1 थिस्सलुनीकियां 5
5
ईशु चे दुबारा आणे चे वास्ते तियार रेहजा
1पर हे माये भऊ ते ब़ेहणीया, ऐची जरुरत कोनी, कि प्रभु चे आणे चे समय ते तरीख चे बारे मां तम्चे गोढु कहीं लिखले जाओ। 2#मत्ती 24:43; लूक 12:39; 2 पत 3:10कांकि तम्ही आप ठीक जाणा कि जिंवे राती नु चोर आवे, यूंही प्रभु चा ङिओ आणे आला छै। 3जब लौक किही, कि शान्ति छै, कि कहीं वी ङर कोनी, ते वांचे उपर हेकदम विनाश आती पड़ी, जिंवे करती गर्भवती उपर दर्द हुवे , ते वे किसी रीति लारे नी बचे।
4पर हे माये भऊ, तम्ही तां अन्धकारा मां कोनी छिवा कि ओ ङिओ तम्चे उपर चोरा आलीकर आती पड़ो। 5कांकि तम्ही सारी सोज़ले ची ऊलाद्ध छिवा, ते ङिहां ची ऊलाद्ध छिवा, अम्ही ना ते राती चे छिऊं, ते ना अन्धकार चे छिऊं। 6ऐवास्ते अम्ही नेरा आलीकर नूहले ना रिहुं, पर जाग़ते ते चौकस रिहुं। 7कांकि जको नूझी, वे राती नु ही नूझी, ते जको मतवाले रिही, वे राती नु ही मतवाले रिही। 8#इफि 6:13–17पर अम्ही तां ङिहां चे छिऊं, ऐवास्ते अम्हानु आपणे आप नु बसा मां राखणे चाही छै, विश्वास ते प्रेम ची झिलम घालती कर ते उद्धार ची आस चा टोप घालती कर चौकस रिहा। 9कांकि नरीकारा ने अम्हानु आपणे गुस्से वास्ते कोनी, पर ऐवास्ते चुणले कि अम्ही आपणे प्रभु ईशु मसीह चे जरिये उद्धार पा सग़ु। 10ईशु मसीह अम्चे वास्ते ऐ वजह मरला, कि अम्ही चाहे जीते रिहुं चाहे मरती जऊं जिसे बेले ओ पुठा आवी ओचे लारे जिऊं। 11यूंही हेके ङुजे नु शान्ति ङिया, ते हेके ङुजे चे धार्मिक विश्वास ची बढ़ोतरी चे वजह बणा, तां तम्ही इसड़े करा वी हुवा।
आखरी सलाह ते नमस्कार
12ते ओ माये भऊ ते ब़ेहणीया, अम्ही तम्हा कनु बिनती करु पले, कि जको तम्चे मां मेहनत करी वी, ते प्रभु मां तम्चे अग़ुवे छी, ते तम्हानु शिक्षा ङी, ते वानु मना। 13ते वांचे कामा चे वजह प्रेम चे लारे वानु घणे ही कद्दर चे योग्य समझा, ते आपस मां मेल-मिलाप लारे रिहा।
14ते ओ माये भऊ ते ब़ेहणीया, अम्ही तम्हानु समझाऊं पले कि तम्चे मां जको आलसी छी वानु समझावा, कायरा ची हिम्मत ब़न्धावा, कमजोरा नु सम्भाला, सारा बन्दा ची सहन करा। 15चौकस! कुई काये लारे बुराई चे बदले बुराई ना करो, पर सदा भलाई करने चे वास्ते तियार रिहा, ते अापस मां ते सारा लारे वी भलाई ही ची कोशिस करा।
16सदा खौश रिहा। 17लगातार प्राथना मां लाग़ले रिहा। 18हर हेक बाते मां धन्यवाद करा, कांकि तम्चे वास्ते मसीह ईशु मां नरीकारा ची हाओ मर्जी छै।
19पवित्र आत्मा नु ना ब़िझावा। 20भविष्यवाणीया नु तोच्छ ना समझा। 21सारीया बाता नु परखा, जको आच्छीया छी वानु मजबूती लारे पकड़ली रिहा। 22सारीया प्रकारा ची बुराईया कनु बचले रिहा।
आशीर्वाद
23शान्ति चा नरीकार आप ही तम्हानु पुरी रीति लारे पवित्र करो, ते तम्ची आत्मा ते प्राण ते शरीर अम्चे प्रभु ईशु मसीह चे आणे तक पुरी रीति लारे निर्दोष सुरक्षित रिहो। 24तम्चे हकारने आला सच्चा छै, ते ओ इसड़े ही करी।
25हे माये भऊ ते ब़ेहणीया, अम्चे वास्ते प्राथना करा।
26सारा भावां ते ब़ेहणीया नु हाथ जोड़ती कर नमस्कार करा। 27मैं तम्हानु प्रभु चे नांवा लारे आज्ञा ङिये पला, कि हा चिठ्ठी सारा भावां नु ते ब़ेहणीया नु पढ़ती कर सुणाली जाओ।
28अम्चे प्रभु ईशु मसीह चा अनुग्रह तम्चे उपर हुता रिहो।आमीन।
Currently Selected:
1 थिस्सलुनीकियां 5: ODR
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0
