2 कुरिन्थियां 2

1ऐवास्ते मैं आपणे मना मां ईं ठानती गेलते कि बल्ति तम्चे गोढु उदास करने वास्ते ना आवे। 2कांकि अगर मैं तम्हानु उदास करे तां मनु खौश करने आला कूण हुवी? सेर्फ तम्ही जानु मैं उदास करे। 3ते मैं हा बात तम्हानु ऐवास्ते लिखली हुती, कि कङी इसड़े ना हो, कि माये आवणे उपर, जाये कनु खुशी मिलणी चाही छै, मैं वांचे कनु उदास हुवे। कांकि मनु तम्चे सारा उपर ये बाते चा भरोसा छै कि, जको माई खुशी छै, वा तम्चे सारा ची वी हो। 4बङे क्लेश ते मना चे कष्ट लारे, मैं ब़ोहत सारी हींजवे बाहती-बाहती कर तम्हानु लिखले हुते, ऐवास्ते कोनी कि तम्ही उदास हुवा, पर ऐवास्ते कि तम्ही ओ बङे प्रेम नु जाणती गिहा, जको मनु तम्चे लारे छै।

अपराधीया नु माफी

5ते अगर किह्णी मनु उदास करले छै, तां वी मैं ओचे लारे घणी सख्ताई ना करी कांकि ओणे मनु ही कोनी बल्कि कोच्छ-कोच्छ तम्हानु सब नु वी उदास करले। 6इसड़े जणे वास्ते हा ङण्ड जको तम्हा भावां महु घणा ने ङिला, ब़ोहत छै। 7ऐवास्ते ईं ठीक छै कि ओचा अपराध माफ करा, ते तसल्‍ली ङिया, कङी इसड़े ना हो कि इसड़े इन्सान उदासी मां ब़ुङती जाओ। 8ऐवास्ते मैं तम्हानु कनु बिनती करे पला कि, ओचे प्रति आपणे प्रेम चा सबूत ङिया। 9कांकि मैं ऐवास्ते वी लिखले हुते कि तम्हानु परखती गिहे, कि तम्ही सारीया बाता नु मनणे वास्ते तियार छिवा जा कोनी। 10जानु तम्ही कोच्छ माफ करा, ओनु मैं वी माफ करे पला। मैं जको कोच्छ माफ करले तम्चे वास्ते मसीह ची मोजुदगी मां माफ करले, 11कि शैताना चा अम्चे उपर दाह ना चलो। कांकि अम्ही ओची चाल कनु अणजाण कोनी।

त्रोआस मां पौलुस ची उदासी

12 # प्रेरि 20:1 जिसे बेले मैं मसीह चा सुसमाचार सुणावणे वास्ते त्रोआस मां आला, तब प्रभु ने माये वास्ते हेक दरवाजे खोलती ङिले। 13ते माये मना मां चैन कोनी मिड़ला, कांकि मैं आपणे भऊ तीतुस नु कोनी ङेखले। ऐवास्ते मैं उठले लौका कनु विदा हुती कर मकिदुनिया प्रदेस सनु चाह्‍ला गेला।

14पर नरीकारा चा धन्यवाद हो, जको मसीह मां सदा अम्हानु जीत ची खुशी मां गेहली फिरे, ते आपणे ज्ञान ची खुश्बु अम्चे जरिये हर जग़हा मां खिन्डावे। 15कांकि अम्ही नरीकारा चे गोढु उद्धार गेहणे आले, ते नाश हुवणे आले, ङुंहु वास्ते मसीह ची खुश्बु छिऊं। 16जको नाश हुवी पले, वांचे वास्ते अम्ही मौत ची भयानक बद्दबू छिऊं। जको उद्धार गेहणे आले छी वांचे वास्ते अम्ही जीन्दगी ची खुश्बु छिऊं। पर काये मां छै इसड़े काम करने ची काबलीयत? 17अम्ही वां ब़ोहता आलीकर कोनी, जको आपणे फायदे वास्ते नरीकारा चे वचना मां मिलावट करी। पर अम्ही मन ची सच्‍चाई लारे, ते नरीकारा चे तरफु ते नरीकारा नु मौजुद जाणती कर मसीह मां ब़ोलु।

Currently Selected:

2 कुरिन्थियां 2: ODR

Highlight

Copy

Compare