2 कुरिन्थियां 5
5
अम्चे स्वर्ग़ीय घर
1कांकि अम्ही जाणु कि, जिसे बेले अम्चे संसारिक देह नु धरती कनु ढाती ङिले जई तां अम्चे वास्ते नरीकारा ची ओर कनु स्वर्ग़ा मां हेक इसड़े घरा जिसड़ी देह तय करली गेली, जको इन्साना चे हाथा लारे बणाले आले कोनी छै पर स्वर्ग़ीय ते अनन्त काल चे छै। 2ऐ संसारिक शरीर मां तां अम्ही कराहते रिहुं, ते बङी इच्छा राखु कि आपणे स्वर्ग़ीय शरीर नु धारण करती गिहुं। 3कांकि ओनु धारण करने चे बाद अम्ही उघाड़े नी रेहती जऊं। 4ते अम्ही ऐ शरीरा मां रेहते हुले, बोझ मां दब़िती कर कराहते रिहुं, कांकि अम्ही उतारने ना, बल्कि नेरे धारण करने चाहु, कि मरणहार, जीवन बदलती जाओ। 5ते जेह्णे अम्हानु ये बाते वास्ते तियार करले ओ नरीकार छै, जेह्णे अम्हानु ये बाते ची बयाने मां पवित्र आत्मा वी ङिला।
6ऐवास्ते अम्ही सदा हिम्मत ब़ांहली रिहुं ते ईं जाणु कि, जब तक अम्ही शरीरा मां छिऊं, तब तक प्रभु कनु दूर छिऊं। 7कांकि अम्ही जको ङेखु ओचे अनुसार ना, पर विश्वासा लारे चलु। 8ऐवास्ते अम्ही हिम्मत ब़ांहली रिहुं, ते शरीरा नु छोड़ती कर प्रभु चे लारे रेहणे होर वी आच्छे समझु। 9ऐवास्ते अम्चे मना ची बङी इच्छा हा छै कि, चाहे अम्ही शरीरा मां रिहुं, चाहे अम्ही ना रिहुं पर अम्ही ओनु भाते रिहुं। 10#रोमि 14:10कांकि जरुरी छै कि, अम्चे सारा चा हाल मसीह चे न्यां आसण चे सामणे खुलती जाओ, कि हर हेक इन्सान आपणे आपणे बुरे-भले कामा चा बदला जको ओणे आपणे शरीरा चे अनुसार करले ओ भोग़ो।
नरीकारा चे लारे मेल-मिलाप ची सेवा
11ऐवास्ते प्रभु चा भय मनती कर अम्ही लौका नु समझाऊं ते नरीकारा चे सामणे अम्चा हाल प्रकट छै, ते माई आस हा छै कि, तम्चे विवेक ने वी ऐनू जाणती गेले वी। 12अम्ही बल्ति वी आपणी बढ़ाई तम्चे सामणे ना करु, बल्कि अम्ही आपणे बारे मां तम्हानु घमण्ड करने चा मौका ङिऊं पले, कि तम्ही वानु उत्तर ङे सग़ा, जको मना उपर ना बल्कि ङिखावटी बाता उपर घमण्ड करी। 13अगर अम्ही बेसोध चे आलीकर ङिसु तां नरीकारा वास्ते, ते अगर सुधि मां छिऊं तां तम्चे वास्ते छिऊं। 14कांकि मसीह चा प्रेम अम्हानु बेबस करती नाखे, ऐवास्ते कि अम्ही ईं समझु कि, जिसे बेले हेक सब वास्ते मरला तां सारे मरती गेले। 15ते मसीह सब वास्ते मरला कि जको जीते छी, वे आग़ु चे वास्ते आपणे वास्ते ना जियो, पर ओचे वास्ते जियो जको वांचे वास्ते मरला ते बल्ति कनु जीता हुला।
मसीह मां नवीं सृष्टि
16ऐवास्ते हमा अम्ही काया वी संसारिक नजरीये लारे नाप-तोल ना करु। पर अम्ही पेहले मसीह नु इसड़े नापले हुते। पर हमा इसड़ी नाप-तोल कनु दूर छिऊं। 17ऐवास्ते अगर कुई मसीह मां छै तां वा नवीं सृष्टि छै। पुराणीया बाता गुजरती गेलीया, ङेखा वे सारीया नवींया हुती गेलीया। 18ते सारीया बाता नरीकारा चे तरफु छी, जेह्णे मसीह चे जरिये आपणे लारे अम्चा मेल-मिलाप करती गेला, ते मेल-मिलाप ची सेवा अम्हानु सोंपती ङिली। 19यानिकि नरीकारा ने मसीह मां हुती कर आपणे लारे संसारा चा मेल-मिलाप करती गेला, ते वांचे पापा चा दोष वांचे उपर कोनी लाला, ते ओणे मेल-मिलाप चा वचन अम्हानु सोंपती ङिला। 20ऐवास्ते अम्ही मसीह चे राजदूत छिऊं, मनाकि नरीकार अम्चे जरिये समझावे। अम्ही मसीह चे तरफु बिनती करु, कि नरीकारा चे लारे मेल-मिलाप करती गिहा। 21मसीह जको पापा कनु निष्पाप हुता, ओनु ही नरीकारा ने अम्चे वास्ते पाप ठहराला, कि अम्ही ओचे मां हुती कर नरीकारा ची धार्मिकता चे भाग़ी हुती जऊं।
Currently Selected:
2 कुरिन्थियां 5: ODR
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0
