2 तीमुथियुस 4

1नरीकारा नु ते मसीह ईशु नु आपणा ग़वाह करती कर, जको जीता ते मरला आला चा न्यां करी, कांकि ईशु चे पुठे आणे ते ओचा राज़ गोढु छै, मैं तनु हा आज्ञा ङिये पला। 2कि तु वचन चा प्रचार कर, समय बे समय काम करने चे वास्ते तियार रेह, हर-तरीके चा सब्र, ते शिक्षा चे लारे उलाहणा ङे, ते दड़का ते बढ़ावा ङिती कर तसल्‍ली लारे समझा। 3कांकि इसड़ा समय आवी, लौक खरा वचन नी सुणना चाहवे पर आपणी मर्जी चे अनुसार आपणे वास्ते घणे उपदेश ङेणे आले सोती गिहे। 4ते आपणे कान सच्‍चाई कनु फेरती कर, कथा-कहाणीया उपर लावे। 5पर तु सारीया बाता कनु आपणे आप नु वशा मां राख, ङोख चा, ते सुसमाचार चे प्रचार चे काम कर, ते जको सेवा तनु ङिली गेली, विनु पुरे कर।

6कांकि हमा मैं पूरा जीवन अर्घ ची तरह बलिदान करती ङिला, ते माये जीवन चा आखरी समय आती पुज़ला। 7मैं मसीह चे कामा ची आच्छी कुश्ती लड़ती चुकला, मैं आपणी दौड़ पुरी करती गेली, मैं विश्‍वास ची रखवाली करली। 8भविष्य मां माये वास्ते धर्म चा ओ मुग़ट जको स्वर्ग़ मां पला ला, जानु प्रभु, जको धर्मी छी ते न्यांयी छी, मनु ओ ङिओ ङिही, ते मनु ही ना, बल्कि वा सारा नु वी, जको ओचे प्रकट हुवणे नु प्यारे जाणे।

9माये गोढु जल्दी आणे ची कोशिस कर। 10#कुलु 4:14; फिले 1:24; 2 कुरि 8:23; गला 2:3; तीतु 1:4कांकि देमास ने ऐ संसारा नु प्यारा जाणती कर मनु छोड़ती ङिले, ते थिस्सलुनिके शहर सनु चाह्‍ला गेला, ते क्रेसकेंस गलातिया शहर सनु ते तीतुस दलमतिया शहर सनु चाह्‍ला गेला। 11#कुलु 4:14; फिले 1:24; प्रेरि 12:12,25; 13:13; 15:37–39; कुलु 4:10; फिले 1:24सेर्फ लूका माये लारे छै, मरकुस नु गेहती चाह्‍ला आ। कांकि सेवा चे वास्ते ओ माया ब़ोहत कामा चा छै। 12#प्रेरि 20:4; इफि 6:21,22; कुलु 4:7,8तुखिकुस नु मैं इफिसुस शहर सनु भेज़ती ङिले। 13#प्रेरि 20:6जको बागा मैं त्रोआस शहर मां करपुस चे इठे छोड़ली आला, जिसे बेले तु आवी, ते ओनु ते किताबा नु ते खास करती कर चर्मपत्रा नु चली आयो।

14 # 1 तीमु 1:20; रोमि 2:6 सिकन्दर ठठेरे ने मनु ब़ोहत नुकसान पुचाला, प्रभु ओनु ओचे कामा चे अनुसार बदला ङिही। 15तु वी ओकनु चौकस रिहो, कांकि ओणे अम्चे उपदेशा चा घणा ही विरोध करला।

16माये पेहले प्रतिवाद चे बेले किह्णी वी माया साथ कोनी ङिला, बल्कि सब ने मनु छोड़ती ङिले हुते। भले हो कि ऐचा वानु लेखा ङेणा ना पड़ो। 17पर प्रभु माया सहायक रेहला, ते मनु सामर्थ ङिली, ताकि माये जरिये पूरा प्रचार हो, ते सारीया नेरीया जातिया सुणती गिहा ते मैं तां शेरा चे मुँहा कनु छुड़ाला गेला। 18ते प्रभु मनु हर हेक बुरे कामा कनु छुड़ावी, ते आपणे स्वर्ग़ीय राज़ मां उद्धार करती कर पुचावी, ओची महिमा युगानयुग हुती रिहो। आमीन।

आखरी नमस्कार

19 # प्रेरि 18:2; 2 तीमु 1:16,17 प्रिस्का ते अक्विला नु, ते उनेसिफुरुस चे घराणे नु नमस्कार। 20#प्रेरि 19:22; रोमि 16:23; प्रेरि 20:4; 21:29इरास्तुस कुरिन्थुस शहर मां रेहती गेला, ते त्रुफिमुस नु मैं मिलेतुस शहर मां बिमार हुवणे ची वजह कनु छोड़ले। 21पाला पड़ने कनु पेहले आणे ची कोशिस कर।

यूबूलुस, ते पूदेंस, ते लीनुस ते क्लौदिया, ते सारा विश्‍वास करने आला भावां ते ब़ेहणीया चा तनु नमस्कार।

22प्रभु दुधी आत्मा चे लारे रिहो, तम्चे उपर नरीकारा चा अनुग्रह हुता रिहो।

Currently Selected:

2 तीमुथियुस 4: ODR

Highlight

Copy

Compare