते वे असतरी नु जको पूत पैदा करला हुता, विचा पीछा करना शुरु करती ङिला। 14ते वे असतरी नु बङे उकाब ची ङोन खांपे ङिली गेली, कि नाग़ा चे सामणे कनु उङरती कर दूर बरब्यान वे जग़हा उपर चाह्‍ली जाओ, जिठे वा साढे तीन साला तक पाड़ली-पोसली जा सग़ो। 15ते नाग़ा ने वे असतरी चे भांसु आपणे मुँहा लारे नदी चे आलीकर पाणी बाहले, कि विनु ऐ नदी कनु बहाती नाखो। 16पर धरती ने वे असतरी ची सहायता करली, ते आपणे मुँह खोलती कर वे नदी नु जको अजगर ने बाहली हुती, पीते गेहले। 17ते अजगर वे असतरी कनु गुस्से हुती गेला, ते विची बाकि ची ऊलाद्ध जको नरीकारा ची आज्ञा नु मनते, ते ईशु ची ग़वाही ङेणे चे वास्ते भिले ले, वांचे लारे योद्ध करु गेला।

18ते ओचे बाद अजगर समुन्दर चे किनारे उपर जती कर भिला रेहती गेला।

Currently Selected:

प्रकाशितवाक्य 12: ODR

Highlight

Copy

Compare