याकूब 2

पक्षपात चे विरोध चितावनी

1हे माये भऊ, अम्चे महिमायुक्‍त प्रभु ईशु मसीह उपर तम्ही विश्‍वास करा, ऐवास्ते तम्चे बीच मां पक्षपात ना हो। 2कांकि अगर हेक मर्द सोने चीया मुंदरीया ते सोणी ओढ़णी घाले हुले तम्ची सभा मां आओ ते हेक कंगाल वी मैली-सैली ओढ़णी घाली आओ। 3ते तम्ही ओ सोणी ओढ़णी घाले आले चे मुँह ङेखती कर किहा, “तु ओठे आच्छी जग़हा ब़ेस” ते ओ कंगाल नु किहा, “तु इठे भिला रेह जा माये पग़्ग़ा लारे ब़ेस।” 4तां का तम्ही आपस मां भेद-भाव कोनी करला ते बुरे विचारा लारे न्यां करने आले कोनी ठहरले?

5हे माये प्यारे भऊ, सुणा, का नरीकारा ने ऐ संसारा चे कंगाला नु कोनी चुणले कि विश्‍वासा मां अमीर ते ओ स्वर्ग़ राज़ चे अधिकारी हो जाया वायदा ओणे वांचे लारे करला जको ओचे लारे प्रेम राखे? 6पर तम्ही ओ कंगाला ची बेकदरी करली। का अमीर लौक तम्चे उपर जुलम ना करी? ते का वे ही तम्हानु कचेहरीया मां घींसती-घींसती ना गेहती जई? 7का वे मसीह ईशु चे उत्तम नांवा ची निन्दा ना करी, जाये मां तम्ही हकारले गेले?

8तांवी अगर तम्ही पवित्रशास्त्र चे ऐ वचना चे अनुसार कि, “तु आपणे पड़ोसीया लारे आपणे आलीकर प्रेम राख,” सच्‍चमां ओ राज़ व्यवस्था नु पुरी करा, तां आच्छे ही करा। 9पर अगर तम्ही पक्षपात करा तां पाप करा ते नरीकारा ची व्यवस्था तम्हानु कसूरवार ठहरावे।

10कांकि जको कुई सारी व्यवस्था चा पालन करे पर हेकी ही बाते कनु चुकती जाये तां ओ सारीया बाता मां कसूरवार ठहरती चुकला छै। 11ऐवास्ते कि जेह्णे ईं केहले, “तु व्यभिचार ना करियो” ओणे ईं वी केहले, “तु खून ना करियो।” ऐवास्ते अगर तु व्यभिचार तां नी करला पर खून करले तांवी तु व्यवस्था चा उलंघन करने आला ठहरला।

12तम्ही वां लौका आलीकर वचन ब़ोला, ते काम वी करा जाया न्यां नरीकारा ची व्यवस्था चे अनुसार हुवी, जाये कनु आजादी मिले। 13कांकि जेह्णे दया कोनी करली, ओचा न्यां बेरहमी लारे हुवी। दया न्यां उपर जयवन्त हुवे।

विश्‍वास ते आच्छे काम

14हे माये भऊ, अगर कुई किहो कि, “मनु विश्‍वास छै,” पर विश्‍वास चे जिसड़े काम ना करता हो, तां ऐचा का फायदा? का इसड़ा विश्‍वास कङी ओचा उद्धार कर सग़े? 15अगर कुई भऊ जा ब़ेहण नंगे-उघाड़े हो ते वानु हर ङिओ भोज़न ची कमी हो, 16ते तम्चे महु कुई वानु किहो, “राजी खुशी लारे जावा, तम्ही गर्म रिहा ते रज़ली रिहा” पर जको चीजा शरीरा वास्ते जरुरी छी वे वानु ना ङिया तां का फायदा छै? 17यूं करती विश्‍वास वी, अगर कर्म सहित ना हो तां आपणे सुभाव मां मरला आला छै।

18बल्कि कुई केह सग़े, कि “तनु विश्‍वास छै, मैं कर्म करे पला।” तु आपणा विश्‍वास मनु कर्म बिना तां ङिखाण, ते मैं आपणा विश्‍वास आपणे कामा चे लारे तनु ङिखाणी। 19तनु विश्‍वास छै कि हेक ही नरीकार छै। तु आच्छे करी। दुष्टात्मा वी विश्‍वास राखी, ते कांपतीया रिही। 20पर ओ निक्‍कमे बन्दे, का तु ईं वी जाणी कि कर्म चे बिना विश्‍वास बेकार छै? 21जिसे बेले अम्चे ब़ा अब्राहम ने आपणे पूत इसहाक नु वेदी उपर चढ़ाले तां का ओ कर्मा लारे धार्मिक नी ठहरला हुता? 22तां तु ङेखती गेले कि विश्‍वासा ने अब्राहम चे कर्मा लारे मिलती कर असर नाखला ते कर्मा लारे विश्‍वास सेद्ध हुला। 23ते पवित्रशास्त्र चा हा वचन पूरा हुला, “अब्राहम ने नरीकारा चे उपर विश्‍वास करला, ते हा ओचे वास्ते धर्म गिणला गेला,” ते ओ नरीकारा चा मित्र किहवाला। 24यूं करती तम्ही ङेखती गेले कि इन्सान हेको विश्‍वासा लारे ही ना बल्कि कर्मा लारे वी धर्मी ठहरे।

25यूं करती राहाब वेश्या वी जिसे बेले विणे दूता नु आपणे घरा मां उतारले ते ङुजे मार्ग़ कनु विदा करले तां का वा कर्मा लारे धार्मिक कोनी ठहरली?

26तां जिंवे देह आत्मा बिना मरली आली छै यूंही विश्‍वास वी कर्म बिना मरला आला छै।

Currently Selected:

याकूब 2: ODR

Highlight

Copy

Compare