यहूदा 1

नमस्कार

1 # मत्ती 13:55; मरकु 6:3 हा चिठ्ठी यहूदा चे तरफु जको ईशु मसीह चा दास ते याकूब चा भऊ छै, वां हकारले आला चे नांवे लिखली गेली, जको नरीकार ब़ा चे प्यारे ते ईशु मसीह चे वास्ते सम्भालती कर राखले गेले।

2दया, ते शान्ति ते प्रेम तम्हानु घणा सारा मिलता रिहो।

पापी ङण्ड भोग़े

3हे प्यारे, जब मैं तम्हानु ओ उद्धार चे बारे मां लिखणे मां घणी सारी मेहनत ते कोशिस करे पलता, जाये मां अम्ही सब भईवाल छिऊं, तां मैं तम्हानु ईं समझाणे जरुरी समझले कि ओ विश्‍वास चे वास्ते पूरा यतन करा जको नरीकारा चे पवित्र लौका नु हेक ही वारी सोंपला गेला हुता। 4कांकि कितनी इसड़ी इन्साने चोप-चाप तम्चे मां घिरती आली, जाये ऐ ङण्ड चे बारे मां शास्त्रा ने पेहले कनु ही भविष्यवाणी करती ङिलती। ये भग़तीहीन छी, ते अम्चे नरीकारा चे अनुग्रह नु लोचपण करने वास्ते पट्टा समझती गेला, ते अम्चे सेर्फ स्वामी प्रभु ईशु मसीह चा इन्कार करी।

5हालांकि तम्ही सारे यां बाता नु जाणती चुकले, तां वी मैं तम्हानु ये बाते ची याद ङिवाणे चाहवे कि, प्रभु ने आपणी प्रजा नु मिस्र देशा कनु छुड़ावणे चे बाद वांचे महु विश्‍वास ना करने आला नु नाश करती नाखले हुते। 6मैं तम्हानु ईं वी याद ङिवाणा चाहवे कि जिसा स्वर्ग़दूता ने आपणे पद्द नु मजबूत कोनी राखले बल्कि आपणी खौद्द ची रेहणे ची जग़हा नु छोड़ती ङिले, ते नरीकारा ने वानु वी ओ महान न्यां चे ङिओ चे वास्ते अन्धकार मां, जको सदा वास्ते छै, संगला मां ब़ांहती नाखले। 7जिंवे करती सदोम ते अमोरा ते वांचे आस-पास चे शहर, जको वांचे आलीकर व्यभिचारी हुती गेलते ते बुराई चे मार्ग़ उपर टुरती पले। वानु कङी ना ब़िझणे आले जाखते मां नाखती ङेणे चा ङण्ड ङिला गेला, वे अम्चे वास्ते मिसाल चे रुप मां ठहराले गेले।

8ठीक यूंही कोच्छ लौक तम्चे मां घिरती आले ते वे गन्दे खाब पुरे करने वास्ते आपणे शरीरा नु अशुद्ध करी, ते प्रभु ची सामर्थ नु तोच्छ जाणी, ते ऊंचे ओहदे आला नु बुरे-भले किही। 9#प्र.वा 12:7पर प्रधान स्वर्ग़दूत मीकाईल तक ने जब मूसा ची लाश चे बारे मां शैताना लारे वाद-विवाद करे पलता, तां ओनु बुरे-भले वी ना केहती कर दोष लावणे ची वी हिम्मत कोनी करली, सेर्फ इतने केहले, “प्रभु तनु फटकार ङियो।” 10पर ईं लौक जिसीया बाता नु ना जाणी, वानु बुरे-भले किही। पर जिसीया बाता नु बेसमझ ढौरा आलीकर सुभाव कनु ही जाणी वांचे मां आपणे आप नु नाश करी।

11वांचे उपर हाय! कांकि जेह्णे कैन चे मार्ग़ नु चुणती गेले, ते धन-दौलत ची लालच ची वजह वाणे वाहो गलती करली, जको बिलाम ने करली हुती। ते कोरह आलीकर विरोध करती कर नाश हुले।

12ईं मतलबी लौक तम्चे प्रेम-भोज मां तम्चे लारे खई-पी। वे नुकसान करने आली चट्टानी आलीकर छी जको समुन्दरा मां लुकलीया रिही। याहनु सेर्फ आपणे ही स्वार्थ ची ही चिन्ता रिहे। वे बिना पाणीया चे बदल छी, जानु हवा उङारती जाये। वे पतझड़ चे इसड़े पेड़ छी, जाये फल ना लाग़ी, ते जको ङोन वारी मरती चुकले ते ज़हड़े कनु उखड़ती चुकले। 13ये समुन्दर ची भयानक लहरा आलीकर छी, जको आपणी लाज़ चा झग़ उछाली, ये मार्ग़ कनु भटकले आले तारे छी, जाये वास्ते हमेशा तक घौर अन्धकार राखला गेला।

14ते हनोक ने वी जको आदम ची सातवीं पीढ़ी महु आला, यांचे बारे मां हा भविष्यवाणी करली हुती कि, “ङेखा, प्रभु आपणे हजारा पवित्र दूता लारे आती कर, 15कि सारा लौका चा न्यां करो, ते दुष्टा नु वांचे सारे बुरे कामा वास्ते, जको वाणे बुराई लारे करले, ते दुष्ट पापीया नु, जेह्णे नरीकारा चे विरोध मां कड़वे वचन इस्तेमाल करले, दोषी ठहरावी।”

16ये वे छी, जको कुड़कुड़ाते रिही, ते सदा खोट काढ़ते रिही, ते आपणी ही बुरी इच्छा चे मुताबिक टुरी, ते आपणे मुँहा लारे घमण्ड चा बाता करी, ते आपणी भलाई वास्ते नेरा ची चापलूसी करी।

17ऐवास्ते हे प्यारे, तम्ही वां बाता नु याद राखा, जको अम्चे प्रभु ईशु मसीह चे प्रेरित पेहले कनु ही केहती चुकले। 18#2 पत 3:3वे तम्हानु केहते कि, “आखरी चे ङिहां मां हंसी मजाक करने आले इसड़े लौक हुवे, जको आपणी बुरी इच्छा लारे टुरे।” 19ईं लौक जको फूट नाखणे आले ते ये संसारिक लौक छी, जाये मां नरीकारा चा आत्मा कोनी।

20पर हे प्यारे, तम्ही आपणे अति पवित्र विश्‍वासा मां आग़ु बधते हुले ते पवित्र आत्मा मां प्राथना करते हुले, 21आपणे आप नु नरीकारा चे प्रेम मां बणाली राखा। ते अनन्त जीवन चे वास्ते अम्चे प्रभु ईशु मसीह ची दया ची आस ङेखते रिहा।

22ते जको विश्‍वासा मां मजबूत कोनी वांचे उपर दया ङिखाणा। 23ङुजे लौका नु जाखते महु झपटती कर काढ़ती गिहा, वांचे उपर दया करते बेले चौकस रिहा। पर ओ ओढ़णा कनु वी नफरत करा जको शरीरा चे जरिये कलंकित हुती गेले।

नरीकारा ची स्तुति

24हमा नरीकार जको तम्हानु ठोकर खाणे कनु बचा सग़े, ते आपणी महिमा ची भरपूरी चे सामणे मगन ते निर्दोष करती कर खड़े कर सग़े, 25ओ हेक मात्र नरीकार अम्चे उद्धारकर्ता ची महिमा ते गौरव ते पराक्रम ते अधिकार, अम्चे प्रभु ईशु मसीह चे जरिये जिंवे सनातन काल कनु छै, हमा वी हो ते युगानयुग रिहो। आमीन।

Currently Selected:

यहूदा 1: ODR

Highlight

Copy

Compare