1 थिस्सलुनीकियां 2
2
थिस्सलुनिके मां पौलुस चे काम
1हे माये भऊ ते ब़ेहणीया, तम्ही आप ही जाणा कि अम्चे, तम्चे गोढु आणे घणे आच्छे हुले। 2#प्रेरि 16:19–24; प्रेरि 17:1–9बल्कि तम्ही आप जाणा, कि पेहले-पेहले फिलिप्पी मां ङोख चवणे ते जुलम सेहणे पर वी अम्चे नरीकारा ने अम्हानु इसड़ी हिम्मत ङिली, कि अम्ही नरीकारा चा सुसमाचार तकड़ा विरोध हुते हुले वी तम्हानु सुणाऊं। 3कांकि अम्चा उपदेश तम्हानु समझाणे ची कोशिस करे पला, ना कि गुमराह करे ते ना अशुद्ध मना लारे, ते ना छल कप्पट लारे। 4पर जिसड़ा नरीकारा ने अम्हानु काबिल ठहराती सुसमाचार सोंपला, अम्ही यूंही वर्णन करु, ते ऐचे मां बन्दा नु ना, पर नरीकारा नु, जको अम्चे मना नु परखे, खौश करने चे वास्ते प्रचार करु। 5कांकि तम्ही जाणा, कि अम्ही ना तां कङी चापलूसी चीया बाता करु, ते ना लोभ वास्ते कुई बहाना करते। नरीकार अम्चा ग़वाह छै। 6-7ते अगर अम्ही मसीह चे प्रेरित हुवणे ची वजह तम्चे उपर बोझ नाख सग़ुया, तां वी अम्ही बन्दा कनु कद्दर ना चाहते, ते ना तम्हा कनु, ना नेरे काये कनु। पर जिंवे करती आई ब़ाला नु पालती पोसती रिहे, यूं करती अम्ही वी तम्चे बीच मां रेहती नरमाई ङिखाणली। 8ते यूंही अम्ही तम्ची लालसा करते हुले, ना कि नरीकारा चा सुसमाचार, पर आपणी-आपणी जान वी ङेणे नु तियार हुते, ऐवास्ते कि तम्ही अम्चे प्यारे हुती गेलते। 9कांकि, हे माये भऊ ते ब़ेहणीया, तम्ही अम्ची मेहनत ते ङुखा नु याद राखा, कि अम्ही ऐवास्ते रात-ङिओ काम धन्धा करते हुले तम्चे महु काये उपर वी बोझ कोनी बणने ची इच्छा लारे तम्हानु नरीकारा चा सुसमाचार प्रचार सुणाला।
10तम्ही यां बाता चे आप ही खौद्द ग़वाह छिवा, ते नरीकार वी, कि तम्चे बीच मां जको विश्वास राखा अम्ही किसङे पवित्र ते धार्मिक ते बेकसूर रेहले। 11जिंवे तम्ही जाणा, कि जिंवे ब़ा आपणे ब़ाला लारे बर्ताव करे, यूंही अम्ही तम्चे महु हर हेक नु वी उपदेश करते, ते शान्ति ङिते, ते समझाते रेहते। 12कि तम्चा चाल-चलन नरीकारा चे काबिल हो, जको तम्हानु आपणे राज़ ते महिमा मां हकारे।
13ऐवास्ते अम्ही वी नरीकारा चा धन्यवाद लगातार करते रिहुं, कि जब अम्चे जरिये नरीकारा चे सुसमाचार चा वचन तम्चे गोढु पुज़ला, तां तम्ही ओ बन्दे चा ना, पर नरीकारा चा वचन समझती कर ग्रहण करला, ते ओ तम्चे मां जको विश्वास राखा, असरदार छै। 14#प्रेरि 17:5ऐवास्ते कि तम्ही, हे माये भऊ ते ब़ेहणीया, नरीकारा ची वां कलीसिया ची जिसड़ी चाल चलु लाग़ले, जको यहूदिया मां मसीह ईशु मां छी, कांकि तम्ही वी आपणे लौका कनु इसड़े ही ङोख झड़ले, जिसड़े वाणे यहूदिया कनु झड़ले। 15#प्रेरि 9:23,29; 13:45,50; 14:2,5,19; 17:5,13; 18:12वा यहूदी लौका ने प्रभु ईशु नु ते भविष्यवक्ता नु वी मारती नाखले ते अम्हानु सताले, ते नरीकार वाकनु खौश कोनी, ते वे सारे बन्दा चा विरोध करी। 16ते वे नेरीया जातिया नु वांचे उद्धार वास्ते बाता करने कनु अम्हानु रोकी, नतीजा हा छै, कि वे सदा आपणे पापा चे ठां भरते रिही, पर अन्त मां तां नरीकारा चा भयानक गुस्सा वांचे उपर आती पुज़ला।
कलीसिया नु मिलणे ची आस
17हे माये भऊ ते ब़ेहणीया, जब अम्ही थोड़ी देरी वास्ते मना मां ना बल्कि खुले मां तम्हा कनु अलग़ हुती गेलते, तां अम्ही बङी इच्छा लारे तम्चे मुँह ङेखणे वास्ते होर वी ज्यादा जत्तन करला। 18ऐवास्ते अम्ही हेक वारी नी, बल्कि मैं खौद्द पौलुस ङोन वारी तम्चे गोढु आवणे चाह्ले, पर शैतान अम्हानु रोकली रेहला। 19भला अम्ची आस, जा खुशी जा बढ़ाई चा मुग़ट का छै? का अम्चा प्रभु ईशु चे सामणे ओचे आवणे चे समय तम्ही ही नी हुवा? 20अम्ची बढ़ाई ते खुशी तम्ही ही छिवा।
Currently Selected:
1 थिस्सलुनीकियां 2: ODR
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0
